ನ್ಯಾ| ಕರ್ಣನ್‌ ಸುದ್ದಿ ಪ್ರಕಟಿಸಿದ ಮಾಧ್ಯಮಗಳ ವಿರುದ್ಧ ಕಿಡಿ

Team Udayavani, Jul 7, 2017, 3:45 AM IST

ಹೊಸದಿಲ್ಲಿ: ನ್ಯಾ| ಸಿ.ಎಸ್‌.ಕರ್ಣನ್‌ ಪ್ರಕರಣದಲ್ಲಿ ಮಾಧ್ಯಮಗಳ ವರ್ತನೆಯನ್ನು ಖಂಡಿಸಿರುವ ಸುಪ್ರೀಂ ಕೋರ್ಟ್‌, ಈ ವಿಷಯದಲ್ಲಿ “ಮಾಧ್ಯಮಗಳು ಬೇಜವಾಬ್ದಾರಿಯಿಂದ ನಡೆದುಕೊಂಡಿವೆ’ ಎನ್ನುವ ಮೂಲಕ ತೀವ್ರ ತರಾಟೆಗೆ ತೆಗೆದುಕೊಂಡಿದೆ.

ಭಾರತದ ನ್ಯಾಯಾಂಗ ವ್ಯವಸ್ಥೆಗೆ ಆಗುತ್ತಿರುವ ಹಾನಿ ಗಮನಿಸುವ ಗೋಜಿಗೆ ಹೋಗದ ಮಾಧ್ಯಮಗಳು, ನ್ಯಾ| ಕರ್ಣನ್‌ ಅಲೆ ಮೇಲೆ ಸವಾರಿ ಮಾಡಿವೆ ಎಂದು ನ್ಯಾಯಾ ಲಯ ಹೇಳಿದೆ. ನ್ಯಾ| ಕರ್ಣನ್‌ರಿಗೆ ಜೈಲು ಶಿಕ್ಷೆ ತೀರ್ಪಿನ ಪ್ರತಿಯಲ್ಲಿ ಸಿಜೆಐ ಜೆ.ಎಸ್‌.ಖೇಹರ್‌ ನೇತೃತ್ವದ 7 ನ್ಯಾಯ ಮೂರ್ತಿಗಳನ್ನೊಳಗೊಂಡ ಪೀಠ, ಭಾರತ ಹಾಗೂ ವಿದೇಶಿ ಮಾಧ್ಯಮಗಳ ನಡೆ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದೆ. ನ್ಯಾ| ಕರ್ಣನ್‌ ಅವರ ಅಕ್ರಮ ಆದೇಶಗಳು ಮತ್ತು ಅಸಂಬದ್ಧ ಹೇಳಿಕೆಗಳಿಂದ ಭಾರತದ ನ್ಯಾಯಾಂಗ ವ್ಯವಸ್ಥೆ ನಗೆಪಾಟಲಿ ಗೀಡಾಗಿದೆ. ಇದರೊಂದಿಗೆ ಭಾರತ ಸೇರಿ ಬಿಬಿಸಿ ರೀತಿಯ ಅಂತಾರಾಷ್ಟ್ರೀಯ ಮಾಧ್ಯಮಗಳು ಕರ್ಣನ್‌ ಹೇಳಿಕೆಗಳು, ಪ್ರಕರಣಕ್ಕೆ ಅಗತ್ಯಕ್ಕಿಂತ ಹೆಚ್ಚು ಪ್ರಚಾರ ನೀಡಿ ನ್ಯಾಯಾಂಗ ವ್ಯವಸ್ಥೆಯನ್ನು ಮುಜುಗರಕ್ಕೀಡುಮಾಡಿವೆ,’ ಎಂದಿದೆ.