Switzerland; ಭಾರತದೊಂದಿಗಿನ ತೆರಿಗೆ ಒಪ್ಪಂದಕ್ಕೆ ಗುಡ್‌ಬೈ!

Team Udayavani, Dec 14, 2024, 6:55 AM IST

ಹೊಸದಿಲ್ಲಿ: ಹೂಡಿಕೆಗಳನ್ನು ಪ್ರೋತ್ಸಾಹಿಸುವ ಸಲುವಾಗಿ ಭಾರತದ ಜತೆ ನಡೆ­ದಿದ್ದ ತೆರಿಗೆ ಒಪ್ಪಂದಗಳನ್ನು ರದ್ದು ಮಾಡಿರುವುದಾಗಿ ಶುಕ್ರವಾರ ಸ್ವಿಟ್ಸರ್‌ಲ್ಯಾಂಡ್‌ ಘೋಷಿಸಿದೆ. ಹೀಗಾಗಿ ಮುಂದಿನ 15 ವರ್ಷಗಳಲ್ಲಿ ಐರೋಪ್ಯ ರಾಷ್ಟ್ರ ಗಳು ಭಾರತದಲ್ಲಿ ಮಾಡಬೇಕಿದ್ದ 8.4 ಲಕ್ಷ ಕೋಟಿ ರೂ. ಹೂಡಿಕೆ ಕೈತಪ್ಪುವ ಸಾಧ್ಯತೆ­ಗಳಿವೆ ಎಂದು ವರದಿಯಾಗಿದೆ. 2 ದೇಶಗಳಲ್ಲೂ ತೆರಿಗೆ ಕಟ್ಟುವುದನ್ನು ತಪ್ಪಿಸುವುದಕ್ಕಾಗಿ ಭಾರತವನ್ನು “ಮೋಸ್ಟ್‌ ಫೇವರ್ಡ್ ದೇಶ’ ಎಂದು ಗುರುತಿಸಿದ್ದ ಸ್ವಿಸ್‌, ತೆರಿಗೆ ತಪ್ಪಿಸುವ ಒಪ್ಪಂದಕ್ಕೆ ಸಹಿ ಹಾಕಿತ್ತು. ಬಳಿಕ ಐರೋಪ್ಯ ಮುಕ್ತ ವ್ಯಾಪಾರ ನೀತಿಯಡಿಯಲ್ಲಿ 4 ದೇಶ­ಹೂಡಿಕೆ ಒಪ್ಪಂದ ಮಾಡಲು ಒಪ್ಪಿದ್ದವು.

ಸುಪ್ರೀಂ ತೀರ್ಪಿನ ಪರಿಣಾಮ: ತೆರಿಗೆ ನೀತಿಗೆ ಸಂಬಂಧಿಸಿಂತೆ ಕಳೆದ ವರ್ಷ ತೀರ್ಪು ಪ್ರಕಟಿಸಿದ್ದ ಸುಪ್ರೀಂಕೋರ್ಟ್‌, ಇದು ಆದಾಯ ತೆರಿಗೆ ಇಲಾಖೆಯ ನಿಯಮಗಳಿಗೆ ಅನುಸಾರವಾಗಿ ಇಲ್ಲದಿ­ರುವ ಕಾರಣ ಸರಕಾರ‌ ಇಂತಹ ನಿರ್ಧಾ­ರಗಳನ್ನು ತೆಗೆದುಕೊಳ್ಳಬಾರದು ಎಂದು ಹೇಳಿತ್ತು. ಹೀಗಾಗಿ ಸ್ವಿಸ್‌ ಕಂಪನಿಗಳಿಗೆ ಭಾರತದಲ್ಲಿ ತೆರಿಗೆ ವಿಧಿಸಲಾಗಿತ್ತು. ಸ್ವಿಸ್‌ನ ನಿರ್ಧಾರ ಜನವರಿಯಿಂದ ಜಾರಿಗೆ ಬರಲಿದ್ದು, ಸ್ವಿಸ್‌ನಲ್ಲಿರುವ ಭಾರತದ ಕಂಪೆನಿಗಳು ಹೆಚ್ಚು ತೆರಿಗೆ ಕಟ್ಟಬೇಕಾದ ಪರಿಸ್ಥಿತಿಗೆ ತುತ್ತಾಗಲಿವೆ.