Congress ಶಿಸ್ತು ಪಾಲಿಸದವರ ವಿರುದ್ಧ ಕ್ರಮ ಕೈಗೊಳ್ಳಿ: ಖರ್ಗೆಗೆ ರಾಹುಲ್‌ ಗಾಂಧಿ ಮನವಿ

Team Udayavani, Dec 1, 2024, 6:32 AM IST

ಹೊಸದಿಲ್ಲಿ: ಮಹಾರಾಷ್ಟ್ರ, ಹರಿಯಾಣ ಚುನಾವ ಣೆಗಳ ಸೋಲಿಗೆ ಪಕ್ಷದಲ್ಲಿನ ಆಂತರಿಕ ಕಚ್ಚಾಟ ಕಾರಣ ಎಂಬ ಅಭಿಪ್ರಾಯ ವ್ಯಕ್ತವಾದ ಬೆನ್ನಲ್ಲೇ, ಶಿಸ್ತು ಪಾಲಿಸದವರ ವಿರುದ್ಧ ಕ್ರಮ ಕೈಗೊಳ್ಳಿ ಎಂದು ರಾಹುಲ್‌ ಗಾಂಧಿ ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆಗೆ ಮನವಿ ಮಾಡಿದ್ದಾರೆ ಎನ್ನಲಾಗಿದೆ. ಶುಕ್ರವಾರ ನಡೆದ ಕಾಂಗ್ರೆಸ್‌ ಕಾರ್ಯಕಾರಿ ಸಮಿತಿ ಸಭೆಯಲ್ಲಿ ಪಕ್ಷದ ನಾಯಕರು ಆಂತರಿಕ ಭಿನ್ನಾಭಿಪ್ರಾಯ ಪರಿಹರಿಸಿಕೊಳ್ಳಬೇಕು, ಪಕ್ಷಕ್ಕೆ ಧಕ್ಕೆ ತರುವ ಘಟನೆಗಳು ನಡೆದರೆ ಅದನ್ನು ಹತ್ತಿಕ್ಕಲು ಕಠಿನ ಕ್ರಮ ಕೈಗೊಳ್ಳಬೇಕಾಗುತ್ತದೆ ಎಂದು ಖರ್ಗೆ ಎಚ್ಚರಿಸಿದ್ದರು. ಇದಕ್ಕೆ ರಾಹುಲ್‌ ಗಾಂಧಿ ಕೂಡ ಸಮ್ಮತಿ ಸೂಚಿಸಿದ್ದಾರೆ ಎನ್ನಲಾಗಿದೆ.

ಡಿ.3ಕ್ಕೆ ಬಂದು ಚರ್ಚಿಸಿ: ಕಾಂಗ್ರೆಸ್‌ಗೆ ಚುನಾವಣ ಆಯೋಗದಿಂದ ಆಹ್ವಾನ
ಹೊಸದಿಲ್ಲಿ: ಮಹಾರಾಷ್ಟ್ರ ಚುನಾವಣೆಯಲ್ಲಿ ಅಕ್ರಮ ನಡೆದಿದೆ ಎಂದು ಕಾಂಗ್ರೆಸ್‌ನ ಆರೋಪಗಳಿಗೆ ಚುನಾವಣ ಆಯೋಗ ಸ್ಪಂದಿಸಿದೆ. ಡಿ.3ರಂದು ಪಕ್ಷದ ನಾಯಕರ ನಿಯೋಗವನ್ನು ಸಮಾಲೋಚನೆಗಾಗಿ ಆಹ್ವಾನಿಸಿದೆ. ಆಗ ಶೇಕಡಾವಾರು ಮತದಾನದಲ್ಲಿ ಹೆಚ್ಚಳ ಸೇರಿದಂತೆ ಪ್ರಮುಖ ಅಂಶಗಳು, ವಿಪಕ್ಷಗಳ ಕಳವಳ ಕುರಿತು ಚರ್ಚಿಸೋಣ ಎಂದಿದೆ. ಇದೇ ವೇಳೆ, ಅಭ್ಯರ್ಥಿಗಳು ಮತ್ತು ಬೂತ್‌ಗಳಲ್ಲಿ ಅವರ ಏಜೆಂಟರ ಜತೆಗೆ ಮತದಾನ ಮತ್ತು ಎಣಿಕೆಯ ಸಂದರ್ಭದಲ್ಲಿ ಪಾರದರ್ಶಕ ವ್ಯವಸ್ಥೆ ಅನುಸರಿಸಲಾಗಿದೆ. ಮತದಾರರ ಪಟ್ಟಿ ಪರಿಷ್ಕರಣೆಯಲ್ಲಿ ಲೋಪ ಉಂಟಾಗಿಲ್ಲ. 5 ಗಂಟೆ ವೇಳೆಗೆ ನೀಡುವ ಮತದಾನದ ಪ್ರಮಾಣ ಮತ್ತು ಅಂತಿಮವಾಗಿ ನೀಡುವ ಪ್ರಮಾಣದಲ್ಲಿ ವ್ಯತ್ಯಾಸಗಳು ಕಂಡು ಬರುವುದು ಸಹಜ ಎಂದೂ ಆಯೋಗ ತಿಳಿಸಿದೆ.