50 ಕೋಟಿ ರೂ. ಮೀರಿದ ಎನ್‌ಪಿಎ ಸಿಬಿಐ ತನಿಖೆಗೆ

Team Udayavani, Feb 28, 2018, 7:30 AM IST

ಹೊಸದಿಲ್ಲಿ: “ಸರಕಾರಿ ಸ್ವಾಮ್ಯದ ಬ್ಯಾಂಕ್‌ಗಳು ತಮ್ಮ 50 ಕೋಟಿ ರೂ.ಗಿಂತ ಹೆಚ್ಚಿನ ಎಲ್ಲ ಅನುತ್ಪಾದಕ ಆಸ್ತಿ (ಎನ್‌ಪಿಎ)ಯ ಕುರಿತು ತನಿಖೆ ಆರಂಭಿಸಿ, ಸಂಭಾವ್ಯ ವಂಚನೆಯ ಬಗ್ಗೆ ಪರಿಶೀಲಿಸಿ. ವಂಚನೆ ಕಂಡುಬಂದರೆ ತತ್‌ಕ್ಷಣ ಸಿಬಿಐಗೆ ಪ್ರಕರಣವನ್ನು ವರ್ಗಾಯಿಸಿ’.

ದೇಶದ ಅತಿದೊಡ್ಡ ಬ್ಯಾಂಕಿಂಗ್‌ ಹಗರಣ ಬಹಿರಂಗಗೊಂಡ ಬಳಿಕ ಒಂದೊಂದೇ ಪ್ರಕರಣಗಳು ಬೆಳಕಿಗೆ ಬರುತ್ತಿರುವ ಹಿನ್ನೆಲೆಯಲ್ಲಿ ಎಚ್ಚೆತ್ತಿರುವ ಕೇಂದ್ರ ಹಣಕಾಸು ಸಚಿವಾಲಯವು ಬ್ಯಾಂಕ್‌ಗಳಿಗೆ ಇಂತಹುದೊಂದು ಆದೇಶವನ್ನು ನೀಡಿದೆ. ಮಂಗಳವಾರ ಹಣಕಾಸು ಸೇವಾ ಕಾರ್ಯದರ್ಶಿ ರಾಜೀವ್‌ ಕುಮಾರ್‌ ಟ್ವೀಟ್‌ ಮಾಡಿ, “ಸರಕಾರಿ ಸ್ವಾಮ್ಯದ ಬ್ಯಾಂಕ್‌  (ಪಿಎಸ್‌ಬಿ)ಗಳ ವ್ಯವಸ್ಥಾಪಕ ನಿರ್ದೇಶಕರು ಆದಷ್ಟು ಬೇಗ ಬ್ಯಾಂಕ್‌ ವಂಚನೆ ಮತ್ತು ಉದ್ದೇಶಪೂರ್ವಕ ಸುಸ್ತಿಯನ್ನು ಪತ್ತೆಹಚ್ಚಿ, ಸಿಬಿಐಗೆ ಮಾಹಿತಿ ರವಾನಿಸಿ. 50 ಕೋಟಿ ರೂ.ಗಳನ್ನು ಮೀರಿದ ಎಲ್ಲ ಎನ್‌ಪಿಎಗಳ ಬಗ್ಗೆಯೂ ಪರಿಶೀಲಿಸಿ’ ಎಂದು ಸೂಚಿಸಿದ್ದಾರೆ. ಒಟ್ಟಾರೆಯಾಗಿ ಪಿಎಸ್‌ಬಿಗಳು 8.5 ಲಕ್ಷ ಕೋಟಿ ರೂ.ಗಳ ಎನ್‌ಪಿಎಗಳನ್ನು ಹೊಂದಿವೆ.