ಆರ್‌ಜೆಡಿ ಶಾಸಕನಿಗೆ ಅಪರಿಚಿತನಿಂದ 20 ಲಕ್ಷ ರೂ. ಸುಲಿಗೆ ಕರೆ

Team Udayavani, Sep 12, 2017, 4:26 PM IST

ಮೋತಿಹಾರಿ : ಅನಾಮಧೇಯ ವ್ಯಕ್ತಿಯೋರ್ವನಿಂದ ತನಗೆ 20 ಲಕ್ಷ ರೂ.ಗಳ ಸುಲಿಗೆ ಕರೆಯೊಂದು ಬಂದಿರುವುದಾಗಿ ಬಿಹಾರದ ಪೂರ್ವ ಚಂಪಾರಣ್‌ ಜಿಲ್ಲೆಯ ಆರ್‌ಜೆಡಿ ಶಾಸಕ ಫೈಸಲ್‌ ರೆಹಮಾನ್‌ ಹೇಳಿದ್ದಾರೆ. 

ಪೂರ್ವ ಚಂಪಾರಣ್‌ ಜಿಲ್ಲೆಯ  ಧಾಕಾ ವಿಧಾನಸಭಾ ಕ್ಷೇತ್ರವನ್ನು ಪ್ರತಿನಿಧಿಸುತ್ತಿರುವ ಶಾಸಕ ಫೈಸಲ್‌ ರೆಹಮಾನ್‌ ಅವರು “ಇಂದು ಮಂಗಳವಾರ ಬೆಳಗ್ಗೆ 9.56ರ ಹೊತ್ತಿಗೆ ನನಗೆ ಅನಾಮಧೇಯ ವ್ಯಕ್ತಿಯೊಬ್ಬನಿಂದ ಬೆದರಿಕೆ ಕರೆ ಬಂದಿದ್ದು ಆತ ನನ್ನಿಂದ 20 ಲಕ್ಷ ರೂ. ಕೇಳಿದ್ದಾನೆ’ ಎಂದು ಹೇಳಿದರು. 

“ನನಗೆ ಕರೆ ಮಾಡಿದ ವ್ಯಕ್ತಿಯು ಮೊದಲು ನನ್ನ ಹೆಸರು ಕೇಳಿದ. ಬಳಿಕ ಒಂದು ವಾರದೊಳಗೆ ತನಗೆ 20 ಲಕ್ಷ ರೂ. ಸುಲಿಗೆ ಹಣ ಕೊಡಬೇಕು ಇಲ್ಲದಿದ್ದರೆ ಗಂಭೀರ ಪರಿಣಾಮ ಎದುರಿಸಬೇಕಾದೀತು ಎಂದು ಅತ್ಯಂತ ಕೆಟ್ಟ ಭಾಷೆಯನ್ನು ಬಳಿಸಿ ನನಗೆ ಎಚ್ಚರಿಕೆ ಕೊಟ್ಟ’ ಎಂದು ಫೈಸಲ್‌ ಹೇಳಿದರು. 

ಎಸ್‌ಪಿಗೆ ಮತ್ತು ಎಸ್‌ಡಿಪಿಓಗೆ ಈ ಸಂಬಂಧ ದೂರು ಕೊಟ್ಟಿದ್ದೇನೆ ಮತ್ತು ಧಾಕಾ ಪೊಲೀಸ್‌ ಠಾಣೆಯಲ್ಲಿ ಎಫ್ಐಆರ್‌ ದಾಖಲಿಸಿದ್ದೇನೆ ಎಂದು ಫೈಸಲ್‌ ಹೇಳಿದರು.