ಪರ್ರಿಕರ್‌ ಸಂಪುಟದ 2 ಸಚಿವರಿಗೆ ಕೊಕ್‌

Team Udayavani, Sep 25, 2018, 9:40 AM IST

ಪಣಜಿ: ಗೋವಾದಲ್ಲಿ ಮುಖ್ಯಮಂತ್ರಿ ಬದಲಾವಣೆ ಮಾಡುವ ಬಗ್ಗೆ ಸ್ಪಷ್ಟವಾಗಿ ನಿರಾಕರಿಸಿರುವ ಬಿಜೆಪಿ, ಸಂಪುಟದಲ್ಲಿ ಪ್ರಮುಖ 2 ಬದಲಾವಣೆ ಮಾಡಿದೆ. ಬಿಜೆಪಿ ನಾಯಕರಾದ ಫ್ರಾನ್ಸಿಸ್‌ ಡಿ’ಸೋಜ ಮತ್ತು ಪಾಂಡುರಂಗ ಮದಕೈಕರ್‌ ಅವರನ್ನು ಸಂಪುಟದಿಂದ ಕೈಬಿಡಲಾಗಿದೆ. ಅವರಿಬ್ಬರೂ ಕ್ರಮವಾಗಿ ಅಮೆರಿಕ ಮತ್ತು ಮುಂಬೈನ ಆಸ್ಪತ್ರೆಗಳಲ್ಲಿ ಅನಾರೋಗ್ಯ ನಿಮಿತ್ತ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಡಿ’ಸೋಜಾ ನಗರಾಭಿವೃದ್ಧಿ ಸಚಿವರಾಗಿದ್ದರೆ, ಮದಕೈಕರ್‌ ಇಂಧನ ಸಚಿವರಾಗಿದ್ದರು.

ಅವರ ಸ್ಥಾನಕ್ಕೆ ಬಿಜೆಪಿ ಶಾಸಕ ಮಿಲಿಂದ್‌ ನಾಯ್ಕ, ನಿಲೇಶ್‌ ಕಬ್ರಾಲ್‌ರನ್ನು ನೇಮಕ ಮಾಡಲಾಗಿದೆ. ಮಾಧ್ಯಮಗಳ ಜತೆಗೆ ಫೋನ್‌ನಲ್ಲಿ ಪ್ರತಿಕ್ರಿಯಿಸಿದ‌ ಫ್ರಾನ್ಸಿಸ್‌ ಡಿ’ಸೋಜ, ’20 ವರ್ಷಗಳಿಂದ ಪಕ್ಷಕ್ಕಾಗಿ ದುಡಿದಿದ್ದೆ. ಅದಕ್ಕಾಗಿ ಸಿಕ್ಕಿದ ಗೌರವ ಇದು’ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.