ವಿಪ್ರೋ, ನೆಸ್ಲೆಗಿಂತ ಶ್ರೀಮಂತವಾಗಿದೆ ತಿರುಪತಿ ದೇವಸ್ಥಾನ: ಆಸ್ತಿ ಮೌಲ್ಯವೇ 2.5 ಲಕ್ಷ ಕೋಟಿ

Team Udayavani, Nov 7, 2022, 11:03 AM IST

ಆಂಧ್ರಪ್ರದೇಶ : ಆಂಧ್ರಪ್ರದೇಶದಲ್ಲಿರುವ ತಿರುಪತಿಯ ಜಗತ್ಪ್ರಸಿದ್ಧ ದೇವಾಲಯವಾದ ವೆಂಕಟೇಶ್ವರ ದೇವಾಲಯವು ಮೊದಲ ಬಾರಿಗೆ ತನ್ನ ಸಂಪತ್ತನ್ನು ಬಹಿರಂಗಪಡಿಸಿದೆ. ಇದರ ಪ್ರಕಾರ ತಿರುಪತಿ ದೇವಸ್ಥಾನದ ಒಟ್ಟು ಆಸ್ತಿ 2.5 ಲಕ್ಷ ಕೋಟಿ ರೂಪಾಯಿಗಳಿಗಿಂತ ಹೆಚ್ಚು ಅಂದರೆ 30 ಶತಕೋಟಿ ಡಾಲರ್‌ಗಿಂತ ಹೆಚ್ಚು. ಅಂದಾಜಿನ ದೃಷ್ಟಿಕೋನದಿಂದ ನೋಡಿದರೆ, ಈ ಸಂಪತ್ತು ಭಾರತದ ಅನೇಕ ದೊಡ್ಡ ಕಂಪನಿಗಳ ಒಟ್ಟು ನಿವ್ವಳ ಮೌಲ್ಯಕ್ಕಿಂತ ಹೆಚ್ಚು ಎಂದು ಅಂದಾಜಿಸಲಾಗಿದೆ.

ತಿರುಪತಿ ದೇವಾಲಯವು ಆಸ್ತಿಯ ವಿಷಯದಲ್ಲಿ ಭಾರತದ ಅನೇಕ ದೊಡ್ಡ ಕಂಪನಿಗಳಿಗಿಂತ ಶ್ರೀಮಂತವಾಗಿದೆ. ಒಂದು ಎಣಿಕೆ ಪ್ರಕಾರ ಈ ಆಸ್ತಿ ಐಟಿ ಕಂಪನಿ ವಿಪ್ರೋ, ಆಹಾರ ಮತ್ತು ಪಾನೀಯ ಕಂಪನಿ ನೆಸ್ಲೆ ಮತ್ತು ಸಾರ್ವಜನಿಕ ವಲಯದ ತೈಲ ಕಂಪನಿಗಳಾದ ONGC ಮತ್ತು ಇಂಡಿಯನ್ ಆಯಿಲ್ (IOC) ಗಿಂತಲೂ ಹೆಚ್ಚಿದೆಯಂತೆ.

ವೆಂಕಟೇಶ್ವರ ದೇವರಿಗೆ ಸಮರ್ಪಿತವಾಗಿರುವ ತಿರುಪತಿ ದೇವಸ್ಥಾನದ ವ್ಯವಸ್ಥಾಪಕ ತಿರುಮಲ ತಿರುಪತಿ ದೇವಸ್ಥಾನಂ, 1933ರಲ್ಲಿ ಸ್ಥಾಪನೆಯಾದ ನಂತರ ಮೊದಲ ಬಾರಿಗೆ ತನ್ನ ಆಸ್ತಿಯನ್ನು ಘೋಷಿಸಿದೆ. ತಿರುಪತಿ ದೇವಸ್ಥಾನದ ಆಸ್ತಿಗಳಲ್ಲಿ ಬ್ಯಾಂಕ್‌ಗಳಲ್ಲಿ ಠೇವಣಿಯಾಗಿರುವ 10.25 ಟನ್ ಚಿನ್ನ, 2.5 ಟನ್ ತೂಕದ ಚಿನ್ನಾಭರಣಗಳು, ಬ್ಯಾಂಕ್‌ಗಳಲ್ಲಿ ಠೇವಣಿ ಮಾಡಲಾದ 16,000 ಕೋಟಿ ರೂಪಾಯಿಗಳು ಮತ್ತು ದೇಶಾದ್ಯಂತ ಇರುವ 960 ಆಸ್ತಿಗಳು ಸೇರಿವೆ. ಇವೆಲ್ಲವುಗಳ ಒಟ್ಟು ಮೊತ್ತವನ್ನು ಲೆಕ್ಕ ಹಾಕಿದರೆ ಈ ಒಟ್ಟು ಮೊತ್ತ ಸುಮಾರು 2.5 ಲಕ್ಷ ಕೋಟಿ ರೂಪಾಯಿಗಳು ಆಗಲಿದೆ.

ಇದನ್ನೂ ಓದಿ : ತಮಿಳುನಾಡಿನಲ್ಲಿ ಬೆಚ್ಚಿಬೀಳಿಸಿದ ಘಟನೆ: ಕರಡಿ ದಾಳಿ ಮಾಡಿ ಮೂವರ ಸ್ಥಿತಿ ಗಂಭೀರ