ಸೋನಿಯಾಗೆ ಅನಾರೋಗ್ಯ: ಶಿಮ್ಲಾದಿಂದ ದೆಹಲಿಗೆ ವಾಪಸ್‌

Team Udayavani, Mar 24, 2018, 6:00 AM IST

ಶಿಮ್ಲಾ: ಶಿಮ್ಲಾಗೆ ಆಗಮಿಸಿದ್ದ ಯುಪಿಎ ಮುಖ್ಯಸ್ಥೆ ಸೋನಿಯಾ ಗಾಂಧಿ ಅನಾರೋಗ್ಯದಿಂದ ಬಳಲಿದ ಕಾರಣ ಅವರನ್ನು ಮಂಗಳವಾರ ದೆಹಲಿಗೆ ಕರೆತರಲಾಯಿತು. ಇಲ್ಲಿಯ ಛಾರಬ್ರದಲ್ಲಿ ಪ್ರಿಯಾಂಕಾ ಗಾಂಧಿ ವಾದ್ರಾ ನಿರ್ಮಿಸುತ್ತಿರುವ ಮನೆಯನ್ನು ನೋಡಲು ಸೋನಿಯಾ ಬಂದಿದ್ದರು. ರಾತ್ರಿ ಅವರಿಗೆ ತೀವ್ರ ಆಯಾಸ ಹಾಗೂ ಉಸಿರಾಟ ಸಮಸ್ಯೆ ಕಾಣಿಸಿಕೊಂಡಿತು. ಆ್ಯಂಬುಲೆನ್ಸ್‌ ನೀಡಲು ಶಿಮ್ಲಾದ ಆಸ್ಪತ್ರೆಗೆ ಕರೆ ಮಾಡಿದ್ದರು. ಆದರೆ ಆಂಬ್ಯುಲೆನ್ಸ್‌ಗಾಗಿ ಕಾಯದೇ ತಮ್ಮದೇ ಸ್ವಂತ ಕಾರಿನಲ್ಲಿ ಅವರು ಚಂಡೀಗಡಕ್ಕೆ ತೆರಳಿದರು. ಅಲ್ಲಿನ ಹೋಟೆಲ್‌ನಲ್ಲಿ ಸ್ವಲ್ಪ ಹೊತ್ತು ವಿಶ್ರಾಂತಿ ಪಡೆದು, ನಂತರ ದೆಹಲಿಗೆ ತೆರಳಿದರು ಎಂದು ವೈದ್ಯರು ಹೇಳಿದ್ದಾರೆ. ಚಂಡೀಗಡದವರೆಗೂ ಆ್ಯಂಬುಲೆನ್ಸ್‌ ಮತ್ತು ವೈದ್ಯರನ್ನು ಕಳಿಸಲಾಗಿತ್ತು. ಅವರ ಆರೋಗ್ಯ ಸ್ಥಿತಿ ಸ್ಥಿರವಾಗಿದೆ ಎಂದು ಅವರು ಹೇಳಿದ್ದಾರೆ.