ಅಸ್ಸಾಂ ಪೊಲೀಸರಿಂದ 100 ಕೋಟಿ ರೂ.ಗೂ ಅಧಿಕ ಮೌಲ್ಯದ ಡ್ರಗ್ಸ್‌ ನಾಶ

Team Udayavani, Jul 30, 2022, 9:47 PM IST

ಗುವಾಹಟಿ: ‘ಆಜಾದಿ ಕಾ ಅಮೃತ್ ಮಹೋತ್ಸವ’ದ ಅಂಗವಾಗಿ ಶನಿವಾರ ಇಲ್ಲಿ 100 ಕೋಟಿ ರೂ.ಗೂ ಅಧಿಕ ಮೌಲ್ಯದ ವಶಪಡಿಸಿಕೊಂಡ ಡ್ರಗ್ಸ್‌ಗಳನ್ನು ಪೊಲೀಸರು ನಾಶಪಡಿಸಿದ್ದಾರೆ.

ನಗರದ ಹೊರವಲಯದಲ್ಲಿರುವ ಪ್ರಾಗ್ಜ್ಯೋತಿಶಪುರ ಪೊಲೀಸ್ ಠಾಣೆ ವ್ಯಾಪ್ತಿಯ ಹತಿಶಿಲಾ ದಂಪರಾದಲ್ಲಿ ಗುವಾಹಟಿ ಪೊಲೀಸರು ಸಾಮೂಹಿಕವಾಗಿ ಡ್ರಗ್ಸ್ ವಿಲೇವಾರಿ ನಡೆಸಿ 935 ಕೆಜಿ ವಶಪಡಿಸಿಕೊಂಡ ಡ್ರಗ್ಸ್ ಅನ್ನು ಸುಟ್ಟು ಹಾಕಿದ್ದಾರೆ ಎಂದು ಪೊಲೀಸ್ ಕಮಿಷನರ್ ಹರ್ಮೀತ್ ಸಿಂಗ್ ತಿಳಿಸಿದ್ದಾರೆ.

ನಾಶಪಡಿಸಿದ ಮಾದಕವಸ್ತುಗಳಲ್ಲಿ ಭಾರೀ ಪ್ರಮಾಣದ ಹೆರಾಯಿನ್, ಗಾಂಜಾ ಮತ್ತು ಕಚ್ಚಾ ಮೆಥಾಂಫೆಟಮೈನ್, 19,00,000 ಕ್ಕೂ ಹೆಚ್ಚು ಮೆಥ್ ಮಾತ್ರೆಗಳು ಮತ್ತು 3,70,000 ಕ್ಕೂ ಹೆಚ್ಚು ಬಾಟಲಿಗಳು ಕೆಮ್ಮು ಸಿರಪ್ ಸೇರಿವೆ. ಸಿಂಗ್ ಅವರು ಜಂಟಿ ಪೊಲೀಸ್ ಕಮಿಷನರ್ ಪಾರ್ಥ ಸಾರಥಿ ಮಹಾಂತ ಅವರೊಂದಿಗೆ ಡ್ರಗ್ಸ್ಗೆ ಬೆಂಕಿ ಹಚ್ಚಿದರು. ಮಾದಕ ವಸ್ತುಗಳ ಅಂತಾರಾಷ್ಟ್ರೀಯ ಮೌಲ್ಯ 100 ಕೋಟಿ ರೂ.ಗೂ ಅಧಿಕ ಎಂದು ಅಂದಾಜಿಸಲಾಗಿದೆ.

ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವಾ ಶರ್ಮಾ ಡ್ರಗ್ಸ್ ಅನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸುವವರೆಗೆ ಈ ಯುದ್ಧವನ್ನು ನಡೆಸುವಂತೆ ಸ್ಪಷ್ಟ ಸೂಚನೆ ನೀಡಿದ್ದಾರೆ. ಡ್ರಗ್ಸ್ ವಿರುದ್ಧದ ಯುದ್ಧಕ್ಕೆ ನಮ್ಮ ಸಂಪೂರ್ಣ ಬದ್ಧತೆಯನ್ನು ಪುನರುಚ್ಚರಿಸಲು ನಾನು ಈ ಅವಕಾಶವನ್ನು ಬಳಸಲು ಬಯಸುತ್ತೇನೆ’ ಎಂದು ಸಿಂಗ್ ಹೇಳಿದರು.