ರೈಲಿನ ಎಸಿ ಸರಿಯಿಲ್ಲವೆಂದು ಪ್ರಯಾಣಿಕರಿಂದ ಪ್ರತಿಭಟನೆ

Team Udayavani, Jun 11, 2018, 12:29 PM IST

ಮಾಲ್ಡಾ , ಪಶ್ಚಿಮ ಬಂಗಾಲ : ಇಲ್ಲಿ ಮಾಲ್ಡಾ ಟೌನ್‌ ಸ್ಟೇಶನ್‌ನಲ್ಲಿ ಇಂದು ನಸುಕಿನ 4 ಗಂಟೆಯ ವೇಳೆಗೆ ಡಿಎನ್‌ ಬ್ರಹ್ಮಪುತ್ರಾ ಮೇಲ್‌ ರೈಲಿನ ಪ್ರಯಾಣಿಕರು ಹವಾನಿಯಂತ್ರಣ ಘಟಕ ಸರಿಯಾಗಿ ಕೆಲಸ ಮಾಡುತ್ತಿಲ್ಲ ಎಂಬ ಕಾರಣಕ್ಕೆ ಪ್ರತಿಭಟನೆ ನಡೆಸಿದರು. ಪರಿಣಾಮವಾಗಿ ಈ ಮಾರ್ಗದಲ್ಲಿನ ಹಲವು ರೈಲುಗಳ ಸಂಚಾರ ತೀವ್ರವಾಗಿ ಬಾಧಿತವಾಯಿತು. 

ಗುವಾಹಟಿಯಿಂದ ದಿಲ್ಲಿಗೆ ಹೋಗುತ್ತಿದ್ದ ಡಿಎನ್‌ ಬ್ರಹ್ಮಪುತ್ರಾ ಮೇಲ್‌ ರೈಲಿನ ಎಸಿ ವ್ಯವಸ್ಥೆ ಸರಿಯಾಗಿ ಕೆಲಸ ಮಾಡುತ್ತಿಲ್ಲ ಎಂದು ಪ್ರಯಾಣಿಕರು ಸಿಲಿಗುಡಿ ಮತ್ತು ಮಾಲ್ಡಾ ರೈಲು ನಿಲ್ದಾಣದಲ್ಲಿ ಅಧಿಕೃತ ದೂರು ದಾಖಲಿಸಿದರು. ಆದರೆ ಅಧಿಕಾರಿಗಳು ಯಾವುದೇ ಕ್ರಮಕ್ಕೆ ಮುಂದಾಗಲಿಲ್ಲ. ಸಿಟ್ಟಿಗೆದ ಪ್ರಯಾಣಿಕರು ರೈಲಿನ ತುರ್ತು ನಿಲುಗಡೆಯ ಚೈನ್‌ ಎಳೆದು ರೈಲನ್ನು ನಿಲ್ಲಿಸಿ ಹೊರಬಂದು ಪ್ರತಿಭಟನೆ ನಡೆಸಿದರು. 

ಕೊನೆಗೂ ರೈಲ್ವೇ ಅಧಿಕಾರಿಗಳು ಸ್ವಲ್ಪ ಮಟ್ಟಿನ ಎಸಿ ದುರಸ್ತಿ ಕಾರ್ಯ ನಡೆಸಿದರು. 8 ಗಂಟೆಯ ಹೊತ್ತಿಗೆ ರೈಲು ತನ್ನ ಮುಂದಿನ ಪ್ರಯಾಣವನ್ನು ಬೆಳೆಸಿತು ಎಂದು ಜಿಆರ್‌ಪಿ ಪ್ರಭಾರ ಇನ್ಸ್‌ಪೆಕ್ಟರ್‌ ಪಾರ್ಥ ಚಂದಾ ತಿಳಿಸಿದರು.