39 ಸಾವಿರದ ಗಡಿ ದಾಟಿ ಕೆಳಗಿಳಿದ ಸೆನ್ಸೆಕ್ಸ್‌

Team Udayavani, Apr 2, 2019, 6:00 AM IST

ಮುಂಬಯಿ: ಹೊಸ ವಿತ್ತೀಯ ವರ್ಷದ ಆರಂಭದ ದಿನವೇ ದಾಖಲೆ ಸೃಷ್ಟಿಸುವ ಮುಂಬಯಿ ಷೇರುಪೇಟೆಯ ಯತ್ನ ಸ್ವಲ್ಪದರಲ್ಲೇ ಕೈಜಾರಿದೆ. ಸೋಮವಾರದ ವಹಿವಾಟಿನ ವೇಳೆ ಒಂದು ಹಂತದಲ್ಲಿ ಮುಂಬಯಿ ಷೇರುಪೇಟೆ ಸಂವೇದಿ ಸೂಚ್ಯಂಕ 39,115ಕ್ಕೆ ತಲುಪುವ ಮೂಲಕ ಹೊಸ ದಾಖಲೆ ಮಾಡುವ ವಿಶ್ವಾಸ ಮೂಡಿ ಸಿತ್ತು. ಆದರೆ ಅನಂತರ ಕ್ರಮೇಣ ಕುಸಿತದ ಹಾದಿ ಗಿಳಿದ ಸೆನ್ಸೆಕ್ಸ್‌, ದಿನದಂತ್ಯಕ್ಕೆ 198 ಅಂಕ ಏರಿಕೆ ದಾಖಲಿಸಿ 38,871ರಲ್ಲಿ ವಹಿವಾಟು ಅಂತ್ಯಗೊಳಿಸಿತು.

ಆರ್‌ಬಿಐ ಹಣಕಾಸು ನೀತಿ ಪರಾಮರ್ಶೆ ವೇಳೆ ಸಾಲದ ಮೇಲಿನ ಬಡ್ಡಿ ದರ ಇಳಿಕೆ ಮಾಡಬಹುದು ಎಂಬ ನಿರೀಕ್ಷೆ ಮತ್ತು ಅಮೆರಿಕ-ಚೀನ ನಡುವಿನ ವ್ಯಾಪಾರ ಬಿಕ್ಕಟ್ಟು ಸಂಧಾನದ ಹಂತಕ್ಕೆ ತಲುಪಿರುವುದು ಹೂಡಿಕೆದಾರರಲ್ಲಿ ಭರವಸೆಯ ಬೆಳಕು ಮೂಡಿಸಿದ್ದವು.