ಇಂದು 50,000 ರೈತರಿಂದ ವಿಧಾನಭವನ ಮುತ್ತಿಗೆ

Team Udayavani, Mar 12, 2018, 9:20 AM IST

ಮುಂಬಯಿ: ಅಖೀಲ ಭಾರತ ಕಿಸಾನ್‌ ಸಭಾ ನೇತೃತ್ವದಲ್ಲಿ ಬರೋಬ್ಬರಿ 50 ಸಾವಿರ ಅನ್ನದಾತರು ಕಾಲ್ನಡಿಗೆಯಲ್ಲೇ 180 ಕಿ.ಮೀ. ಸಂಚರಿಸಿ, ರವಿವಾರ ಮುಂಬಯಿ ತಲುಪಿದ್ದಾರೆ. ಮಹಾರಾಷ್ಟ್ರ ಸರ್ಕಾರದ ವೈಫ‌ಲ್ಯಗಳನ್ನು ಖಂಡಿಸಿ ಹಾಗೂ ಸಾಲಮನ್ನಾ ಸಹಿತ ಹಲವು ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಇವರು ಸೋಮವಾರ ವಿಧಾನಭವನಕ್ಕೆ ಮುತ್ತಿಗೆ ಹಾಕಲಿದ್ದಾರೆ. ರೈತರ ಉತ್ಪನ್ನಗಳಿಗೆ ನ್ಯಾಯಯುತ ಬೆಲೆ ಮತ್ತು ಸಾಲ ಮನ್ನಾದ ಭರವಸೆ ನೀಡಿದ್ದ ಸರಕಾರ ಅದನ್ನು ಪೂರೈಸಿಲ್ಲ. ಹೀಗಾಗಿ ನಾವು ಸರಕಾರದಿಂದ ಉತ್ತರ ಬಯಸುತ್ತಿದ್ದೇವೆ ಎಂದು ಕಿಸಾನ್‌ ಸಭಾದ ರಾಜ್ಯ ಪ್ರಧಾನ ಕಾರ್ಯದರ್ಶಿ ಅಜಿತ್‌ ನವಾಲೆ ತಿಳಿಸಿದ್ದಾರೆ. 180 ಕಿ.ಮೀ. ಪಾದಯಾತ್ರೆ ಆರಂಭವಾಗುವಾಗ 12 ಸಾವಿರ ರೈತರಿದ್ದರು.

ಅದಕ್ಕೀಗ ಇನ್ನಷ್ಟು ಮಂದಿ ಸೇರಿ ಈಗ ಸಂಖ್ಯೆ 50 ಸಾವಿರ ದಾಟಿದೆ ಎಂದೂ ಅವರು ಹೇಳಿದ್ದಾರೆ. ಇದೇ ವೇಳೆ, ರೈತರು ಮುತ್ತಿಗೆ ಹಾಕುವ ವಿಚಾರ ತಿಳಿಯುತ್ತಿದ್ದಂತೆಯೇ ಸಿಎಂ ದೇವೇಂದ್ರ ಫ‌ಡ್ನವೀಸ್‌ ಅವರು ಸಚಿವ ಗಿರೀಶ್‌ ಮಹಾಜರ್‌ ಅವರನ್ನು ಸಂಧಾನಕಾರರಾಗಿ ನೇಮಿಸಿ, ರೈತರ ಬಳಿ ಕಳುಹಿಸಿದ್ದಾರೆ. ಇನ್ನೊಂದೆಡೆ, ವಿಪಕ್ಷ ಕಾಂಗ್ರೆಸ್‌ ಮತ್ತು ಶಿವಸೇನೆ ರೈತರಿಗೆ ಬೆಂಬಲ ಸೂಚಿಸಿವೆ.