ಕಠುವಾ ರೇಪ್‌ ಕೇಸ್‌: ಬಿಗಿ ಭದ್ರತೆಯಲ್ಲಿ 7 ಆರೋಪಿಗಳು ಕೋರ್ಟಿಗೆ

Team Udayavani, May 31, 2018, 12:14 PM IST

ಪಠಾಣ್‌ಕೋಟ್‌, ಪಂಜಾಬ್‌ : ಕಠುವಾ ರೇಪ್‌ ಆ್ಯಂಡ್‌ ಮರ್ಡರ್‌ ಕೇಸಿನ ಎಂಟು ಆರೋಪಿಗಳ ಪೈಕಿ ಏಳು ಮಂದಿಯನ್ನು ಇಂದು ಇಲ್ಲಿನ ಜಿಲ್ಲಾ ಮತ್ತು ಸೆಶನ್ಸ್‌  ನ್ಯಾಯಾಲಯದಲ್ಲಿ  ಬಿಗಿ ಭದ್ರತೆಯಲ್ಲಿ ಹಾಜರುಪಡಿಸಲಾಯಿತು.

ಈ ವರ್ಷ ಜನವರಿಯಲ್ಲಿ ಜಮ್ಮು ಕಾಶ್ಮೀರದ ಕಠುವಾ ಜಿಲ್ಲೆಯಲ್ಲಿ ಅಲೆಮಾರಿ ಮುಸ್ಲಿಂ ಜನಾಂಗದ 8ರ ಹರೆಯದ ಬಾಲಕಿಯನ್ನು ಅಪಹರಿಸಿ, ಅತ್ಯಾಚಾರ ನಡೆಸಿ ಕೊಲೆಗೈಯಲಾಗಿತ್ತು. ಈ ಪ್ರಕರಣದ ವಿಚಾರಣೆಯನ್ನು ಸುಪ್ರೀಂ ಕೋರ್ಟ್‌ ಜಮ್ಮು ಕಾಶ್ಮೀರದಿಂದ ಪಠಾಣ್‌ಕೋಟ್‌ ಗೆ ವರ್ಗಾಯಿಸಿತ್ತು.

ಎಂಟು ಮಂದಿ ಆರೋಪಿಗಳ ಪೈಕಿ ಏಳು ಮಂದಿಯನ್ನು ಹಳೇ ಪಠಾಣ್‌ಕೋಟ್‌ – ದಿಲ್ಲಿ  ಹೆದ್ದಾರಿಯಲ್ಲಿನ ಸೆಶನ್ಸ್‌ ನ್ಯಾಯಾಲಯ ಸಂಕೀರ್ಣಕ್ಕೆ ಬಸ್ಸಿನಲ್ಲಿ ಬಿಗಿ ಭದ್ರತೆಯೊಂದಿಗೆ ಕರೆ ತರಲಾಯಿತು. ಇವರನ್ನು ಜಿಲ್ಲಾ ಮತ್ತು ಸೆಶನ್ಸ್‌ ನ್ಯಾಯಾಧೀಶ ತೇಜ್‌ವಿಂದರ್‌ ಸಿಂಗ್‌ ಅವರ ಮುಂದೆ ಹಾಜರುಪಡಿಸಲಾಗುವುದು. 

ಈ ಪ್ರಕರಣದ ಎಂಟನೇ ಆರೋಪಿಯು ಅಪ್ರಾಪ್ತ ವಯಸ್ಸಿನವನಾಗಿದ್ದು ಆತ ಕಠುವಾದಲ್ಲಿನ ಬಾಲಾಪರಾಧ ಕೋರ್ಟಿನಲ್ಲಿ ವಿಚಾರಣೆ ಎದುರಿಸಲಿದ್ದಾನೆ. 

ಕಠುವಾ ರೇಪ್‌ ಆ್ಯಂಡ್‌ ಮರ್ಡರ್‌ ಕೇಸಿನ ವಿಚಾರಣೆಯನ್ನು ಗೌಪ್ಯತೆಯೊಂದಿಗೆ ನಡೆಸಬೇಕೆಂದು ಕಳೆದ ಮೇ 7ರಂದು ಸುಪ್ರೀಂ ಕೋರ್ಟ್‌ ಆದೇಶಿಸಿತ್ತು.