2025ರಿಂದ ಎಲ್ಲಾ ಟ್ರಕ್‌ಗಳಲ್ಲಿ ಎಸಿ ಸೌಲಭ್ಯ ಕಡ್ಡಾಯ

Team Udayavani, Jun 21, 2023, 7:20 AM IST

ನವದೆಹಲಿ: ಚಾಲಕರ ಯೋಗಕ್ಷೇಮಕ್ಕಾಗಿ 2025ರಿಂದ ಎಲ್ಲಾ ಟ್ರಕ್‌ಗಳ ಚಾಲಕರ ಕ್ಯಾಬಿನ್‌ಗಳಲ್ಲಿ ಏರ್‌ ಕಂಡಿಷನಿಂಗ್‌(ಎಸಿ) ಸೌಲಭ್ಯ ಕಡ್ಡಾಯವಾಗಲಿದೆ. ಈ ಕುರಿತು ಸ್ವತಃ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್‌ ಗಡ್ಕರಿ ಅವರೇ ಮಾಹಿತಿ ನೀಡಿದ್ದಾರೆ.

ದಿನದ ಬಹುತೇಕ ಸಮಯವನ್ನು ಟ್ರಕ್‌ ಚಾಲಕರು ರಸ್ತೆಗಳಲ್ಲಿ ಕಳೆಯುತ್ತಾರೆ. ಅಲ್ಲದೇ ತೀವ್ರ ತಾಪಮಾನದ ನಡುವೆ ಅವರು ಕೆಲಸ ಮಾಡುತ್ತಾರೆ. ಹೀಗಾಗಿ ಏಸಿ ಸೌಲಭ್ಯ ಒದಗಿಸುವ ನಿಟ್ಟಿನಲ್ಲಿ ಚರ್ಚೆಗಳು ನಡೆದಿದ್ದವು. ಸೋಮವಾರವೇ ಈ ಕುರಿತ ಕಡತಕ್ಕೆ ಸಹಿ ಹಾಕಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಈಗಾಗಲೇ ವೊಲ್ವೊ ಮತ್ತು ಸ್ಕ್ಯಾನಿಯಾ ಕಂಪನಿಗಳು ತಮ್ಮ ಹೈ-ಎಂಡ್‌ ಟ್ರಕ್‌ಗಳ ಚಾಲಕರ ಕ್ಯಾಬಿನ್‌ನಲ್ಲಿ ಏಸಿ ಸೌಲಭ್ಯ ಅಳವಡಿಸಿವೆ. ಎಲ್ಲಾ ಟ್ರಕ್‌ಗಳಲ್ಲಿ ಏಸಿ ಸೌಲಭ್ಯ ಒದಗಿಸಲು ಟ್ರಕ್‌ ಮಾಲೀಕರಿಗೆ 18 ತಿಂಗಳ ಕಾಲಾವಕಾಶ ನೀಡಲಾಗಿದೆ.

“ಟ್ರಕ್‌ ಚಾಲಕರು ದಿನದಲ್ಲಿ 12ರಿಂದ 14 ಗಂಟೆಗಳ ಕಾಲ ಚಾಲನೆ ಮಾಡುತ್ತಾರೆ. ಅಲ್ಲದೇ 43ರಿಂದ 47 ಡಿ.ಸೆ. ತಾಪಮಾನದಲ್ಲಿ ಕೆಲಸ ಮಾಡುತ್ತಾರೆ. ಈ ಎಲ್ಲದರ ಪರಿಣಾಮ ರಸ್ತೆ ಅಪಘಾತಗಳು ಹೆಚ್ಚುತ್ತಿವೆ. ಟ್ರಕ್‌ ಚಾಲಕರ ಹಿತದೃಷ್ಟಿಯಿಂದ ಚಾಲಕರ ಕ್ಯಾಬಿನ್‌ಗಳಲ್ಲಿ ಏಸಿ ಕಡ್ಡಾಯಗೊಳಿಸಲಾಗುತ್ತಿದೆ,’ ಎಂದು ಗಡ್ಕರಿ ತಿಳಿಸಿದ್ದಾರೆ.