ಪ್ರಯಾಣಿಕರಿಂದಲೇ ರೈಲಿನ ಸ್ವಚ್ಛತೆ ರೇಟಿಂಗ್‌

Team Udayavani, Apr 2, 2018, 7:21 AM IST

ಹೊಸದಿಲ್ಲಿ: ರೈಲು ಮತ್ತು ರೈಲು ನಿಲ್ದಾಣಗಳಲ್ಲಿನ ಸ್ವಚ್ಛತೆಗೆ ಇನ್ನು ಪ್ರಯಾಣಿಕರೇ ರೇಟಿಂಗ್‌ ನೀಡುವ ವ್ಯವಸ್ಥೆಯನ್ನು ರೈಲ್ವೇ ಇಲಾಖೆ ಜಾರಿಗೆ ತರಲಿದೆ. ಇದರಿಂದ ಸ್ವಚ್ಛತೆ ನಿರ್ವಹಣೆ ಮಾಡುವ ಗುತ್ತಿಗೆದಾರರ ಮೇಲೆ ನೇರವಾಗಿ ಪರಿಣಾಮ ಉಂಟಾಗಲಿದ್ದು, ಆ ಗುತ್ತಿಗೆದಾರರ ರೇಟಿಂಗ್‌ ಕೂಡ ಕಡಿಮೆಯಾಗಲಿದೆ.

ಇದಲ್ಲದೆ ಸ್ವಚ್ಛತೆಗಾಗಿ ಸಂಪೂರ್ಣ ರೇಟಿಂಗ್‌ ವ್ಯವಸ್ಥೆಯನ್ನು ಪ್ರಸ್ತಾವಿಸಲಾಗಿದೆ. ಉತ್ತಮ ರೇಟಿಂಗ್‌ ಪಡೆಯುವ ಗುತ್ತಿಗೆದಾರರಿಗೆ ಪ್ರೋತ್ಸಾಹ ಧನ ನೀಡಿದರೆ ಕಡಿಮೆ ರೇಟಿಂಗ್‌ ಪಡೆಯುವ ಗುತ್ತಿಗೆದಾರರ ಒಪ್ಪಂದವನ್ನು ರದ್ದುಗೊಳಿಸಲಾಗುತ್ತದೆ ಹಾಗೂ ದಂಡ ವಿಧಿಸಲಾಗುತ್ತದೆ. ಶೇ.30ರಷ್ಟು ದಂಡ ಮತ್ತು ಪ್ರೋತ್ಸಾಹಧನವು ಪ್ರಯಾಣಿಕರ ರೇಟಿಂಗ್‌ ಅವಲಂಬಿಸಿರುತ್ತದೆ. ಉಳಿದಂತೆ ಸಿಬ್ಬಂದಿ  ಹಾಜರಾತಿ, ಗುಣಮಟ್ಟದ ಸಾಮಗ್ರಿಗಳ ಬಳಕೆ, ಬಟ್ಟೆಗಳ ವಿತರಣೆ, ನಿರ್ವಹಣೆ ಮತ್ತು ಸೇವೆಯನ್ನು ಅವಲಂಬಿಸಿಯೂ ಗುತ್ತಿಗೆದಾರರಿಗೆ ದಂಡ ಮತ್ತು ಪ್ರೋತ್ಸಾಹಧನ ನೀಡಲಾಗುತ್ತದೆ. ಪ್ರಯಾಣಿಕರ ರೇಟಿಂಗ್‌ಗೆ ಜಿಪಿಎಸ್‌ ಆಧರಿತವಾಗಿದ್ದು, ಯಾವುದೇ ಅಕ್ರಮಗಳಿಗೆ ಅವಕಾಶವಿಲ್ಲ ಎಂದಿದೆ ರೈಲ್ವೆ.