2019ಕ್ಕೆ ಶಾ ಮಾಸ್ಟರ್‌ ಪ್ಲಾನ್‌

Team Udayavani, Apr 30, 2017, 11:25 AM IST

ಹೊಸದಿಲ್ಲಿ: ಬಿಜೆಪಿಯ ಚಾಣಕ್ಯ, ಚುನಾವಣಾ ಮಾಸ್ಟರ್‌ ಮೈಂಡ್‌ ಅಮಿತ್‌ ಶಾ, 2019ರ ಸಾರ್ವತ್ರಿಕ ಚುನಾವಣೆ ಗೆಲುವನ್ನೇ ದೃಷ್ಟಿಯಲ್ಲಿಟ್ಟುಕೊಂಡು ಮಾಸ್ಟರ್‌ ಪ್ಲಾನ್‌ ರೂಪಿಸಿದ್ದಾರೆ. ಆ ಪ್ಲಾನ್‌ನ ಪ್ರಮುಖ ಭಾಗವಾಗಿ 95 ದಿನಗಳ ಅಖೀಲ ಭಾರತ ಪ್ರವಾಸವನ್ನು ಅವರು ಶನಿವಾರದಿಂದ ಆರಂಭಿಸಿದ್ದಾರೆ. 

2014ರ ಚುನಾವಣೆ ವೇಳೆ ಇದ್ದ ಮೋದಿ ಅಲೆ ನಡುವೆಯೂ ಬಿಜೆಪಿ ಗೆಲ್ಲಲಾಗದ 120 ಕ್ಷೇತ್ರಗಳಲ್ಲಿ ಮುಂದಿನ ಚುನಾವಣೆ ವೇಳೆಯಾದರೂ ಗೆಲ್ಲಲು ರಣಧಿತಂತ್ರ ರೂಪಿಸುವುದು ಮತ್ತು ಪಶ್ಚಿಮ ಬಂಗಾಲ, ಕೇರಳ, ತೆಲಂಗಾಣ ಹಾಗೂ ಒಡಿಶಾ ರಾಜ್ಯಗಳ ಮೇಲೆ ಗಮನ ಕೇಂದ್ರೀಕರಿಸುವುದು, ಮಹಾಚುನಾವಣೆಗೆ 2 ವರ್ಷ ಮೊದಲೇ ಆರಂಭವಾಗಿರುವ ಈ ಮಾಸ್ಟರ್‌ ಪ್ಲಾನ್‌ನ ಪ್ರಮುಖ ಗುರಿಯಾಗಿದೆ.

ಎ, ಬಿ ಮತ್ತು ಸಿ ವಿಭಾಗ: ಚುನಾವಣೆ ದೃಷ್ಟಿಯಿಂದ ದೇಶದ 29 ರಾಜ್ಯಗಳನ್ನು ಎ, ಬಿ ಮತ್ತು ಸಿ ಎಂದು ಮೂರು ವಿಭಾಗವಾಗಿ ಅಮಿತ್‌ ಶಾ ವಿಂಗಡಿಸಿದ್ದಾರೆ. “ಎ’ ವಿಭಾಗದ ರಾಜ್ಯಗಳಲ್ಲಿ ಮೂರು ದಿನಗಳ ಕಾಲ ಉಳಿಯಲಿರುವ ಬಿಜೆಪಿ ರಾಷ್ಟ್ರಾಧ್ಯಕ್ಷ, ಬಿ ವಿಭಾಗದ ರಾಜ್ಯಗಳಲ್ಲಿ ಎರಡು ದಿನ (ಜಮ್ಮು ಮತ್ತು ಕಾಶ್ಮೀರ) ಮತ್ತು ಸಿ ವಿಭಾಗದ ರಾಜ್ಯಗಳಲ್ಲಿ ಒಂದು ದಿನ ತಂಗಲಿದ್ದಾರೆ. ಬಿಜೆಪಿ ಅಧಿಕಾರದಲ್ಲಿರುವ 16 ರಾಜ್ಯಗಳು ಸಿ ವಿಭಾಗದಲ್ಲಿದ್ದು, ಇಲ್ಲಿ ಕಡಿಮೆ ಸಮಯ ಕಳೆಯಲಿರುವ ಶಾ, ಉಳಿದ ರಾಜ್ಯಗಳಲ್ಲಿ ತಳಮಟ್ಟದಿಂದ ಪಕ್ಷ ಸಂಘಟನೆಗೆ ಒತ್ತು ನೀಡಲಿದ್ದಾರೆ.