13 ಸಾವಿನ ಬಳಿಕ ಸ್ಟರ್ಲೈಟ್‌ಗೆ ಬೀಗ

Team Udayavani, May 29, 2018, 6:00 AM IST

ಚೆನ್ನೈ: ಪೊಲೀಸರ ಗೋಲಿಬಾರ್‌ನಿಂದ ಹದಿಮೂರು ಮಂದಿ ಪ್ರತಿಭಟನಾಕಾರರು ಅಸುನೀಗಿದ ಬಳಿಕ ತಮಿಳು ನಾಡು ಸರಕಾರ ತೂತುಕುಡಿಯ ವೇದಾಂತ ಕಂಪನಿಯ ಸ್ಟರ್ಲೈಟ್‌ ತಾಮ್ರ ಉತ್ಪಾದನಾ ಘಟಕವನ್ನು ಶಾಶ್ವತವಾಗಿ ಮುಚ್ಚಲು ನಿರ್ಧರಿಸಿದೆ. ಈ ಬಗ್ಗೆ ತಮಿಳುನಾಡು ಪರಿಸರ ಮಾಲಿನ್ಯ ನಿಯಂತ್ರಣ ಮಂಡಳಿ(ಟಿಎನ್‌ಪಿಸಿಬಿ)ಗೆ ಆದೇಶ ನೀಡಲಾಗಿದೆ. “ಘಟಕವನ್ನು ಶಾಶ್ವತವಾಗಿ ಮುಚ್ಚಿ ಬೀಗ ಮುದ್ರೆ ಹಾಕಬೇಕು’ ಎಂದು ಆದೇಶದಲ್ಲಿ ತಿಳಿಸಲಾಗಿದೆ.

ಜನರ ಆಕ್ರೋಶ, ಅಭಿಪ್ರಾಯಗಳಿಗೆ ಮನ್ನಣೆ ನೀಡಿ ಈ  ನಿರ್ಧಾರಕ್ಕೆ ಬರಲಾಗಿದೆ ಎಂದು ಸೋಮವಾರ ಬಿಡುಗಡೆ ಮಾಡಲಾಗಿರುವ ಸರ್ಕಾರಿ ಆದೇಶದಲ್ಲಿ ಉಲ್ಲೇಖೀಸಲಾಗಿದೆ. ಕಳೆದ ಕೆಲವು ದಿನಗಳಿಂದ ತಾಮ್ರ ಉತ್ಪಾದನಾ ಘಟಕದ ವಿರುದ್ಧ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ ಎಂದು ಹೇಳಿರುವ ಸಿಎಂ ಕೆ.ಪಳನಿಸ್ವಾಮಿ, ಸ್ಥಾವರಕ್ಕೆ ನೀರು ಮತ್ತು ವಿದ್ಯುತ್‌ ಪೂರೈಕೆ ಸ್ಥಗಿತಗೊಳಿಸುವ ಬಗ್ಗೆ ಈಗಾ ಗಲೇ ಕ್ರಮ ಕೈಗೊಳ್ಳಲಾಗಿದೆ ಎಂದು ಹೇಳಿದ್ದಾರೆ.

99 ದಿನಗಳಿಂದ ತೂತುಕುಡಿಯ ನಿವಾಸಿಗಳು ಸ್ಥಳೀಯ ಜಲಮೂಲವನ್ನು ಮಲಿನ ಮಾಡುತ್ತಿರುವ ಸ್ಟಲೈìಟ್‌ ತಾಮ್ರ ಘಟಕ ಮುಚ್ಚಬೇಕು ಎಂದು ಪ್ರತಿಭಟನೆ ನಡೆಸುತ್ತಿದ್ದರು. 100ನೇ ದಿನವಾಗಿದ್ದ ಮೇ 22ರಂದು ಅದು ಹಿಂಸಾ ಸ್ವರೂಪ ಪಡೆದು, ಪೊಲೀಸರು ಗೋಲಿಬಾರ್‌ ನಡೆಸಿದ್ದರಿಂದ 13 ಮಂದಿ ಸಾವಿಗೀಡಾಗಿದ್ದರು.