ಜಾತ್ಯತೀತ ಪಕ್ಷದಿಂದ ದೇಗುಲ ಪ್ರವಾಸ!

Team Udayavani, Dec 5, 2017, 7:52 AM IST

ಧರ್ಮಪುರ: ಗುಜರಾತ್‌ ಚುನಾವಣೆ ಹಿನ್ನೆಲೆಯಲ್ಲಿ ಧರ್ಮಪುರ ಹಾಗೂ ರಾಜ್‌ಕೋಟ್‌ನಲ್ಲಿ ಪ್ರಧಾನಿ ನರೇಂದ್ರ ಮೋದಿ ಸೋಮವಾರ ರ್ಯಾಲಿ ನಡೆಸಿದ್ದು, ಕಾಂಗ್ರೆಸ್‌ ವಿರುದ್ಧ ಕಿಡಿಕಾರಿದ್ದಾರೆ. ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿ ಪದೇ ಪದೆ ದೇಗುಲಕ್ಕೆ ಭೇಟಿ ನೀಡುತ್ತಿರುವುದನ್ನು ಪರೋಕ್ಷವಾಗಿ ಉಲ್ಲೇಖೀಸಿದ ಮೋದಿ, ಈಗ ಜಾತ್ಯತೀತ ಎಂದು ಹೇಳಿಕೊಳ್ಳುತ್ತಿದ್ದ ಪಕ್ಷಕ್ಕೆ ಏನಾಗಿದೆ? ಈ ಹಿಂದೆ ಜಾತ್ಯತೀತ ಅಂತ ಹೇಳಿಕೊಳ್ಳಲು ಪೈಪೋಟಿ ನಡೆಯು ತ್ತಿತ್ತು. ಒಬ್ಬ ವ್ಯಕ್ತಿ ಒಂದು ಕೆಜಿ ಜಾತ್ಯ ತೀತ ತಾನು ಎಂದು ಹೇಳಿಕೊಂಡರೆ ಇನ್ನೊ ಬ್ಬ ನಾನು ಎರಡು ಕೆಜಿ ಜಾತ್ಯತೀತ ಎಂದು ಹೇಳಿಕೊಳ್ಳುತ್ತಿದ್ದ. ಆದರೆ ಈ ಬಾರಿ ಗುಜರಾತ್‌ ಚುನಾವಣೆ ವೇಳೆ ಪೈಪೋಟಿ ಎಲ್ಲಿ ಹೋಯಿತು? 70 ವರ್ಷಗಳ ನಂತರವಾದರೂ ಅವರು ಎಲ್ಲಿಗೆ ಹೋಗುತ್ತಿದ್ದಾರೆ ಎಂದು ಜನರನ್ನು ಮೋದಿ ಕೇಳುತ್ತಿದ್ದಂತೆಯೇ, ಸೇರಿದ್ದ ಜನಸಮೂಹ ದೇವಸ್ಥಾನ ಎಂದು ಕೂಗಿದರು. ಗುಜರಾತ್‌ ಜನರು ಮೂರ್ಖರಲ್ಲ. ದೇವಸ್ಥಾನಕ್ಕೆ ಹೋಗಿ ಹಿಂದು ಮತಗಳನ್ನು ಕೇಳುತ್ತಿರುವುದು ಜನರಿಗೆ ತಿಳಿಯುತ್ತದೆ.

