ಲಾಲು 165 ಕೋಟಿ ಆಸ್ತಿ ಜಪ್ತಿಗೆ ಕೊನೇ ನೋಟಿಸ್‌

Team Udayavani, Sep 12, 2017, 8:40 AM IST

ಹೊಸದಿಲ್ಲಿ: ಆರ್‌ಜೆಡಿ ನಾಯಕ ಲಾಲು ಪ್ರಸಾದ್‌ ಯಾದವ್‌ಗೆ ಸೋಮವಾರ ಭಾರಿ ಹಿನ್ನಡೆಯಾಗಿದೆ. ನವ ದೆಹಲಿ ಮತ್ತು ಪಾಟ್ನಾಗಳಲ್ಲಿ ಅವರ ಕುಟುಂಬಕ್ಕೆ ಸೇರಿದ್ದು ಎಂದು ಹೇಳಲಾಗಿರುವ 165 ಕೋಟಿ ರೂ. ಮೌಲ್ಯದ ಆಸ್ತಿ ಗಳನ್ನು ಮುಟ್ಟುಗೋಲು ಹಾಕಿಕೊಳ್ಳುವ ಬಗ್ಗೆ ಆದಾಯ ತೆರಿಗೆ ಇಲಾಖೆ ಅಂತಿಮ ನೋಟಿಸ್‌ ನೀಡಿದೆ. ದಕ್ಷಿಣ ದೆಹಲಿಯ ನ್ಯೂಫ್ರೆಂಡ್ಸ್‌ ಕಾಲೊನಿಯಲ್ಲಿರುವ ಜಮೀನು, ಎ.ಬಿ.ಎಕ್ಸ್‌ಪೋರ್ಟ್ಸ್ ಪ್ರೈ. ಲಿ. ಸೇರಿದಂತೆ ಹಲವು ಆಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಳ್ಳುವ ಬಗ್ಗೆ ಪ್ರಕ್ರಿಯೆ ನಡೆದಿದೆ. 

ಪಾಟ್ನಾ ನಗರದ ಸುತ್ತಮುತ್ತಲಿರುವ ಹಲವು ಜಮೀನು, ಈ ಪೈಕಿ ನಗರದ ಪ್ರಮುಖ ಕೇಂದ್ರದಲ್ಲಿ 3.5 ಎಕರೆ ಪ್ರದೇಶದಲ್ಲಿ ಹರಡಿಕೊಂಡಿರುವ ಮಾಲ್‌ ಕೂಡ ಸೇರಿದೆ. ಅದರಿಂದಾಗಿಯೇ ಲಾಲು ಯಾದವ್‌ ಕುಟುಂಬದ ಐವರು ಸದಸ್ಯರ ವಿರುದ್ಧ ಅಕ್ರಮ ಆಸ್ತಿ ಸಂಪಾದನೆಯ ಆರೋಪಗಳು ಕೇಳಲಾರಂಭಿಸಿದ್ದವು. ಲಾಲು ಪತ್ನಿ ರಾಬಿx ದೇವಿ, ಪುತ್ರ ತೇಜಸ್ವಿ ಯಾದವ್‌, ಸಂಸದೆ ಮಿಸ್ಸಾ ಭಾರತಿ, ಅವರ ಪತಿ ವಿರುದ್ಧ ಐ.ಟಿ. ಅಧಿಕಾರಿಗಳು ಕೇಸು ದಾಖಲಿಸಿದ್ದಾರೆ.