ಈಶ ಯೋಗ ಕೇಂದ್ರದಲ್ಲಿ S-20 ಸಭೆ

Team Udayavani, Jul 21, 2023, 7:11 AM IST

ಕೊಯಮತ್ತೂರು: ತಮಿಳುನಾಡಿನ ಕೊಯಮತ್ತೂರಿನ ಈಶ ಯೋಗ ಕೇಂದ್ರದಲ್ಲಿ ಜಿ20 ಶೃಂಗದ ಅಂಗವಾಗಿ ಸೈನ್ಸ್‌ 20(ಎಸ್‌20) ಶೃಂಗಸಭೆ ನಡೆಯಲಿದೆ. ಜು.21 ಮತ್ತು 22ರಂದು ನಡೆಯಲಿರುವ ಈ ಶೃಂಗಸಭೆಯಲ್ಲಿ 20 ರಾಷ್ಟ್ರಗಳಿಂದ 100ಕ್ಕೂ ಹೆಚ್ಚು ಪ್ರತಿನಿಧಿಗಳು ಭಾಗವಹಿಸಲಿದ್ದಾರೆ.

ವಿಜ್ಞಾನಿಗಳು, ಶಿಕ್ಷಣ ತಜ್ಞರು, ನೀತಿ ನಿರೂಪಕರು, ವಿಷಯ ತಜ್ಞರು ಸೇರಿದಂತೆ ಅನೇಕರು ಇದರಲ್ಲಿ ಪಾಲ್ಗೊಳ್ಳಲಿದ್ದಾರೆ. ನಂತರ ಎಸ್‌20 ಪ್ರತಿನಿಧಿಗಳು ಈಶ ಫೌಂಡೇಶನ್‌ ಸಂಸ್ಥಾಪಕ ಸದ್ಗುರು ಜಗ್ಗಿ ವಾಸುದೇವ್‌ ಅವರೊಂದಿಗೆ ಸಂವಾದದಲ್ಲಿ ಭಾಗವಹಿಸಲಿದ್ದಾರೆ. ಎಸ್‌20 ಶೃಂಗಸಭೆಯಲ್ಲಿ ಹಸಿರು ಇಂಧನ, ಸಮಾಜದೊಂದಿಗೆ ವಿಜ್ಞಾನದ ಸಂಪರ್ಕ ಮತ್ತು ಸಮಗ್ರ ಆರೋಗ್ಯ ಎಂಬ ವಿಷಯಗಳ ಕುರಿತು ಪ್ರತಿನಿಧಿಗಳು ಚರ್ಚಿಸಲಿದ್ದಾರೆ ಎಂದು ಪ್ರಕಟಣೆ ತಿಳಿಸಿದೆ.