ಈ ಲೆಕ್ಕಕ್ಕೆ ಟ್ವಿಟರ್‌ ಲೋಕ ಇಬ್ಭಾಗ

Team Udayavani, Aug 2, 2019, 5:42 AM IST

ನವದೆಹಲಿ: ಟ್ವಿಟರ್‌ನ ಖಾತೆದಾರರೊಬ್ಬರು ನೀಡಿದ ಒಂದು ಸರಳ ಲೆಕ್ಕದ ಪಂಥವೊಂದು ಟ್ವಿಟರ್‌ ಬಳಕೆದಾರರ ನಡುವೆ ಜಗಳ ತಂದಿಟ್ಟು ಅವರನ್ನು ಇಬ್ಭಾಗವಾಗಿಸಿದ ಕುತೂಹಲಕಾರಿ ಘಟನೆ ಗುರುವಾರ ನಡೆದಿದೆ.

8/2 (2+2) ಎಂಬ ಸಮೀಕರಣವೊಂದನ್ನು ಕೊಟ್ಟಿದ್ದ ಆ ವ್ಯಕ್ತಿ ಇದನ್ನು ಸರಳೀಕರಣಗೊಳಿಸಬೇಕು. ಇದರ ಉತ್ತರ 16 ಅಥವಾ 1, ಇವುಗಳಲ್ಲೊಂದು ಆಗಿರಬೇಕು ಎಂದು ಹೇಳಿದ್ದರು.

ಸಾಮಾನ್ಯವಾದ, ಹೈಸ್ಕೂಲು ಮಾದರಿಯ ಗಣಿತದ ನಿಯಮಗಳ ಪ್ರಕಾರ, ಇದನ್ನು ಸರಳೀಕರಿಸಿದರೆ 1 ಎಂಬ ಉತ್ತರ ಬರುತ್ತದೆ. ಅನೇಕರು ಈ ಉತ್ತರವೇ ಸರಿ ಎಂದರು. ಆದರೆ, ಮತ್ತೂಂದು ಗುಂಪು ’16’ ಸರಿ ಉತ್ತರ ಎಂದರು. ಇದರಿಂದ ಸಿಟ್ಟಿಗೆದ್ದ 1 ಉತ್ತರ ‘ವಾದಿ’ಗಳು, ’16’ ಸರಿ ಉತ್ತರ ಎನ್ನುವವರು ಮತ್ತೆ ಗಣಿತ ಕಲಿಯಿರಿ ಎಂದು ಟಾಂಗ್‌ ಕೊಟ್ಟರೆ, ಅತ್ತ, ’16’ ಉತ್ತರವೇ ಸರಿ ಎನ್ನುವವರು ‘1 ಉತ್ತರ ಸರಿ ಎನ್ನುವವರು ಪುನಃ ಶಾಲೆಗೆ ಸೇರಿರಿ’ ಎಂದು ಟೀಕಿಸಿದರು. ಆದರೆ, ಗಣಿತ ಲೋಕದ ಪ್ರಕಾರ, ಈ ಎರಡೂ ಉತ್ತರಗಳೂ ಸರಿ. ಸಾಮಾನ್ಯ ಗಣಿತದ ನಿಯಮಗಳ ಮೂಲಕ ಇದನ್ನು ಸರಳೀಕರಿಸಿದರೆ 1 ಅಂಕಿ ಬರುತ್ತದೆ. ಆದರೆ, ಬೋಡ್ಮಾಸ್‌ (BODMAS) ನಿಯಮದ ಮೂಲಕ ಸರಳೀಕರಿಸಿದರೆ 16 ಉತ್ತರ ಬರುತ್ತದೆ ಎಂದು ಕೆಲವು ಅಂತರ್ಜಾಲ ವಾಹಿನಿಗಳು ಉತ್ತರಿಸಿವೆ.