‘ರಾಷ್ಟ್ರೀಯ ಚಿಟ್ಟೆ’ ಆಯ್ಕೆ ಪ್ರಕ್ರಿಯೆಗೆ ಚಾಲನೆ: ಏಳು ತಳಿಯ ಚಿಟ್ಟೆಗಳ ನಡುವೆ ಪೈಪೋಟಿ

Team Udayavani, Sep 11, 2020, 6:00 AM IST

ಹೊಸದಿಲ್ಲಿ: ರಾಷ್ಟ್ರೀಯ ಪ್ರಾಣಿಯಾಗಿ ಹುಲಿ, ರಾಷ್ಟ್ರೀಯ ಪಕ್ಷಿಯಾಗಿ ನವಿಲು, ರಾಷ್ಟ್ರೀಯ ಪುಷ್ಪವಾಗಿ ಕಮಲವನ್ನು ಪರಿಗಣಿಸಿರುವಂತೆ, ಚಿಟ್ಟೆಗಳಲ್ಲಿ ಅತ್ಯುತ್ತಮ ಪ್ರಭೇದವೊಂದನ್ನು ಆರಿಸಿ, ಅದಕ್ಕೆ ರಾಷ್ಟ್ರೀಯ ಸ್ಥಾನಮಾನ ನೀಡುವ ವಿಶೇಷ ಪ್ರಕ್ರಿಯೆಗೆ ಚಾಲನೆ ನೀಡಲಾಗಿದೆ. ಚಿಟ್ಟೆಗಳ ಬಗ್ಗೆ ಇಂಥ ಪ್ರಯತ್ನ ನಡೆಯುತ್ತಿರುವುದು ಇದೇ ಮೊದಲು.

ಇದಕ್ಕಾಗಿ ಚಿಟ್ಟೆಗಳ ಹವ್ಯಾಸಿ ಅಧ್ಯಯನಕಾರರು, ಸಂಶೋಧಕರು, ಬರಹಗಾರರು ಮತ್ತು ತಜ್ಞರಿರುವ 50 ಸದಸ್ಯರ ಸಮಿತಿಯೊಂದನ್ನು ಕೇಂದ್ರ ಪರಿಸರ ಇಲಾಖೆ ರಚಿಸಿದೆ. ಚಿಟ್ಟೆಗಳ ಮಾಸವೆಂದೇ ಪರಿಗಣಿಸಲ್ಪಟ್ಟಿರುವ ಸೆಪ್ಟಂಬರ್‌ನಲ್ಲಿ ಈ ಕೆಲಸಕ್ಕೆ ಚಾಲನೆ ನೀಡಲಾಗಿದೆ.

ಸಮಿತಿಯಲ್ಲಿ ಖ್ಯಾತ ಚಿಟ್ಟೆಗಳ ತಜ್ಞ ಡಾ| ಕೃಷ್ಣಮೇಘ ಕುಂಟೆ, ಐಸಾಕ್‌ ಕೆಹಿಂಕರ್‌ ಅವರು ಇದ್ದು, ರಾಷ್ಟ್ರೀಯ ಚಿಟ್ಟೆಯ ಆಯ್ಕೆಯ ಬಗ್ಗೆ ಅಂತಿಮ ತೀರ್ಮಾನ ಕೈಗೊಳ್ಳಲಿದ್ದಾರೆ. ಈ ಸಮಿತಿಯು ಶಿಫಾರಸು ಮಾಡುವ ಚಿಟ್ಟೆಯ ಪ್ರಭೇದಕ್ಕೆ “ರಾಷ್ಟ್ರೀಯ ಚಿಟ್ಟೆ’ ಎಂಬ ಹೆಗ್ಗಳಿಕೆ ಸಿಗಲಿದೆ.

ಯಾವ ಚಿಟ್ಟೆಗೆ ಒಲಿಯುವುದು ಅದೃಷ್ಟ?
ಅಂತಿಮ ಪಟ್ಟಿಯಲ್ಲಿ ಸ್ಥಾನ ಪಡೆದಿರುವ ಏಳು ಚಿಟ್ಟೆಗಳಲ್ಲಿ ಯಾವುದು ರಾಷ್ಟ್ರೀಯ ಚಿಟ್ಟೆಯ ಸ್ಥಾನಮಾನ ಪಡೆಯಬೇಕು ಎಂಬ ಪ್ರಶ್ನೆಯನ್ನು ಆನ್‌ಲೈನ್‌ ಮೂಲಕ ಸಾರ್ವಜನಿಕರ ಮುಂದಿಡಲಾಗಿದೆ. ಗುರುವಾರ (ಸೆ. 10) ದಿಂದಲೇ ಸಾಮಾಜಿಕ ಜಾಲತಾಣ ಮತ್ತು ವಾಟ್ಸ್‌ಆ್ಯಪ್‌ನಲ್ಲಿ ಮತದಾನ ಪ್ರಕ್ರಿಯೆ ಆರಂಭವಾಗಿದೆ. ಸಾರ್ವಜನಿಕರ ಬಹುಮತದ ಆಯ್ಕೆಗೆ ಅನುಗುಣವಾಗಿ ಆಯ್ಕೆಯಾಗುವ ಚಿಟ್ಟೆಯ ಹೆಸರನ್ನು ಕೇಂದ್ರ ಪರಿಸರ ಖಾತೆಯ ಗಮನಕ್ಕೆ ತರಲಾಗುತ್ತದೆ. ಅನಂತರ ರಾಷ್ಟ್ರೀಯ ಚಿಟ್ಟೆಯ ಹೆಸರನ್ನು ಪರಿಸರ ಖಾತೆಯೇ ಅಧಿಕೃತವಾಗಿ ಘೋಷಿಸುತ್ತದೆ. ಈ ವರ್ಷಾಂತ್ಯಕ್ಕೆ ಅಥವಾ 2021ರ ಆರಂಭದಲ್ಲಿ ಅಧಿಕೃತವಾಗಿ ಪ್ರಕಟಗೊಳ್ಳುವ ಸಾಧ್ಯತೆಯಿದೆ ಎಂದು ಮುಂಬಯಿಯ ಚಿಟ್ಟೆಗಳ ಅಧ್ಯಯನಕಾರ ದಿವಾಕರ್‌ ತೋಬ್ರೆ ತಿಳಿಸಿದ್ದಾರೆ.

ಅಂತಿಮ ಪಟ್ಟಿಯಲ್ಲಿ ಚಿಟ್ಟೆಗಳು
ಕಾಮನ್‌ ಜೆಝೆಬೆಲ್‌
ಫೈವ್‌-ಬಾರ್‌ ಸ್ವೋರ್ಡ್‌ ಟೇಲ್‌
ಕೃಷ್ಣಾ ಪೀಕಾಕ್‌
ಎಲ್ಲೋ ಗಾರ್ಗನ್‌
ಕಾಮನ್‌/ಇಂಡಿಯನ್‌ ನವಾಬ್‌
ನದರ್ನ್ ಜಂಗಲ್‌ ಕ್ವೀನ್‌
ಆರೆಂಜ್‌ ಓಕ್‌ಲೀಫ್