ಸದನದ ಸದಸ್ಯರಲ್ಲದ ಮಹಾರಾಷ್ಟ್ರದ 8ನೇ ಮುಖ್ಯಮಂತ್ರಿ ಉದ್ಧವ್‌ ಠಾಕ್ರೆ ಪ್ರಮಾಣ ವಚನ

Team Udayavani, Nov 28, 2019, 6:05 PM IST

ಮುಂಬಯಿ: ಶಿವಸೇನೆ ಆಧ್ಯಕ್ಷ ಉದ್ಧವ್‌ ಠಾಕ್ರೆ ಅವರು ಮಹಾರಾಷ್ಟ್ರದ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ. ಈ ಮೂಲಕ ಸದನದ ಸದಸ್ಯರಾಗದೇ ನೇರ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದ ಮಹಾರಾಷ್ಟ್ರದ 8ನೇ ರಾಜಕಾರಣಿಯಾಗಲಿದ್ದಾರೆ. ಈಗಾಗಲೇ ಮಹಾರಾಷ್ಟ್ರದಲ್ಲಿ 7 ಮಂದಿ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದ 6 ತಿಂಗಳೊಳಗೆ ಸದನದ ಸದಸ್ಯರಾಗಿದ್ದರು.

ಕಾಂಗ್ರೆಸ್‌ನ ಎ.ಆರ್‌. ಅಂತುಳೆ, ವಸಂತ್‌ದಾದ ಪಾಟೀಲ್‌, ಶಿವಾಜಿರಾವ್‌ ನೀಲಾಂಗೆಕಾರ್‌ ಪಾಟೀಲ್‌, ಶಂಕರ್‌ರಾವ್‌ ಚವ್ಹಾಣ್‌, ಸುಶೀಲ್‌ ಕುಮಾರ್‌ ಶಿಂಧೆ ಮತ್ತು ಪೃಥ್ವಿರಾಜ್‌ ಚವ್ಹಾಣ್‌ ಹಾಗೂ ಎನ್‌ಸಿಪಿಯ ಶರದ್‌ ಪವಾರ್‌ ಅವರು ಈ ಸಾಲಿಗೆ ಸೇರಿದ್ದಾರೆ. ಇದೀಗ ಆ ಸಾಲಿಗೆ 8ನೇ ಮುಖ್ಯಮಂತ್ರಿಯಾಗಿ ಉದ್ಧವ್‌ ಠಾಕ್ರೆ ಸೇರ್ಪಡೆಯಾಗಿದ್ದಾರೆ.

ಸಂವಿಧಾನದ ಪ್ರಕಾರ ಯಾವುದೇ ಸದನದ ಸದಸ್ಯನಲ್ಲದ ವ್ಯಕ್ತಿ ಮುಖ್ಯಮಂತ್ರಿ ಅಥವ ಸಚಿವನಾಗಿ ಪ್ರಮಾಣ ವಚನ ಸ್ವೀಕರಿಸಿದರೆ ಮುಂದಿನ 6 ತಿಂಗಳೊಳಗೆ ಸದನದ ಸದಸ್ಯರಾಗಬೇಕು. ಮಹಾರಾಷ್ಟ್ರದಲ್ಲಿ ಈ ಪದ್ಧತಿ 1980ರಲ್ಲಿ ಆರಂಭವಾಯಿತು. ವಸಂತ್‌ದಾದ ಪಾಟೀಲ್‌ ಅವರು ಸದನದ ಸದಸ್ಯನಲ್ಲದ ಮೊದಲ ಮುಖ್ಯಮಂತ್ರಿಯಾಗಿದ್ದರು. ಇಲ್ಲಿ ಕೆಲವು ನಾಯಕರು ಕೇಂದ್ರದಲ್ಲಿ ಮಂತ್ರಿಯಾಗಿದ್ದು, ಬಳಿಕ ಅಲ್ಲಿ ರಾಜೀನಾಮೆ ಸಲ್ಲಿಸಿ ಮಹಾರಾಷ್ಟ್ರದ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದ್ದರು.