ಬ್ರಹ್ಮೋಸ್‌ ಖರೀದಿಗೆ ಫಿಲಿಪ್ಪೀನ್ಸ್‌ ಒಲವು

Team Udayavani, Nov 13, 2020, 12:44 AM IST

ನವದೆಹಲಿ: ಭಾರತ ಮತ್ತು ರಷ್ಯಾ ಜಂಟಿಯಾಗಿ ಅಭಿವೃದ್ಧಿಪಡಿಸಿರುವ ಬ್ರಹ್ಮೋಸ್‌ ಕ್ಷಿಪಣಿ ವ್ಯವಸ್ಥೆಯ ಖರೀದಿಗೆ ದ್ವೀಪರಾಷ್ಟ್ರ ಫಿಲಿಪ್ಪೀನ್ಸ್‌ ಆಸಕ್ತಿ ತೋರಿಸಿದೆ. ಈ ನಿಟ್ಟಿನಲ್ಲಿ ಮುಂದಿನ ವರ್ಷ ಪ್ರಧಾನಿ ನರೇಂದ್ರ ಮೋದಿ ಮತ್ತು ಫಿಲಿಪ್ಪೀನ್‌ ಅಧ್ಯಕ್ಷ ರೊಡ್ರಿಗೋ ಡ್ಯುಟರ್ಟೆ ನಡುವೆ ನಡೆಯಲಿರುವ ಸಭೆಯಲ್ಲಿ ಒಪ್ಪಂದವಾಗುವ ನಿರೀಕ್ಷೆಯಿದೆ. ಒಪ್ಪಂದಕ್ಕೆ ಸಹಿಬಿದ್ದರೆ ಬ್ರಹ್ಮೋಸ್‌ ರಕ್ಷಣಾ ವ್ಯವಸ್ಥೆಯನ್ನು ಖರೀದಿಸಲಿರುವ ಮೊದಲ ರಾಷ್ಟ್ರವಾಗಲಿದೆ ಫಿಲಿಪ್ಪೀನ್ಸ್‌. ಈಗಾಗಲೇ ಅನೇಕ ಆಗ್ನೇಯ ಏಷ್ಯನ್‌ ರಾಷ್ಟ್ರಗಳು ಬ್ರಹ್ಮೋಸ್‌ ಕ್ಷಿಪಣಿ ಖರೀದಿಗೆ ಆಸಕ್ತಿ ತೋರಿವೆ.

ಈ ಹಿನ್ನೆಲೆಯಲ್ಲಿ ಬ್ರಹ್ಮೋಸ್‌ ಏರೋಸ್ಪೇಸ್‌ನ ತಂಡವೊಂದು ಡಿಸೆಂಬರ್‌ ತಿಂಗಳಲ್ಲಿ ಫಿಲಿಪ್ಪೀನ್ಸ್‌ ರಾಜಧಾನಿ ಮನಿಲಾಕ್ಕೆ ಭೇಟಿ ನೀಡಲಿದ್ದು, ಒಪ್ಪಂದಕ್ಕೂ ಪೂರ್ವದಲ್ಲಿ ಬಗೆಹರಿಯಬೇಕಾದ ಕೆಲ ವಿಷಯಗಳ ಬಗ್ಗೆ ಚರ್ಚಿ ನಡೆಸಲಿದೆ. ಆದಾಗ್ಯೂ, ಬ್ರಹ್ಮೋಸ್‌ ರಕ್ಷಣಾ ವ್ಯವಸ್ಥೆಯ ಖರೀದಿಯ ಕುರಿತು ಕಳೆದ ನವೆಂಬರ್‌ನಲ್ಲೇ ಫಿಲಿಪ್ಪೀನ್ಸ್‌ ಘೋಷಣೆ ಮಾಡಿತ್ತಾದರೂ, ಕೋವಿಡ್‌-19 ಬಿಕ್ಕಟ್ಟಿನಿಂದಾಗಿ ಪ್ರಕ್ರಿಯೆ ಮುಂದೂಡಲ್ಪಟ್ಟಿತು.

ರಷ್ಯಾದ ರಾಯಭಾರಿ ರೋಮನ್‌ ಬಬುಶ್ಕಿನ್‌ ಈ ವಿಚಾರವಾಗಿ ಮಾತನಾಡುತ್ತಾ, “”ಭಾರತ ಮತ್ತು ರಷ್ಯಾ ನಡುವಿನ ರಕ್ಷಣಾ ಸಹಕಾರ ಸದೃಢವಾಗಿದ್ದು, ಮುಂದಿನ ದಿನಗಳಲ್ಲೂ ಈ ವಲಯದಲ್ಲಿ ಎರಡೂ ದೇಶಗಳ ನಡುವಿನ ಸಹಭಾಗಿತ್ವ ಮುಂದುವರಿಯಲಿದೆ. ಭಾರತ ಮತ್ತು ರಷ್ಯಾದ ಜಂಟಿ ಸಂಶೋಧನೆಯ ಫ‌ಲವಾದ ಬ್ರಹ್ಮೋಸ್‌ ಅನ್ನು ಮುಂದಿನ ದಿನಗಳಲ್ಲಿ ವಿವಿಧ ರಾಷ್ಟ್ರಗಳಿಗೆ ರಫ್ತು ಮಾಡುವ ಯೋಜನೆಯಿದೆ” ಎಂದಿದ್ದಾರೆ.