ಅ. 1ರಿಂದ ಅನ್‌ಲಾಕ್‌ 5 ಆರಂಭ: ಸಿನೆಮಾ ಬಿಡುಗಡೆ ?

Team Udayavani, Sep 29, 2020, 6:10 AM IST

ಹೊಸದಿಲ್ಲಿ: ಕೋವಿಡ್ ಹಿನ್ನೆಲೆಯಲ್ಲಿ ಸ್ಥಗಿತಗೊಂಡಿದ್ದ ಒಂದೊಂದೇ ಚಟುವಟಿಕೆಗಳು ಆರಂಭವಾಗುತ್ತಿದ್ದು, ಅ. 1ರಿಂದ ಜಾರಿಯಾಗುವ ಅನ್‌ಲಾಕ್‌ 5ರಲ್ಲಿ ಸಿನೆಮಾ ಮಂದಿರಗಳು ಆರಂಭವಾಗುವ ನಿರೀಕ್ಷೆ ಇದೆ.

ಇದಕ್ಕೆ ಪೂರಕವೆಂಬಂತೆ ಪಶ್ಚಿಮ ಬಂಗಾಲ ಸರಕಾರವು ಈಗಾಗಲೇ ಅನ್‌ಲಾಕ್‌ 5ರ ಮಾರ್ಗಸೂಚಿಗಳನ್ನು ಹೊರಡಿಸಿದ್ದು, ಚಿತ್ರಮಂದಿರಗಳ ಆರಂಭಕ್ಕೆ ಅನುಮತಿ ನೀಡಿದೆ. ಹೀಗಾಗಿ ದೇಶದ ಇತರೆಡೆಯೂ ಸಿನೆಮಾ ಥಿಯೇಟರ್‌ಗಳು ಆರಂಭವಾಗಬಹುದು ಎನ್ನಲಾಗುತ್ತಿದೆ. ಅಲ್ಲದೆ ಇತ್ತೀಚೆಗಷ್ಟೇ ಪ್ರಧಾನಿ ಮೋದಿ ಅವರು 7 ರಾಜ್ಯಗಳ ಸಿಎಂಗಳ ಜತೆ ನಡೆಸಿದ ಸಭೆಯಲ್ಲಿ “ಮೈಕ್ರೋ ಕಂಟೈನ್‌ಮೆಂಟ್‌’ ಝೋನ್‌ಗೆ ಒತ್ತು ನೀಡಿ ಆರ್ಥಿಕ ಚಟುವಟಿಕೆಗಳನ್ನು ಆರಂಭಿಸುವಂತೆ ಸಲಹೆ ನೀಡಿದ್ದರು. ಆದರೆ ದೇಶಾದ್ಯಂತ ಪ್ರಕರಣಗಳ ಸಂಖ್ಯೆ ಹೆಚ್ಚುತ್ತಲೇ ಇರುವುದರಿಂದ ಶಾಲೆ-ಕಾಲೇಜುಗಳು ಅಕ್ಟೋಬರ್‌ನಲ್ಲೂ ಮುಚ್ಚಿರುವ ಸಾಧ್ಯತೆ ಇದೆ.

ಶಬರಿಮಲೆ ಯಾತ್ರೆಗೆ ಅವಕಾಶ
ಕೇರಳ ಸರಕಾರವು ಶಬರಿಮಲೆ ಯಾತ್ರೆಗೆ ಅವಕಾಶ ನೀಡಲು ನಿರ್ಧರಿಸಿದೆ. ಸೋಮವಾರ ನಡೆದ ಉನ್ನತ ಮಟ್ಟದ ಸಭೆಯಲ್ಲಿ ಈ ಬಗ್ಗೆ ನಿರ್ಧರಿಸಲಾಗಿದೆ. ನೀಲಕ್ಕಲ್‌ ಮತ್ತು ಪಂಪಾ ಶಿಬಿರದಲ್ಲಿ ಭಕ್ತರು ಪರೀಕ್ಷೆಗೆ ಒಳಗಾಗಬೇಕು. ವರ್ಚುವಲ್‌ ಕ್ಯೂಗೆ ಅವಕಾಶ ಇದೆ. ಆದರೆ ಸನ್ನಿಧಾನದಲ್ಲಿ ರಾತ್ರಿ ಉಳಿಯುವ ಅವಕಾಶ ಇರುವುದಿಲ್ಲ.