ಎನ್‌ಐಸಿ ಅಮೂಲ್ಯ ಮಾಹಿತಿಗಳಿಗೆ ಕನ್ನ

Team Udayavani, Sep 19, 2020, 6:00 AM IST

ನವದೆಹಲಿ: ರಾಷ್ಟ್ರೀಯ ಮಾಹಿತಿ ಕೇಂದ್ರದ (ಎನ್‌ಐಸಿ) ನಾನಾ ಕಂಪ್ಯೂಟರ್‌ಗಳಲ್ಲಿ ಅಡಕವಾಗಿದ್ದ ರಾಷ್ಟ್ರೀಯ ಭದ್ರತೆ, ಪ್ರಧಾನಿ ನರೇಂದ್ರ ಮೋದಿ ಸೇರಿದಂತೆ ವಿವಿಧ ಗಣ್ಯರ ಮಾಹಿತಿ ಹ್ಯಾಕ್‌ ಮಾಡಿರುವ ವಿಚಾರ ತಡವಾಗಿ ಬಹಿರಂಗವಾಗಿದೆ. ಅದರಲ್ಲೂ, ಬೆಂಗಳೂರಿನಲ್ಲಿರುವ ಐಟಿ ಕಂಪನಿಯಿಂದ ಎನ್‌ಐಸಿಗೆ ಕಳುಹಿಸಲಾಗಿದ್ದ ಇ-ಮೇಲ್‌ನ ಮೂಲಕ ಮಾಹಿತಿಯನ್ನು ಹ್ಯಾಕ್‌ ಮಾಡಿರುವುದು ತಿಳಿದುಬಂದಿದ್ದು ಇದು ಎಲ್ಲರನ್ನೂ ದಿಗ್ಭ್ರಾಂತಗೊಳಿಸಿದೆ. ಕಳವಾದ ಮಾಹಿತಿಯಲ್ಲಿ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್‌ ದೊವಾಲ್‌ ಅವರಿಗೆ ಸಂಬಂಧಿಸಿದ ಮಾಹಿತಿಗಳೂ ಇದ್ದವೆಂದು ಹೇಳಲಾಗಿದೆ.

ಇ-ಮೇಲ್‌ ಮೂಲಕ ಬಂದಿದ್ದ ಮಾಲ್‌ವೇರ್‌: ದೆಹಲಿಯಲ್ಲಿರುವ ಎನ್‌ಐಸಿ ಕಚೇರಿ ಸಿಬ್ಬಂದಿಯೊಬ್ಬರಿಗೆ ಕೆಲ ದಿನಗಳ ಹಿಂದೆ ಒಂದು ಇ-ಮೇಲ್‌ ಬಂದಿದ್ದು, ಅದರಲ್ಲಿ ಕೆಲವು ಫೈಲ್‌ಗಳ ಅಟ್ಯಾಚ್‌ಮೆಂಟ್‌ಗಳನ್ನು ಕಳುಹಿಸಲಾಗಿತ್ತು. ಇ-ಮೇಲ್‌ ತೆರೆದು ಓದಿದ ಸಿಬ್ಬಂದಿ ಅಟ್ಯಾಚ್‌ಮೆಂಟ್‌ಗಳನ್ನು ಗಮನಿಸಲು ಅವುಗಳ ಮೇಲೆ ಕ್ಲಿಕ್‌ ಮಾಡಿದ ಕೂಡಲೇ ಅದರಲ್ಲಿದ್ದ ಮಾಲ್‌ವೇರ್‌ಗಳು ಆ ಕಂಪ್ಯೂಟರ್‌ನಲ್ಲಿ ರಹಸ್ಯವಾಗಿ ನುಗ್ಗಿ ಆ ಕಂಪ್ಯೂಟರ್‌ನಲ್ಲಿದ್ದ ಅಮೂಲ್ಯ ಮಾಹಿತಿಗಳನ್ನು ರವಾನಿಸಿದೆ. ಆನಂತರ, ಆ ಸಿಬ್ಬಂದಿಯ ಕಂಪ್ಯೂಟರಿನೊಂದಿಗೆ ಲ್ಯಾನ್‌ ಮೂಲಕ ಜೋಡಿಸಲ್ಪಟ್ಟಿರುವ ಕಚೇರಿಯ ಇನ್ನಿತರ ಕಂಪ್ಯೂಟರ್‌ಗಳಿಗೂ ದಾಳಿಯಿಟ್ಟು ಅವುಗಳಲ್ಲಿ ಇದ್ದ ಮತ್ತಷ್ಟು ಅಮೂಲ್ಯ ಮಾಹಿತಿಗಳನ್ನು ಸೋರಿಕೆ ಮಾಡಿದೆ.

ಇ-ಮೇಲ್‌ ಅಸಲಿ ಮೂಲ ಅಮೆರಿಕ!: ವಿಷಯ ಗಮನಕ್ಕೆ ಬರುತ್ತಲೇ, ಎನ್‌ಐಸಿ ಸಿಬ್ಬಂದಿ ದೆಹಲಿ ಪೊಲೀಸರಿಗೆ ದೂರು ಸಲ್ಲಿಸಿದ್ದು, ತಕ್ಷಣವೇ ತನಿಖೆ ಆರಂಭಿಸಲಾಗಿದೆ. ಮಾಲ್‌ವೇರ್‌ ಹೊಂದಿದ್ದ ಇ-ಮೇಲ್‌ನ ಮೂಲ ಕೆದಕಿದಾಗ ಅದು ಬೆಂಗಳೂರಿನ ಐಟಿ ಕಂಪನಿಯಿಂದ ರವಾನೆಯಾಗಿರುವುದು ತಿಳಿದು ಬಂದಿದೆ. ಆದರೆ, ಬೆಂಗಳೂರಿನ ಕಂಪನಿಗೆ ಆ ಇ-ಮೇಲ್‌ ಬಂದಿರುವುದು ಅಮೆರಿಕದ ಪ್ರಾಕ್ಸಿ ಸರ್ವರ್‌ನಿಂದ ಬಂದಿತ್ತೆಂಬ ವಿಚಾರವೂ ತನಿಖೆಯ ವೇಳೆ ಬಹಿರಂಗವಾಗಿದೆ. ಹಾಗಾಗಿ, ಈ ಪ್ರಕರಣವೀಗ ಅಂತಾರಾಷ್ಟ್ರೀಯ ಸ್ವರೂಪ ಪಡೆದುಕೊಂಡಿದೆ.