ಉ.ಪ್ರ. ಉನ್ನತ ಸರಕಾರಿ ಅಧಿಕಾರಿಗೆ ಅಜಂ ಖಾನ್‌ ಧಮ್ಕಿ; ವೈರಲ್‌ ವಿಡಿಯೋ

Team Udayavani, Mar 16, 2017, 4:16 PM IST

ಲಕ್ನೋ : ತನ್ನ ಚುನಾವಣಾ ಗೆಲುವಿನ ಸರ್ಟಿಫಿಕೇಟ್‌  ಪಡೆಯಲು ಇಲ್ಲಿನ ಮಂಡಿ ಪರಿಷತ್‌ನಲ್ಲಿರುವ ಸ್ಥಳೀಯ ಚುನಾವಣಾ ಮಂಡಳಿ ಕಾರ್ಯಾಲಯಕ್ಕೆ  ತನಗೆ ಪ್ರವೇಶಾನುಮತಿ ನಿರಕಾರಿಸಿದ ರಾಮಪುರ ಉಪ ವಿಭಾಗೀಯ ಮ್ಯಾಜಿಸ್ಟ್ರೇಟರನ್ನು ಸಮಾಜವಾದಿ ಪಕ್ಷದ ನಾಯಕ ಹಾಗೂ ಅಖೀಲೇಶ್‌ ಸಚಿವ ಸಂಪುಟದಲ್ಲಿ ಸಚಿವರಾಗಿರುವ ಅಜಂ ಖಾನ್‌ ಅವರು ಬಹಿರಂಗವಾಗಿ ದಬಾಯಿಸಿ, ವರ್ಗಾವಣೆಯ ಬೆದರಿಕೆ ಒಡ್ಡಿ, ದುರ್ವರ್ತನೆ ತೋರಿದ ಪ್ರಕರಣದ ವಿಡಿಯೋ ಚಿತ್ರಿಕೆ ಈಗ ವೈರಲ್‌ ಆಗಿದೆ.

“ನನ್ನ ಚುನಾವಣಾ ಸರ್ಟಿಫಿಕೇಟನ್ನು ನಾನು ಅನಂತರ ಕೂಡ ಪಡೆಯಬಹುದು; ಆದರೆ ನಿಮ್ಮನ್ನು ನಾನಿಲ್ಲಿ ವರ್ಗ ಮಾಡಿಸಿಕೊಂಡದ್ದು ಇದಕ್ಕೇ ಏನು ? ಹುಷಾರ್‌, ನಿಮ್ಮನ್ನು ನಾನು ಈಗಲೂ ಇಲ್ಲಿಂದ ಬೇರೆಡೆಗೆ ವರ್ಗಾಯಿಸಬಲ್ಲೆ’ ಎಂದು ಅಜಂ ಖಾನ್‌ ಗುಡುಗಿದ ವಿಡಿಯೋ ಸಾರ್ವತ್ರಿಕ ಟೀಕೆ, ಖಂಡನೆಗೆ ಗುರಿಯಾಗಿದೆ.

ಸಮಾಜವಾದಿ ಪಕ್ಷದ ವಕ್ತಾರ ದೀಪಕ್‌ ಮಿಶ್ರಾ ಅವರು ಈ ಬಗ್ಗೆ ಪ್ರತಿಕ್ರಿಯಿಸಿ, “ಅಜಂ ಖಾನ್‌ ಅವರಂತಹ ನಾಯಕರ ದುರ್ವರ್ತನೆಯಂದಲೇ ಸಮಾಜವಾದಿ ಪಕ್ಷಕ್ಕೆ ರಾಜ್ಯದಲ್ಲೀಗ ಈ ಗತಿ ಬಂದಿದೆ’ ಎಂದು ಹೇಳಿದ್ದಾರೆ. 

ಇದೇ ವೇಳೆ ಅಮರ್‌ ಸಿಂಗ್‌ ಸೇರಿದಂತೆ ಹಲವಾರು ಪ್ರಮುಖ ರಾಜಕಾರಣಿಗಳು, ಉನ್ನತ ಮಟ್ಟ ಸರಕಾರಿ ಅಧಿಕಾರಿಯೊಂದಿಗೆ ಅಜಂ ಖಾನ್‌ ತೋರಿರುವ ದುರ್ವರ್ತನೆಯನ್ನು ಖಂಡಿಸಿದ್ದಾರೆ.

ಬಿಜೆಪಿ ನಾಯಕ ವಿಜಯ್‌ ಬಹಾದ್ದೂರ್‌ ಪಾಠಕ್‌ ಅವರು “ಅಜಂ ಖಾನ್‌ ಅವರಂತಹ ಎಸ್‌ಪಿ ನಾಯಕರು ತಾವೀಗ ಅಧಿಕಾರದಲ್ಲಿ ಇಲ್ಲ ಎಂಬುದನ್ನು ಇನ್ನೂ ಅರಿತಿಲ್ಲ’ ಎಂದು ಪ್ರತಿಕ್ರಿಯಿಸಿದ್ದಾರೆ.