ದಾಖಲೆ ಕದ್ದವರು ಹಿಂದಿರುಗಿಸಿರಬಹುದು!

Team Udayavani, Mar 10, 2019, 12:30 AM IST

ಹೊಸದಿಲ್ಲಿ: “ರಕ್ಷಣಾ ಇಲಾಖೆಯ ಕಚೇರಿಯಿಂದ ಕಳವಾಗಿದ್ದ ರಫೇಲ್‌ ಒಪ್ಪಂದಕ್ಕೆ ಸಂಬಂಧಿಸಿದ ಮಹತ್ವದ ಕಡತಗಳನ್ನು ಕದ್ದಿದ್ದ ಕಳ್ಳರು, ಬಹುಶಃ ಅವುಗಳನ್ನು ಒಂದು ದಿನದಲ್ಲೇ ಇಲಾಖೆಗೆ ಹಿಂದಿರುಗಿಸಿರಬೇಕು’ ಎಂದು ಕೇಂದ್ರದ ಮಾಜಿ ವಿತ್ತ ಸಚಿವ ಪಿ. ಚಿದಂಬರಂ ಲೇವಡಿ ಮಾಡಿದ್ದಾರೆ. 

ಶನಿವಾರ, ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, “”ದಾಖಲೆ ಕದ್ದವರ ವಿರುದ್ಧ ಅಧಿಕೃತ ರಹಸ್ಯ ಕಾಯ್ದೆ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ಗುಡುಗಿದ್ದ ಅಟಾರ್ನಿ ಜನರಲ್‌, ಶುಕ್ರವಾರದಂದು, ಮಗುಮ್ಮಾಗಿದ್ದರು. ಬಹುಶಃ ಅವರು ಆಲಿವ್‌ ಮರದ ಕೊಂಬೆ ಗಳ ಕಾಯ್ದೆ ಯನ್ನು ಪ್ರಯೋಗಿಸುವ ಬಗ್ಗೆ ಯೋಚಿಸಿರಬಹುದು” ಎಂದು ಚುಚ್ಚಿದ್ದಾರೆ. ಬುಧವಾರ, ಸುಪ್ರೀಂ ಕೋರ್ಟ್‌ನಲ್ಲಿ ಅಟಾರ್ನಿ ಜನರಲ್‌ ಕೆ.ಕೆ. ವೇಣುಗೋಪಾಲ್‌ ಅವರು ಕಡತ ಕಳ ವಾಗಿವೆ ಎಂದಿ ದ್ದರು. ಆದರೆ, ಶುಕ್ರವಾರದಂದು, ಕಡತಗಳು ಕಳವಾಗಿಲ್ಲ. ರಫೇಲ್‌ ಕುರಿತ ಮೇಲ್ಮನವಿಯ ಅರ್ಜಿದಾರರು ನ್ಯಾಯಾಲಯಕ್ಕೆ ಸಲ್ಲಿಸಿರುವುದು ಆ ದಾಖಲೆಗಳ ನಕಲು ಪ್ರತಿಗಳು ಮಾತ್ರ ಎಂದಿದ್ದರು.