Shambhu border; ದಿಲ್ಲಿ ಚಲೋಗೆ ತಡೆ: ರೈಲು ರೋಕೋಗೆ ರೈತರ ನಿರ್ಧಾರ

Team Udayavani, Dec 15, 2024, 6:30 AM IST

ಹೊಸದಿಲ್ಲಿ: ಎಂಎಸ್‌ಪಿಗೆ ಕಾನೂನು ಖಾತರಿ ಸೇರಿದಂತೆ ಹಲವು ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಹರಿಯಾಣದ ಶಂಭು ಗಡಿಯಿಂದ 3ನೇ ಬಾರಿಗೆ ದಿಲ್ಲಿಗೆ ತೆರಳುತ್ತಿದ್ದ ರೈತರ ಕಾಲ್ನಡಿಗೆ ಜಾಥಾವನ್ನು ಶನಿವಾರವೂ ಪೊಲೀಸರು ತಡೆದಿದ್ದಾರೆ. ರೈತರನ್ನು ಹಿಮ್ಮೆಟ್ಟಿಸಲು ಅಶ್ರುವಾಯು, ಜಲಫಿರಂಗಿ ಬಳಸಿದ ಪರಿಣಾಮ 17 -18 ರೈತರು ಗಾಯಗೊಂಡಿದ್ದಾರೆ. ಹೀಗಾಗಿ ಜಾಥಾ ರದ್ದುಗೊಳಿಸಿದ ರೈತರು, ಪಂಜಾಬ್‌ನಲ್ಲಿ ಸೋಮವಾರ ಟ್ರ್ಯಾಕ್ಟರ್‌ ಜಾಥಾ, ಬುಧವಾರ ರೈಲ್‌ ರೋಕೋ ಪ್ರತಿಭಟನೆ ಹಮ್ಮಿಕೊಳ್ಳುವುದಾಗಿ ಘೋಷಿಸಿದ್ದಾರೆ.

ಈ ಪ್ರತಿಭಟನೆಯಲ್ಲಿ ಎಲ್ಲ ಪಂಜಾಬಿಗಳೂ ಭಾಗವಹಿಸಬೇಕು ಎಂದು ರೈತ ನಾಯಕ ಸರ್ವನ್‌ ಸಿಂಗ್‌ ಪಂಧರ್‌ ಕರೆ ನೀಡಿದ್ದಾರೆ. ಶನಿವಾರ ಶಂಭು ಗಡಿಯಿಂದ ಸ್ವಲ್ಪವೇ ದೂರ ತೆರಳುತ್ತಿದ್ದಂತೆ ರೈತರ ಮೇಲೆ ಪೊಲೀಸರು ಅಶ್ರುವಾಯು ಪ್ರಯೋಗಿಸಿದರು, ರಸಾಯನಿಕ ಮಿಶ್ರಿತ ಜಲಫಿರಂಗಿ, ರಬ್ಬರ್‌ ಬುಲೆಟ್‌ಗಳನ್ನೂ ಬಳಸಿದರು ಎಂದು ಪಂಧರ್‌ ಆರೋಪಿಸಿದ್ದಾರೆ.

ಇತ್ತ ಕನೌರಿ ಗಡಿಯಲ್ಲಿ ರೈತ ನಾಯಕ ದಲ್ಲೇವಾಲ್‌ ಅವರು ಆಮರಣಾಂತ ಉಪವಾಸ ಕೈಗೊಂಡು ಶನಿವಾರಕ್ಕೆ 19 ದಿನಗಳಾಗಿದ್ದು, ಅವರ ಆರೋಗ್ಯ ಸ್ಥಿತಿ ಬಗ್ಗೆ ಆತಂಕ ಹೆಚ್ಚಾಗಿದೆ.