ಮಾನವನ ರಕ್ತದಲ್ಲಿ ಮೈಕ್ರೋಪ್ಲಾಸ್ಟಿಕ್‌! ಮಲಿನಕಾರಕ ಅಂಶ ಇದೇ ಮೊದಲ ಬಾರಿಗೆ ಪತ್ತೆ;

Team Udayavani, Mar 26, 2022, 8:00 AM IST

ನವದೆಹಲಿ: ಇದೇ ಮೊದಲ ಬಾರಿಗೆ ಮನುಷ್ಯನ ರಕ್ತದಲ್ಲಿ ಮಾಲಿನ್ಯದ ಪ್ರಮುಖ ಮೂಲವಾದ ಪ್ಲಾಸ್ಟಿಕ್‌ನ ಸಣ್ಣ ಕಣಗಳು (ಮೈಕ್ರೋಪ್ಲಾಸ್ಟಿಕ್‌) ಪತ್ತೆಯಾಗಿದೆ!

ನೆದರ್ಲೆಂಡ್‌ನ‌ ವಿಜ್ಞಾನಿಗಳ ತಂಡವು ಪರೀಕ್ಷೆಗೊಳಪಡಿಸಿದ ಸ್ಯಾಂಪಲ್‌ಗ‌ಳ ಪೈಕಿ ಶೇ.80ರಷ್ಟು ಮಾದರಿಗಳಲ್ಲಿ ಮೈಕ್ರೋಪ್ಲಾಸ್ಟಿಕ್‌ ಇರುವುದು ದೃಢಪಟ್ಟಿದೆ. ಪ್ಲಾಸ್ಟಿಕ್‌ನ ಕಣಗಳು ಮಾನವ ಶರೀರದಲ್ಲೂ ಸಂಚರಿಸಿ, ಅಂಗಾಂಗಗಳಲ್ಲಿ ಉಳಿಯಬಲ್ಲದು ಎಂಬುದನ್ನು ಸಾಬೀತುಪಡಿಸುವ ಮಹತ್ವದ ಸಂಶೋಧನೆ ಇದಾಗಿದೆ.

ಈ ಕಣಗಳು ಮನುಷ್ಯನ ಆರೋಗ್ಯದ ಮೇಲೆ ಹೇಗೆ ಪರಿಣಾಮ ಬೀರುತ್ತವೆ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಆದರೆ, ವಾತಾವರಣದಲ್ಲಿ ಮಾಲಿನ್ಯ ಹೆಚ್ಚಲು ಇದೇ ಮೈಕ್ರೋಪ್ಲಾಸ್ಟಿಕ್‌ಗಳು ಕಾರಣ. ಎನ್ವಿರಾನ್‌ಮೆಂಟ್‌ ಇಂಟರ್‌ನ್ಯಾಷನಲ್‌ ಎಂಬ ನಿಯತಕಾಲಿಕೆಯಲ್ಲಿ ಈ ಸಂಶೋಧನಾ ವರದಿ ಪ್ರಕಟವಾಗಿದೆ.

22ರ ಪೈಕಿ 17ರಲ್ಲಿ ಪ್ಲಾಸ್ಟಿಕ್‌ ಪತ್ತೆ:
22 ಮಂದಿ ಅಪರಿಚಿತ ದಾನಿಗಳ ರಕ್ತದ ಮಾದರಿಗಳನ್ನು ಈ ಸಂಶೋಧನೆಗೆ ಬಳಸಲಾಗಿತ್ತು. ಈ ಪೈಕಿ 17 ಮಾದರಿಗಳಲ್ಲಿ ಮೈಕ್ರೋಪ್ಲಾಸ್ಟಿಕ್‌ಗಳು ಪತ್ತೆಯಾಗಿವೆ. ಇದರಲ್ಲಿ ಅರ್ಧದಷ್ಟು ಸ್ಯಾಂಪಲ್‌ಗ‌ಳಲ್ಲಿ ಪಾಲಿಥೈಲೀನ್‌ ಟೆರೆಫ‌¤ಲೇಟ್‌(ಪಿಇಟಿ) ಅಂದರೆ ಪಾನೀಯಗಳ ಬಾಟಲಿಗಳನ್ನು ಮಾಡಲು ಬಳಸುವ ಪ್ಲಾಸ್ಟಿಕ್‌ ಪತ್ತೆಯಾಗಿದೆ.

ಇದನ್ನೂ ಓದಿ :ಬುದ್ದಿಜೀವಿಗಳ ಸದನಕ್ಕೆ ಅರ್ಹರನ್ನು ಆಯ್ಕೆ ಮಾಡಿ: ಮಾಜಿ ಶಾಸಕ ಕೆ.ವೆಂಕಟೇಶ್

ಇನ್ನು ಶೇ.36ರಷ್ಟು ಮಂದಿಯಲ್ಲಿ ಆಹಾರದ ಪ್ಯಾಕೇಜಿಂಗ್‌ಗೆ ಬಳಸುವ ಪಾಲಿಸ್ಟಿರೀನ್‌, ಶೇ.23ರಷ್ಟು ಸ್ಯಾಂಪಲ್‌ಗ‌ಳಲ್ಲಿ ಚೀಲಗಳ ಪ್ಯಾಕೇಜಿಂಗ್‌ಗೆ ಬಳಸುವ ಪಾಲಿಥೈಲೀನ್‌ ಪ್ಲಾಸ್ಟಿಕ್‌ ಪತ್ತೆಯಾಗಿದೆ.

ಇವುಗಳ ಪ್ರಮಾಣವು ಕಡಿಮೆಯಿದ್ದರೂ, ಅಂದರೆ ಪ್ರತಿ ಮಿಲಿಲೀಟರ್‌ ರಕ್ತದಲ್ಲಿ 1.6 ಮೈಕ್ರೋಗ್ರಾಂ ಆಗಿದ್ದರೂ, ಇದು ಎಚ್ಚರಿಕೆಯ ಕರೆಗಂಟೆಯೇ ಆಗಿದೆ ಎಂದು ವಿಜ್ಞಾನಿಗಳು ಎಚ್ಚರಿಸಿದ್ದಾರೆ.