ಉ.ಪ್ರ. 2ನೇ ಹಂತದ ಮತದಾನ ಮುಕ್ತಾಯ

Team Udayavani, Feb 16, 2017, 3:45 AM IST

ಲಕ್ನೋ/ಡೆಹ್ರಾಡೂನ್‌: ಉತ್ತರಪ್ರದೇಶ ಚುನಾವಣೆಯ ಅತ್ಯಂತ ಮಹತ್ವದ 2ನೇ ಹಂತದ ಮತದಾನ ಬುಧವಾರ ಮುಕ್ತಾಯವಾಗಿದೆ. ಒಟ್ಟು 11 ಜಿಲ್ಲೆಗಳಲ್ಲಿನ 67 ಸ್ಥಾನಕ್ಕಾಗಿ ನಡೆದ ಚುನಾವಣೆಯಲ್ಲಿ ಶೇ.65ರಷ್ಟು ಮತದಾನ ನಡೆದಿದೆ. ಸಮಾಜವಾದಿ ಪಕ್ಷದ ನಾಯಕ ಆಜಂ ಖಾನ್‌ ಮತ್ತವರ ಪುತ್ರ ಅಬ್ದುಲ್ಲಾ ಆಜಂ ಕಣದಲ್ಲಿರುವ ಪ್ರಮುಖರಾಗಿದ್ದಾರೆ. ಇದೇ ವೇಳೆ ನೆರೆ ರಾಜ್ಯ ಉತ್ತರಾಖಂಡ ಚುನಾವಣೆಯೂ ಮುಗಿದಿದ್ದು, 70 ಸ್ಥಾನಗಳ ಪೈಕಿ 69 ಸ್ಥಾನಗಳಿಗಾಗಿ ಮತದಾನ ನಡೆದಿದೆ. ಕಳೆದ ಬಾರಿಯ ಶೇ.66 ಮತದಾನಕ್ಕೆ ಹೋಲಿಸಿದರೆ ಈ ಬಾರಿ ಶೇ.2ರಷ್ಟು ಏರಿಕೆಯಾಗಿದೆ.

ಉತ್ತರಪ್ರದೇಶ 2ನೇ ಹಂತದ ಚುನಾವಣೆಯಲ್ಲಿ ಒಟ್ಟು 2.28 ಕೋಟಿ ಮತದಾರರಿದ್ದಾರೆ. ಇದರಲ್ಲಿ 1.04 ಮಹಿಳೆಯರಿದ್ದಾರೆ. ಕಳೆದ ವರ್ಷ ಇಲ್ಲಿನ 67 ಸ್ಥಾನಗಳ ಪೈಕಿ ಸಮಾಜವಾದಿ ಪಕ್ಷ 34, ಬಿಎಸ್ಪಿ 18, ಬಿಜೆಪಿ 10, ಕಾಂಗ್ರೆಸ್‌ 3, ಇತರರು ಎರಡು ಸ್ಥಾನಗಳ ಗೆದ್ದಿದ್ದವು. ಈ ಬಾರಿ ಬಿಜೆಪಿ ಪ್ರಬಲವಾಗಿರುವುದರಿಂದ ಈ 67 ಸ್ಥಾನಗಳ ಫ‌ಲಿತಾಂಶ ಬಹಳ ಮಹತ್ವ ಪಡೆದುಕೊಂಡಿದೆ. 

ಅಜ್ಜನ ಮತದಾನ: ಬರೇಲಿ ಕ್ಷೇತ್ರದಲ್ಲಿ  ಕೇಂದ್ರ ಸಚಿವ ಮುಖಾ¤ರ್‌ ಅಬ್ಟಾಸ್‌ ನಕ್ವಿ ಅವರ 115 ವರ್ಷದ ಅಜ್ಜ ಜಡ್‌.ಎಚ್‌.ಕಾಜ್ಮಿ ಮತದಾನ ಮಾಡಿದ್ದು ಎಲ್ಲರ ಗಮನ ಸೆಳೆಯಿತು. ಅಜ್ಜ ಸಹಾಯಕರೊಂದಿಗೆ ಮತ ಚಲಾಯಿಸಿದರು.
ಉತ್ತರಾಖಂಡದ 1 ಸ್ಥಾನದ ಚುನಾವಣೆ ಬಾಕಿ:  ಉತ್ತರಪ್ರದೇಶದ ನೆರೆರಾಜ್ಯವಾದ ಉತ್ತರಾಖಂಡದಲ್ಲಿನ 70 ಸ್ಥಾನಗಳ ಪೈಕಿ ಬುಧವಾರ 69 ಸ್ಥಾನಕ್ಕೆ ಮಾತ್ರ ಮತದಾನ ನಡೆಯಿತು. ಚಮೋಲಿ ಜಿಲ್ಲೆಯ ಕರ್ಣಪ್ರಯಾಗ ಕ್ಷೇತ್ರದ ಮತದಾನ ಮಾ.9ಕ್ಕೆ ಮರು ನಿಗದಿಯಾಗಿದೆ. ಈ ಕ್ಷೇತ್ರದಲ್ಲಿ ಸ್ಪರ್ಧಿಸಬೇಕಿದ್ದ ಬಿಎಸ್ಪಿ ನಾಯಕ ಕುಲದೀಪ್‌ ಸಿಂಗ್‌ ಕನ್ವಾಸಿ ಮೊನ್ನೆ ಭಾನುವಾರ ಮೃತಪಟ್ಟಿರುವುದರಿಂದ ಈ ಬದಲಾವಣೆ ಮಾಡಿಕೊಳ್ಳಲಾಗಿದೆ.