ಬಿಜೆಪಿ ಮುಸ್ಲಿಂ ವಿರೋಧಿ ಎಂದು ಮೊದಲು ಕಾಂಗ್ರೆಸ್‌ ಆರೋಪಿಸುತ್ತಿತ್ತು. ಆದರೆ ಈ ಬಾರಿಯ ಚುನಾವಣೆಯಲ್ಲಿ ಕಾಂಗ್ರಸ್‌ ಮುಖಂಡರು ಬಿಜೆಪಿ ಮುಸ್ಲಿಂ ವಿರೋಧಿ ಎಂದು ಆರೋಪ ಮಾಡುತ್ತಿಲ್ಲ. ಹೀಗಾಗಿ  ಬಿಜೆಪಿ ಮುಸ್ಲಿಂ ವಿರೋಧಿ ಪಕ್ಷವಲ್ಲ ಎಂದು ಕಾಂಗ್ರೆಸ್‌ ಕೊನೆಗೂ ಒಪ್ಪಿಕೊಂಡಂತಾಗಿದೆ. ಬಿಜೆಪಿ ವಿರುದ್ಧ ಮಾಡುತ್ತಿದ್ದದ್ದು ಹುಸಿ ಆರೋಪ ಎಂದು ಅವರಿಗೆ ಮನವರಿಕೆಯಾಗಿದೆ. ಕೇವಲ ಮತಬ್ಯಾಂಕ್‌ಗಾಗಿಯೇ ಈ ಆರೋಪ ಮಾಡಲಾಗುತ್ತಿತ್ತು ಎಂದು ಮೋದಿ ಟೀಕಿಸಿದ್ದಾರೆ.

ಡಿ. 8, 9ರಂದು ಪತ್ರಿಕೆಗೆ ಜಾಹೀರಾತು ನೀಡುವಂತಿಲ್ಲ
ಮೊದಲ ಹಂತದ ಮತದಾನ ನಡೆಯುವ ದಿನ ಡಿ.9 ಹಾಗೂ ಹಿಂದಿನ ದಿನ ಡಿ.8ರಂದು ಯಾವುದೇ ಪಕ್ಷ ಅಥವಾ ಅಭ್ಯರ್ಥಿಗಳು ದಿನಪತ್ರಿಕೆಗಳಲ್ಲಿ ಜಾಹೀರಾತು ನೀಡುವಂತಿಲ್ಲ ಎಂದು ಚುನಾವಣಾ ಆಯೋಗ ಸೂಚಿಸಿದೆ. ಈಗಾಗಲೇ ಪ್ರಮಾಣಪತ್ರ ಪಡೆದಿದ್ದರೆ ಮಾತ್ರ ಪ್ರಕಟಿಸಬಹುದು. ಈ ಹಿಂದೆ ಇಂತಹ ಕೃತ್ಯಗಳನ್ನು ನಾವು ಗಮನಿಸಿದ್ದೇವೆ. ಹೀಗಾಗಿ ಈ ಆದೇಶ ಹೊರಡಿಸಲಾಗಿದೆ ಎಂದು ಚುನಾವಣಾ ಆಯೋಗ ಪ್ರಕಟಣೆಯಲ್ಲಿ ತಿಳಿಸಿದೆ.

ನಿತ್ಯ ಗುಜರಾತ್‌ಗೆ ತೆರಳುತ್ತಿರುವುದೇಕೆ?
ಗುಜರಾತ್‌ನಲ್ಲಿ ಅಭಿವೃದ್ಧಿ ಮಾಡಿದ್ದೇವೆ ಎಂದು ಬಿಜೆಪಿ ಹೇಳಿಕೊಂಡಿದ್ದು ನಿಜವಾದರೆ, ಯಾಕೆ ಪ್ರತಿದಿನವೂ ಗುಜರಾತ್‌ನಲ್ಲಿ ಚುನಾವಣಾ ಪ್ರಚಾರಕ್ಕೆ ಪ್ರಧಾನಿ ನರೇಂದ್ರ ಮೋದಿ ಓಡುತ್ತಿದ್ದಾರೆ ಎಂದು ದೆಹಲಿ ಮಾಜಿ ಸಿಎಂ ಶೀಲಾ ದೀಕ್ಷಿತ್‌ ಪ್ರಶ್ನಿಸಿದ್ದಾರೆ. ಜನರು ಬದಲಾವಣೆ ಬೇಕು ಎಂದು ಭಾವಿಸಿರುವುದು ಬಿಜೆಪಿಗೆ ತಿಳಿದಿದೆ. ಇದೇ ಕಾರಣಕ್ಕೆ ರಾಜ್ಯಕ್ಕೆ ಪದೇ ಪದೆ ಮೋದಿ ಆಗಮಿಸುತ್ತಿದ್ದಾರೆ ಎಂದು ಅವರು ಹೇಳಿದ್ದಾರೆ.