ಸಿಗ್ನಲ್‌ನಲ್ಲಿ ಭಿಕ್ಷೆ ನೀಡಿದ್ರೂ ಖರೀದಿ ಮಾಡಿದ್ರೂ ದಂಡ

Team Udayavani, Jan 30, 2018, 6:00 AM IST

ಹೊಸದಿಲ್ಲಿ: ಟ್ರಾಫಿಕ್‌ ಜಂಕ್ಷನ್‌ನಲ್ಲೋ, ಸಿಗ್ನಲ್‌ನಲ್ಲೋ ನಿಂತಿದ್ದಾಗ ಭಿಕ್ಷುಕ ಬಂದು, ನಿಮ್ಮ ಕಾರಿನ ಕಿಟಕಿ ಬಡಿದಾಗ, ಅಯ್ಯೋ ಪಾಪ ಎಂದೆನಿಸಿ ಭಿಕ್ಷೆ ಹಾಕುತ್ತೀರಾ? ನಮ್ಮದೇ ಖಾಸಗಿ ಕಾರಲ್ವ, ಹಿಂಬದಿ ಸೀಟಲ್ಲಿ ಕೂರುವ ಮಕ್ಕಳಿಗೂ ಖುಷಿಯಾಗಲಿ ಎಂದು ಡಿವಿಡಿ ಸ್ಕ್ರೀನ್‌ ಅಳವಡಿಸುತ್ತೀರಾ? ಮೋಟಾರು ವಾಹನಗಳ ಕಾಯ್ದೆ ಪ್ರಕಾರ ಇದು ಸಂಚಾರ ನಿಯಮಗಳ ಉಲ್ಲಂಘನೆ ಯಾದೀತು. ನೀವು ಮಾಡಿದ ಈ ತಪ್ಪಿಗೆ ದಂಡವನ್ನೂ ತೆರಬೇಕಾದೀತು.

ಇಷ್ಟು  ಮಾತ್ರವಲ್ಲ, ಅಪಘಾತವಾದಲ್ಲಿ ಕಾರು ಮತ್ತಿತರ ವಾಹನಗಳಿಗೆ ರಕ್ಷಣೆಗಾಗಿ ಹಾಕುವ ಕ್ರ್ಯಾಶ್‌ ಗಾರ್ಡ್‌ ಮತ್ತು ಬುಲ್‌ ಗಾರ್ಡ್‌ ಅಳವಡಿಕೆ  ವಿರುದ್ಧವೂ ಕ್ರಮ ಕೈಗೊಳ್ಳಲು ಅವಕಾಶ ಉಂಟು. ನಿಯಮ ಪ್ರಕಾರ, ಅದಕ್ಕೂ 1 ಸಾವಿರ ರೂ. ವರೆಗೆ ದಂಡ ವಿಧಿಸಲಾಗುತ್ತದೆ.

2015ರಲ್ಲಿ ದಿಲ್ಲಿಯಲ್ಲಿ ನಿಷೇಧಿತ ಪ್ರದೇಶಗಳಲ್ಲಿ ಹಾರನ್‌ ಮಾಡಬಾರದು ಎಂಬ ನಿಯಮ ಏಕಾಏಕಿ ಅನುಷ್ಠಾನ ಮಾಡ ಲಾಯಿತು. ಕೂಡಲೇ ಅದನ್ನು ಜಾರಿ ಮಾಡಿದ್ದರಿಂದ 14,391 ಮಂದಿ ವಿರುದ್ಧ ಕ್ರಮ ಕೈಗೊಳ್ಳಲಾಗಿತ್ತು.