ನ್ಯಾಯಾಲಯದ ಮೆಟ್ಟಿಲೇರಿದ ಇರ್ತಲೆ ಹಾವು ; ಇದೇನಿದು ಪ್ರಕರಣ!

Team Udayavani, Oct 13, 2022, 7:25 AM IST

ಸಾಂದರ್ಭಿಕ ಚಿತ್ರ

ಪಾಟ್ನಾ: ಎರಡು ತಲೆ ಹಾವನ್ನು ಹಿಡಿದು ಮಾರಾಟ ಮಾಡುವ ಪ್ರಕರಣದ ವಿಚಾರದಲ್ಲಿ ಹಾವನ್ನೇ ನ್ಯಾಯಾಲಯದ ಮೆಟ್ಟಿಲು ಹತ್ತಿಸಿರುವ ಘಟನೆ ಬಿಹಾರದ ಬೇಗುಸರೈನಲ್ಲಿ ಬುಧವಾರ ನಡೆದಿದೆ.

“ಎರಡು ತಲೆ ಹಾವನ್ನು ಚೀನದಂತಹ ರಾಷ್ಟ್ರಗಳು ಔಷಧ ತಯಾರಿಕೆಗೆ ಬಳಸುತ್ತವೆ. ಆ ಕಾರಣಕ್ಕೆ ಸ್ಥಳೀಯರು ಹಾವನ್ನು ಹಿಡಿದು ಮಾರಾಟ ಮಾಡುತ್ತಾರೆ. ಆದರೆ ಹಾಗೆ ಮಾಡಬಾರದು, ಹಾವಿಗೆ ಅದರ ಪಾಡಿಗೆ ಬದುಕುವುದಕ್ಕೆ ಅವಕಾಶ ಮಾಡಿಕೊಡಬೇಕು. ಈ ಹಾವು ಬಾಲವನ್ನು ತಲೆಯಂತೆಯೇ ಎತ್ತುತ್ತದೆಯಾದ್ದರಿಂದ ಅದಕ್ಕೆ 2 ತಲೆ ಹಾವು ಎನ್ನಲಾಗುತ್ತದೆ. ಇದು ವಿಶೇಷ ಪ್ರಭೇದದ ಹಾವಾಗಿರುವುದರಿಂದ ಇಲ್ಲಿಗೇ ಕರೆಸಿದ್ದೇನೆ’ ಎಂದು ನ್ಯಾಯಾಧೀಶ ಸತೀಶ್‌ ಚಂದ್ರ ಝಾ ಹೇಳಿದ್ದಾರೆ.

ಗ್ರಾಮಗಳಲ್ಲಿ ಎರಡು ತಲೆ ಹಾವು ಹಿಡಿಯುವ ಪ್ರಕರಣಗಳು ಹೆಚ್ಚಾಗಿರುವ ಹಿನ್ನೆಲೆ, ಅವುಗಳ ರಕ್ಷಣೆಗೆ ಅರಣ್ಯ ಅಧಿಕಾರಿಗಳಿಗೆ ಜಡ್ಜ್ ಸೂಚನೆ ನೀಡಿದ್ದಾರೆ.