2023ರಲ್ಲಿ ಇನ್ಫೋಸಿಸ್‌, ಟಿಸಿಎಸ್‌ನಿಂದ 90,000 ಮಂದಿಗೆ ಉದ್ಯೋಗ

Team Udayavani, Jul 8, 2022, 6:30 AM IST

ನವದೆಹಲಿ: ದೇಶದ ಬೃಹತ್‌ ತಾಂತ್ರಿಕ ದೈತ್ಯ ಸಂಸ್ಥೆಗಳಾದ ಇನ್ಫೋಸಿಸ್‌ ಮತ್ತು ಟಿಸಿಎಸ್‌ಗಳು 2023ರ ವಿತ್ತೀಯ ವರ್ಷದಲ್ಲಿ 90,000 ಹೊಸಬರಿಗೆ ಉದ್ಯೋಗ ನೀಡುವ ಲೆಕ್ಕಾಚಾರದಲ್ಲಿವೆ.

ಪ್ರತೀ ವರ್ಷ ಲಕ್ಷಾಂತರ ಸಂಖ್ಯೆಯಲ್ಲಿ ಐಟಿ ಕಾಲೇಜುಗಳಲ್ಲಿ ಪದವಿ ಮುಗಿಸಿಕೊಂಡು ವಿದ್ಯಾರ್ಥಿಗಳು ಹೊರಬರುತ್ತಾರೆ. ಅಂತಹವರನ್ನು ಕ್ಯಾಂಪಸ್‌ಗಳಲ್ಲೇ ನೇರವಾಗಿ ಆಯ್ಕೆ ಮಾಡುವ ಉದ್ದೇಶ ಹೊಂದಿವೆ. ಇನ್ಫೋಸಿಸ್‌ಗೆ 50,000 ವ್ಯಕ್ತಿಗಳನ್ನು ಉದ್ಯೋಗಕ್ಕೆ ತೆಗೆದುಕೊಳ್ಳುವ ಗುರಿಯಿದ್ದರೆ, ಟಿಸಿಎಸ್‌ 40,000 ಹೊಸಬರಿಗೆ ಕೆಲಸ ಕೊಡುವ ನಿರೀಕ್ಷೆಯಿದೆ.

2021ರ ವಿತ್ತೀಯ ವರ್ಷದಲ್ಲಿ ಈ ಎರಡೂ ಕಂಪನಿಗಳು ಸೇರಿ 61,000 ಹೊಸಬರಿಗೆ ಉದ್ಯೋಗ ನೀಡಿದ್ದವು. 2021-22ರ ವಿತ್ತೀಯ ವರ್ಷದಲ್ಲಿ ಇನ್ಫೋಸಿಸ್‌ ಭಾರತ-ವಿಶ್ವಾದ್ಯಂತ 85,000 ಹೊಸಬರಿಗೆ ಕೆಲಸ ನೀಡಿತ್ತು. ಇನ್ನು ಟಿಸಿಎಸ್‌ ಸದ್ಯದಲ್ಲೇ ಶೇ.25 ಉದ್ಯೋಗಿಗಳನ್ನು ಮರಳಿ ಕಚೇರಿಗೆ ಕರೆಸಿಕೊಳ್ಳುವ  ಸಾಧ್ಯತೆಯಿದೆ. ಬಹುತೇಕ ಐಟಿ ಕಂಪನಿಗಳು ಉದ್ಯೋಗಿಗಳನ್ನು ಮರಳಿ ಕಚೇರಿಗೆ ಕರೆಸಿಕೊಳ್ಳುತ್ತಿವೆ.

ವಿಶೇಷವೆಂದರೆ ಇನ್ಫೋಸಿಸ್‌ನಲ್ಲಿ ಕೆಲಸ ಬಿಡುವವರ ಸಂಖ್ಯೆ ಮಾರ್ಚ್‌ ವೇಳೆ ಶೇ.25.5ರಿಂದ ಶೇ.27.7ಕ್ಕೇರಿತ್ತು. ಇದರ ನಡುವೆಯೇ ಅದು ಕೆಲಸ ನೀಡುವ ಪ್ರಮಾಣವನ್ನೂ ಹೆಚ್ಚಿಸಿದೆ. ಹಾಗೆಯೇ ಮನೆಯಿಂದಲೇ ಕೆಲಸ ಮಾಡುವುದನ್ನೂ ಮುಂದುವರಿಸಲಿದೆ.