ಚಂಡೀಗಢ : ಒಂದೂವರೆ ವರ್ಷದ ಬಾಲಕ ಬೀದಿ ನಾಯಿಗಳ ದಾಳಿಗೆ ಬಲಿ

Team Udayavani, Jun 18, 2018, 11:47 AM IST

ಚಂಡೀಗಢ : ಇಲ್ಲಿನ  ಪಾರ್ಕ್‌ ಒಂದರಲ್ಲಿ ಬೀದಿ ನಾಯಿಗಳು ಒಂದೂವರೆ ವರ್ಷ ಪ್ರಾಯದ ಬಾಲಕನ ಮೇಲೆ ದಾಳಿ ನಡೆಸಿ ಕೊಂದಿರುವ ಆಘಾತಕಾರಿ ಘಟನೆ ನಡೆದಿದೆ.

ಮನೆಗೆಲಸದವಳಾಗಿರುವ ಮಗುವಿನ ತಾಯಿ ಮಗುವನ್ನು ಪಾರ್ಕ್‌ನಲ್ಲಿ ಬಿಟ್ಟು ಅಲ್ಲೇ ಸಮೀಪದಲ್ಲಿ ತಾನು ಕೆಲಸಮಾಡಿಕೊಂಡಿರುವ ಮನೆಗೆ  ಪಾತ್ರೆ ತೊಳೆಯಲೆಂದು ಹೋಗಿದ್ದಾಗ ಈ ಆಘಾತಕಾರಿ ಘಟನೆ ನಡೆದಿದೆ.

ಮಗು ಇತರ ಮೂವರೊಂದಿಗೆ ಪಾರ್ಕ್‌ನಲ್ಲಿ ಆಟವಾಡಿಕೊಂಡಿದ್ದಾಗ ಬೀದಿ ನಾಯಿಗಳು ದಾಳಿ ಮಾಡಿದವು; ಆಗ ಮಗುವಿನೊಂದಿಗಿದ್ದ ಇತರ ಬಾಲಕರು ಅಲ್ಲಿಂದ ಓಡಿ ಹೋದರು. ಒಂದೂವರೆ ವರ್ಷದ ಬಾಲಕನಿಗೆ ಹಾಗೆ ಮಾಡಲು ಸಾಧ್ಯವಾಗಲಿಲ್ಲ. 

ಬೀದಿ ನಾಯಿಗಳ ದಾಳಿಗೆ ಗುರಿಯಾಗಿ ತೀವ್ರಗಾಯಗೊಂಡ ಬಾಲಕನನ್ನು ಅನಂತರ ಆಸ್ಪತ್ರೆಗೆ ಒಯ್ಯಲಾಯಿತು. ಆದರೆ ಅದಾಗಲೇ ಆತ ಮೃತಪಟ್ಟಿದ್ದುದಾಗಿ ಎಂದು ಪೊಲೀಸರು ತಿಳಿಸಿದ್ದಾರೆ. 

ಈ ಪ್ರದೇಶದಲ್ಲಿ ಬೀದಿ ನಾಯಿಗಳ ಹಾವಳಿ ತೀವ್ರವಾಗಿರುವ ಬಗ್ಗೆ ಸ್ಥಳೀಯರು ಸ್ಥಳೀಯಾಡಳಿತೆಗೆ ಬಹಳ ಹಿಂದೆಯೇ ದೂರಿದ್ದರು; ಆದರೆ ಏನೂ ಪ್ರಯೋಜನವಾಗಿರಲಿಲ್ಲ; ಜನರು ತಮ್ಮ ಮಕ್ಕಳನ್ನು ಇಲ್ಲಿನ ಪಾರ್ಕಿಗೆ ಕಳುಹಿಸಲು ಹೆದರುತ್ತಿದ್ದರು. ಅನೇಕರು ಇಲ್ಲಿ ಬೀದಿ ನಾಯಿಗಳ ದಾಳಿಗೆ ಗುರಿಯಾದ ಘಟನೆ  ನಡೆದಿದೆ ಎಂದು ವರದಿಗಳು ತಿಳಿಸಿವೆ.