ತ್ರಿವಳಿ ತಲಾಕ್‌ ಅತ್ಯಂತ ಕೆಟ್ಟ, ಅನಿಷ್ಠ ವಿಚ್ಛೇದನ ಪದ್ಧತಿ: ಸುಪ್ರೀಂ

Team Udayavani, May 12, 2017, 3:46 PM IST

ಹೊಸದಿಲ್ಲಿ : ಮುಸ್ಲಿಮರಲ್ಲಿನ ಮದುವೆಯನ್ನು ಬರ್ಖಾಸ್ತುಗೊಳಿಸುವ ತ್ರಿವಳಿ ತಲಾಕ್‌ ಅತ್ಯಂತ ಕೆಟ್ಟ ಹಾಗೂ ಅನಿಷ್ಟ  ಪದ್ಧತಿಯಾಗಿದೆ ಎಂದು ಸುಪ್ರೀಂ ಕೋರ್ಟ್‌ ಇಂದು ಶುಕ್ರವಾರ ಹೇಳಿತು. 

ತ್ರಿವಳಿ ತಲಾಕ್‌ ಮತ್ತು ನಿಖಾಹ್‌ ಹಲಾಲ ಪದ್ಧತಿಯ ಸಾಂವಿಧಾನಿಕ ಸಿಂಧುತ್ವವನ್ನು ಪ್ರಶ್ನಿಸಿ ದೇಶದ ವಿವಿಧ ಭಾಗಗಳ ಹಲವಾರು ಮುಸ್ಲಿಂ ಮಹಿಳೆಯರು ಸಲ್ಲಿಸಿರುವ ಅರ್ಜಿಗಳ ಮೇಲಿನ ವಿಚಾರಣೆಯನ್ನು ಇಂದು ಮುಂದುವರಿಸಿದ ಸುಪ್ರೀಂ ಕೋರ್ಟ್‌, ಇಸ್ಲಾಂನಲ್ಲಿನ ವಿವಿಧ ವಿಚಾರ ಪಂಥಗಳು ತ್ರಿವಳಿ ತಲಾಕ್‌ ಕಾನೂನು ಬಾಹಿರವೆಂದು ಹೇಳಿವೆ ಎಂದು ಸುಪ್ರೀಂ ಕೋರ್ಟ್‌ ಹೇಳಿತು.

ತ್ರಿವಳಿ ತಲಾಕ್‌ ಪದ್ಧತಿಯನ್ನು ರದ್ದು ಮಾಡಬೇಕೆಂದು ಒತ್ತಾಯಿಸಿ ಮಾತನಾಡಿದ ಹಿರಿಯ ವಕೀಲ ರಾಮ್‌ ಜೇಠ್ಮಲಾನಿ ಅವರು ಮುಸ್ಲಿಮರಲ್ಲಿನ ಈ ವಿವಾಹ ವಿಚ್ಛೇದನ ಪದ್ಧತಿಯು ಅತ್ಯಂತ ಖಂಡನೀಯವಾಗಿದ್ದು ಮಹಿಳೆಯರಿಗೆ ಅದು ವಿಚ್ಛೇದನದಲ್ಲಿ ಸಮಾನ ಹಕ್ಕನ್ನು ನೀಡುವುದಿಲ್ಲ ಎಂದು ಹೇಳಿದರು.  ಜೇಠ್ಮಲಾನಿ ಅವರು ರಾಷ್ಟ್ರೀಯ ಭದ್ರತೆಯ ಜಾಗೃತಿ ವೇದಿಕಯ ವಕೀಲರಾಗಿ ಸುಪ್ರೀಂ ಕೋರ್ಟ್‌ ಪೀಠದ ಮುಂದೆ ಹಾಜರಾಗಿದ್ದರು. 

ವರಿಷ್ಠ ನ್ಯಾಯಮೂರ್ತಿ ಜೆ ಎಸ್‌ ಖೇಹರ್‌ ಅವರನ್ನು ಒಳಗೊಂಡ ಐದು ನ್ಯಾಯಾಧೀಶರ ಸಾಂವಿಧಾನಿಕ ಪೀಠವು ನಿನ್ನೆ ಗುರುವಾರ “ತ್ರಿವಳಿ ತಲಾಕ್‌ ಇಸ್ಲಾಂನಲ್ಲಿ ಮೂಲಭೂತವಾಗಿದೆಯೇ?’ ಎಂದು ಪ್ರಶ್ನಿಸಿತ್ತು. ಪೀಠದಲ್ಲಿರುವ ಇತರ ನ್ಯಾಯಮೂರ್ತಿಗಳೆಂದರೆ ಜಸ್ಟಿಸ್‌ ಕುರಿಯನ್‌ ಜೋಸೆಫ್, ಜಸ್ಟಿಸ್‌ ರೊಹಿನ್‌ಟನ್‌ ಫಾಲಿ ನಾರಿಮನ್‌, ಜಸ್ಟಿಸ್‌ ಉದಯ್‌ ಉಮೇಶ್‌ ಲಲಿತ್‌ ಮತ್ತು ಜಸ್ಟಿಸ್‌ ಎಸ್‌ ಅಬ್ದುಲ್‌ ನಝೀರ್‌.