Panaji: ದಾರಿ ಮಧ್ಯೆ ಹೊತ್ತಿ ಉರಿದ ಟ್ರಕ್… 32 ಲಕ್ಷ ಮೌಲ್ಯದ ಸೊತ್ತು ನಷ್ಟ

Team Udayavani, May 4, 2024, 4:57 PM IST

ಪಣಜಿ: ಬೆಳಗಾವಿಯ ಮಾರ್ಗವಾಗಿ ಕುಳೆಯಿಂದ ಪೊಂಡಾ ಕಡೆಗೆ ಬರುತ್ತಿದ್ದ ಟ್ರಕ್‍ಗೆ ಬುಧವಾರ ರಾತ್ರಿ 10:30ರ ಸುಮಾರಿಗೆ ಏಕಾಏಕಿ ಬೆಂಕಿ ಕಾಣಿಸಿಕೊಂಡು 32 ಲಕ್ಷ ನಷ್ಟ ಸಂಭವಿಸಿದೆ.

ಕುಳೆ ಪೊಲೀಸರು ನೀಡಿದ ಮಾಹಿತಿಯ ಪ್ರಕಾರ, ಬುಧವಾರ ರಾತ್ರಿ ಅನ್ಮೊಡ್ ಘಾಟ್ ಇಳಿಯುವಾಗ ಟ್ರಕ್‍ಗೆ ಬೆಂಕಿ ಹೊತ್ತಿಕೊಂಡಿದೆ. ಹಿಂದಿನಿಂದ ಬಂದ ಕೆಲವು ವಾಹನ ಸವಾರರು ಟ್ರಕ್ ಚಾಲಕನಿಗೆ ಎಚ್ಚರಿಕೆ ನೀಡಲು ಪ್ರಯತ್ನಿಸಿದರು, ಆದರೆ ಚಾಲಕ ಅವರನ್ನು ನಿರ್ಲಕ್ಷಿಸಿದ್ದಾನೆ. ಟ್ರಕ್ ಮೋಲ್ ಔಟ್ ಪೋಸ್ಟ್ ಬಳಿ ಬರುವಷ್ಟರಲ್ಲಿ ಟ್ರಕ್ ನಲ್ಲಿದ್ದ ಅರ್ಧಕ್ಕಿಂತ ಹೆಚ್ಚು ವಸ್ತುಗಳು ಸುಟ್ಟು ಹೋಗಿದ್ದವು. ಟ್ರಕ್ ಚಾಲಕ ಪರಿಸ್ಥಿತಿಯನ್ನು ಹತೋಟಿಯಲ್ಲಿಟ್ಟುಕೊಂಡು ಟ್ರಕ್ ಅನ್ನು ನಿಲ್ಲಿಸಿದನು, ಆದರೆ ಅಷ್ಟರಲ್ಲಿ ಸುಮಾರು 32 ಲಕ್ಷ ಮೌಲ್ಯದ ವಸ್ತುಗಳು ಸುಟ್ಟುಹೋಗಿವೆ. ಫೋಂಡಾ ಅಗ್ನಿಶಾಮಕ ದಳದ ಸಿಬ್ಬಂದಿ, ಕುಳೆ ಪೊಲೀಸರು ಹಾಗೂ ಮೋಲೆಮ್ ಅರಣ್ಯ ಇಲಾಖೆ ಸಿಬ್ಬಂದಿ ಬೆಂಕಿ ನಂದಿಸಿದ್ದಾರೆ.

ಕುಳೆ ಪೊಲೀಸ್ ಠಾಣೆಯ ಇನ್ಸ್ ಪೆಕ್ಟರ್ ಸಗುಣ ಸಾವಂತ್ ಮಾರ್ಗದರ್ಶನದಲ್ಲಿ ಸಬ್ ಇನ್ಸ್ ಪೆಕ್ಟರ್ ಸದಾನಂದ ದೇಸಾಯಿ ಮುಂದಿನ ತನಿಖೆ ನಡೆಸುತ್ತಿದ್ದಾರೆ.

ಕುಳೆ ಪೊಲೀಸ್ ವ್ಯಾಪ್ತಿಯಲ್ಲಿನ ಪ್ರದೇಶವು ದೊಡ್ಡದಾಗಿದೆ ಮತ್ತು ಅನ್ಮೋದ್ ಘಾಟ್ ಕೂಡ ಅದರಲ್ಲಿ ಸೇರಿದೆ. ಈ ಘಾಟ್‍ನಲ್ಲಿ ಅನೇಕ ಅಪಘಾತಗಳು ಸಂಭವಿಸುತ್ತವೆ. ಅನೇಕ ಅಗ್ನಿ ಅವಘಡಗಳೂ ನಡೆದಿವೆ. ಬೆಂಕಿ ಕಾಣಿಸಿಕೊಂಡರೆ 30 ಕಿ.ಮೀ ದೂರದ ಫೊಂಡಾ ಅಥವಾ ಕುಡ್ಚಡೆಯಿಂದ ಅಗ್ನಿಶಾಮಕ ದಳಕ್ಕೆ ಕರೆ ಮಾಡಬೇಕು. ಈ ಸಹಾಯ ಸಕಾಲಕ್ಕೆ ತಲುಪದೇ ಇರುವುದರಿಂದ ಅಪಾರ ನಷ್ಟವಾಗುತ್ತಿದೆ. ಅದಕ್ಕಾಗಿ ಮೊಲೆಮ್‍ನಲ್ಲಿ ಅಗ್ನಿಶಾಮಕ ದಳವನ್ನು ನಿಯೋಜಿಸಬೇಕು ಎಂಬ ಆಗ್ರಹವಿದೆ.

ಇದನ್ನೂ ಓದಿ: Belagavi; ಭಿಕ್ಷೆ ರೀತಿಯಲ್ಲಿ ಸಿಎಂ ಬರ ಪರಿಹಾರ ನೀಡಿದ್ದಾರೆ: ವಿಜಯೇಂದ್ರ ಆಕ್ರೋಶ