ನಾಗಾಲ್ಯಾಂಡ್‌ನ‌ಲ್ಲಿ ಮತ್ತೆ ತಲೆದೋರಿದ ಅಸ್ಥಿರತೆ 

Team Udayavani, Jul 10, 2017, 3:50 AM IST

ಹೊಸದಿಲ್ಲಿ: ನಾಗಾಲ್ಯಾಂಡ್‌ನ‌ಲ್ಲಿ ಆಡಳಿತಾರೂಢ ನಾಗಾ ಪೀಪಲ್ಸ್‌ ಫ್ರಂಟ್‌(ಎನ್‌ಪಿಎಫ್) ಆಂತರಿಕ ಬಿಕ್ಕಟ್ಟು ಬಿಗಡಾಯಿಸಿದೆ. ಭಾನುವಾರ ನಾಗಾಲ್ಯಾಂಡ್‌ ಸಿಎಂ ಶುರ್‌ಹೊಜೆಲಿ ಲೆಜಿಟ್ಸು ಅವರು ತಮ್ಮ 10 ಮಂದಿ ಸಂಸದೀಯ ಕಾರ್ಯದರ್ಶಿಗಳನ್ನು ಹುದ್ದೆಯಿಂದ ವಜಾ ಮಾಡಿದ್ದಾರೆ.

ಹೊಸ ಸರಕಾರ ರಚಿಸಲು ಅವಕಾಶ ಕಲ್ಪಿಸಿ ಎಂದು ಮಾಜಿ ಸಿಎಂ ಟಿ.ಆರ್‌. ಝೆಲಿಯಾಂಗ್‌ ಅವರು ರಾಜ್ಯಪಾಲ ಪಿ.ಬಿ. ಆಚಾರ್ಯ ಅವರಿಗೆ ಪತ್ರ ಬರೆದ ಬೆನ್ನಲ್ಲೇ ಈ ಬೆಳವಣಿಗೆ ನಡೆದಿದೆ. ಶನಿವಾರವಷ್ಟೇ ರಾಜ್ಯಪಾಲರಿಗೆ ಪತ್ರ ಬರೆದಿದ್ದ ಝೆಲಿಯಾಂಗ್‌, ತಮಗೆ 33 ಮಂದಿ ಎನ್‌ಪಿಎಫ್ ಶಾಸಕರು ಮತ್ತು 7 ಮಂದಿ ಪಕ್ಷೇತರ ಶಾಸಕರ ಬೆಂಬಲವಿದೆ ಎಂದಿದ್ದರು. ಇದೀಗ ನಾಗಾ ಸಿಎಂ ವಜಾ ಮಾಡಿದ ಸಂಸದೀಯ ಕಾರ್ಯದರ್ಶಿಗಳ ಪೈಕಿ ರಾಜ್ಯದ ಗೃಹ ಸಚಿವ, ವಿದ್ಯುತ್‌ ಸಚಿವ, ಹೆದ್ದಾರಿ ಸಚಿವರೂ ಸೇರಿದ್ದಾರೆ.

ಝೆಲಿಯಾಂಗ್‌ ಸದ್ಯ 41 ಮಂದಿ ಶಾಸಕರೊಂದಿಗೆ ರೆಸಾರ್ಟ್‌ ರಾಜಕಾರಣ ಆರಂಭಿಸಿದ್ದಾರೆ. ಮೀಸಲಾತಿ ಕುರಿತ ಗಲಾಟೆ ಹಿನ್ನೆಲೆ ಫೆ.22ರಂದು ಝೆಲಿಯಾಂಗ್‌ ಅವರು ಸಿಎಂ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು.