ವಾಹನ ಕಳವಾದರೆ ಹೊಟೇಲೇ ಜವಾಬ್ದಾರಿ

Team Udayavani, Feb 7, 2018, 8:50 AM IST

ಹೊಸದಿಲ್ಲಿ: ಹೊಟೇಲ್‌ನ ಪಾರ್ಕಿಂಗ್‌ ಪ್ರದೇಶದಲ್ಲೇ ವಾಹನ ನಿಲ್ಲಿಸಿಯೂ, ಅದು ಕಳವಾದರೆ ಅದಕ್ಕೆ ಹೊಟೇಲ್‌ ಆಡಳಿತವೇ ಹೊಣೆ. ಆಡಳಿತವು ತನ್ನ ಹೊಣೆಗಾರಿಕೆಯಿಂದ ನುಣುಚಿಕೊಳ್ಳುವಂತಿಲ್ಲ ಎಂದು ರಾಷ್ಟ್ರೀಯ ಗ್ರಾಹಕ ಆಯೋಗ ಹೇಳಿದೆ. 

1998ರಲ್ಲಿ ದಿಲ್ಲಿಯ ತಾಜ್‌ ಮಾನ್‌ಸಿಂಗ್‌ ಹೋಟೆಲ್‌ನ ಪಾರ್ಕಿಂಗ್‌ ಸ್ಥಳದಲ್ಲಿ ನಿಲ್ಲಿಸಲಾಗಿದ್ದ ಮಾರುತಿ ಜೆನ್‌ ಕಾರು ಕಳುವಾಗಿದ್ದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸೋಮವಾರ ಎಂ. ಶ್ರೀಶಾ ನೇತೃತ್ವದ ಏಕಸದಸ್ಯ ನ್ಯಾಯಪೀಠ ಈ ತೀರ್ಪು ನೀಡಿದೆ. ಸಪನ್‌ ಧವನ್‌ ಎಂಬವರು ಪಾರ್ಕಿಂಗ್‌ನಲ್ಲಿ ಕಾರು ನಿಲ್ಲಿಸಿ ಹೊಟೇಲ್‌ಗೆ ತೆರಳಿದ್ದ ವೇಳೆ ಕಾರು ಕಳವಾಗಿತ್ತು.

ಕಾರಿನ ಕೀಯನ್ನು ಪಾರ್ಕಿಂಗ್‌ ಸೆಕ್ಯೂರಿಟಿ ಬಳಿ ಕೊಟ್ಟು ಹೋಗಿದ್ದರು. 2 ಗಂಟೆ ಬಿಟ್ಟು ಬಂದಾಗ ಕಾರು ಇರಲಿಲ್ಲ. ಹೊಟೇಲ್‌ ಆಡಳಿತ ಮಂಡಳಿ, ಕಾರು ಪಾರ್ಕ್‌ ಮಾಡಿದ್ದಲ್ಲಿ, ಯಾವುದೇ ಹಾನಿಯಾದರೂ ಮಾಲಕರೇ ಹೊಣೆಗಾರರೆಂದು ಫ‌ಲಕ ಹಾಕಿದ್ದೆವು. ನಮ್ಮಿಂದ ಲೋಪ ಆಗಿಲ್ಲ ಎಂದು ವಾದಿಸಿತ್ತು. ಆದರೆ, ಗ್ರಾಹಕ ಆಯೋಗವು ಹೊಟೇಲ್‌ ವಾದ ತಳ್ಳಿಹಾಕಿ, ದಂಡವನ್ನೂ ವಿಧಿಸಿದೆ.