ತಾಯಿಗೆ ಪರೀಕ್ಷೆ; ಶಿಶುವಿಗೆ ಖಾಕಿ ರಕ್ಷೆ

Team Udayavani, Oct 1, 2018, 8:10 AM IST

ಹೈದರಾಬಾದ್‌: ಸಾಮಾನ್ಯವಾಗಿ ಪೊಲೀಸರು ಕಠಿಣ ಹೃದಯಿಗಳಾಗಿರುತ್ತಾರೆ ಎನ್ನುವ ಅಭಿಪ್ರಾಯ ಕೆಲವರಲ್ಲಿದೆ. ಆದರೆ ತೆಲಂಗಾಣದ ಮೆಹಬೂಬ್‌ನಗರದಲ್ಲಿ ಪೊಲೀಸ್‌ ಕಾನ್‌ ಸ್ಟೇಬಲ್‌ ವೊಬ್ಬರ ಕೆಲಸ ಆ ಅಭಿಪ್ರಾಯವನ್ನು ಬದಲಾಯಿಸಿದೆ. ಇತ್ತೀಚೆಗೆ ತೆಲಂಗಾಣ ಸರಕಾರ ನಡೆಸುವ ಸ್ಪರ್ಧಾತ್ಮಕ ಪರೀಕ್ಷೆ ಬರೆಯುವುದಕ್ಕಾಗಿ ತಾಯಿಯೊಬ್ಬರು ತನ್ನ ಶಿಶುವಿನೊಂದಿಗೆ ಮೆಹಬೂಬ್‌ನಗರಕ್ಕೆ ಬಂದಿದ್ದರು. 

ಪರೀಕ್ಷಾ ಕೇಂದ್ರದೊಳಕ್ಕೆ ಶಿಶುವನ್ನು ಕರೆದೊಯ್ಯಲು ಅವಕಾಶ ಇಲ್ಲದ ಕಾರಣ, ಮೂಸಾಪೇಟೆ ಠಾಣೆಯ ಹೆಡ್‌ ಕಾನ್‌ ಸ್ಟೇಬಲ್‌ ಮುಜೀಬುರ್‌ ರೆಹಮಾನ್‌ ಅವರು, ಆ ಮಗುವನ್ನು ತಾವೇ ಎತ್ತಿಕೊಂಡು, ತಾಯಿಯನ್ನು ಪರೀಕ್ಷಾ ಕೇಂದ್ರದೊಳಕ್ಕೆ ಕಳುಹಿಸಿದರು. ಮಹಿಳೆಯು ನಿಶ್ಚಿಂತೆಯಿಂದ ಪರೀಕ್ಷೆ ಬರೆದು ಮುಗಿಸಿ ಬರುವವರೆಗೂ, ರೆಹಮಾನ್‌ ಅವರು ಮಗುವನ್ನು ಎತ್ತಿಕೊಂಡು, ಅದರ ಆರೈಕೆ ಮಾಡಿದ್ದಾರೆ.

ಅವರ ಫೋಟೋವನ್ನು ಕಾಲೇಜು ವಿದ್ಯಾರ್ಥಿಗಳು ಕ್ಲಿಕ್ಕಿಸಿದ್ದು, ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ರೇಮ ರಾಜೇಶ್ವರಿ ಈ ಫೋಟೋವನ್ನು ‘ಪರೀಕ್ಷೆ ಬರೆಯುವ ತಾಯಿ ಬರುವವರೆಗೆ ಅಳುವ ಮಗುವನ್ನು ಸಂತೈಸುತ್ತಿರುವುದು’ ಎಂಬ ಶಿರೋನಾಮೆ ಹಾಕಿ ಟ್ವೀಟ್‌ ಮಾಡಿದ್ದರು. ಅದು ಈಗ ವೈರಲ್‌ ಆಗಿದ್ದು, ರೆಹಮಾನ್‌ರ ಕೆಲಸ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ.