ವೈದ್ಯರ ಕಿತ್ತಾಟಕ್ಕೆ ತಾಯಿ ಗರ್ಭದಲ್ಲೇ ಕೊನೆಯುಸಿರೆಳೆದ ಕಂದಮ್ಮ!

Team Udayavani, Aug 30, 2017, 11:43 AM IST

ಜೈಪುರ್: ಗರ್ಭಿಣಿ ಮಹಿಳೆಯೊಬ್ಬರನ್ನು ಆಪರೇಶನ್ ಥಿಯೇಟರ್ ನಲ್ಲಿ ಮಲಗಿಸಿ ತುರ್ತು ಸರ್ಜರಿ ಮಾಡುತ್ತಿದ್ದ ವೇಳೆ ಇಬ್ಬರು ವೈದ್ಯರು ಧಮ್ಕಿ ಹಾಕಿಕೊಳ್ಳುತ್ತಾ ಜಗಳಕ್ಕಿಳಿದ ಘಟನೆ ರಾಜಸ್ಥಾನದ ಜೋಧ್ ಪುರ್ ಸರ್ಕಾರಿ ಸ್ವಾಮಿತ್ವದ ಆಸ್ಪತ್ರೆಯಲ್ಲಿ ನಡೆದಿದೆ. ವೈದ್ಯರ ಕಿತ್ತಾಟದ ವಿಡಿಯೋ ವೈರಲ್ ಆಗಿದ್ದರೆ, ಮತ್ತೊಂದೆಡೆ ಕರ್ತವ್ಯ ಮರೆತು ಜಗಳದಲ್ಲಿ ತೊಡಗಿದ್ದ ವೈದ್ಯರ ಬೇಜವಾಬ್ದಾರಿತನದಿಂದಾಗಿ ತಾಯಿಯ ಗರ್ಭದಲ್ಲೇ ಮಗು ಕೊನೆಯುಸಿರೆಳೆದಿದೆ.

ಜೋಧ್ ಪುರ್ ಉಮೈದ್ ಸರ್ಕಾರಿ ಸ್ವಾಮಿತ್ವದ ಆಸ್ಪತ್ರೆಯಲ್ಲಿ ಗರ್ಭಿಣಿಯನ್ನು ಆಪರೇಶನ್ ಥಿಯೇಟರ್ ನ ಬೆಡ್ ಮೇಲೆ ಇಟ್ಟುಕೊಂಡು ಇಬ್ಬರು ವೈದ್ಯರು ಒಬ್ಬರನ್ನೊಬ್ಬರು ದೂಷಿಸಿಕೊಂಡು ಜಗಳವಾಡುತ್ತಿರುವ ದೃಶ್ಯ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.

ಗರ್ಭಿಣಿಗೆ ಆಪರೇಶನ್ ಮಾಡೋದನ್ನು ಬಿಟ್ಟು ಇಬ್ಬರು ವೈದ್ಯರು ಸುಮಾರು 30 ನಿಮಿಷಗಳ ಕಾಲ ವಾಗ್ವಾದದಲ್ಲೇ ತೊಡಗಿದ್ದರು. ಇದರ ಪರಿಣಾಮ ತಾಯಿ ಗರ್ಭದಿಂದ ಹೊರಬಂದು ಕಣ್ಣು ಬಿಡುವ ಮೊದಲೇ ಪುಟ್ಟ ಕಂದಮ್ಮ ಕೊನೆಯುಸಿರೆಳೆದಿದೆ ಎಂದು ಮಾಧ್ಯಮದ ವರದಿ ವಿವರಿಸಿದೆ.

ನವಜಾತ ಶಿಶು ಹುಟ್ಟುವ ಮೊದಲೇ ಸಾವನ್ನಪ್ಪಿರುವ ಘಟನೆ ಬಗ್ಗೆ ತನಿಖೆ ನಡೆಯುತ್ತಿದೆ ಎಂದು ಉಮೈದ್ ಆಸ್ಪತ್ರೆಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಉಮೈದ್ ಆಸ್ಪತ್ರೆಯ ಡಾ.ಅಶೋಕ್ ನಾನಿವಾಲ್ ಹಾಗೂ ಡಾ.ಎಂಎಲ್ ಟಕ್ ಅವರು ಗರ್ಭಿಣಿಯ ಸರ್ಜರಿ ಮಾಡುತ್ತಿದ್ದರು. ಗರ್ಭಿಣಿ ಪ್ರಜ್ಞಾವಸ್ಥೆಯಲ್ಲಿ ಇಲ್ಲದಿರುವ ವೇಳೆ ಇಬ್ಬರು ವೈದ್ಯರು ಜಗಳದಲ್ಲಿ ತೊಡಗಿರುವುದಾಗಿ ವರದಿ ತಿಳಿಸಿದೆ.