ಉಗ್ರರಿಗೆ ಕಾಂಗ್ರೆಸ್‌ ಬಿರಿಯಾನಿ, ನಮ್ಮಿಂದ ಗುಂಡೇಟು: ಆದಿತ್ಯನಾಥ್‌

Team Udayavani, Nov 26, 2018, 5:48 PM IST

ಮಕ್ರಾನಾ, ರಾಜಸ್ಥಾನ : ”ಕಾಂಗ್ರೆಸ್‌ ಪಕ್ಷ ಉಗ್ರರಿಗೆ ಬಿರಿಯಾನಿ ತಿನ್ನಿಸಿದೆ; ನಾವು ಉಗ್ರರಿಗೆ ಗುಂಡೇಟನ್ನು ತಿನ್ನಿಸುತ್ತಿದ್ದೇವೆ” ಎಂದು ಉ.ಪ್ರ. ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್‌ ಅವರು ಇಂದಿಲ್ಲಿ ಚುನಾವಣಾ ಭಾಷಣದಲ್ಲಿ  ಹೇಳಿದರು. 

ಕಾಂಗ್ರೆಸ್‌ ಪಕ್ಷ ವಿಭಜನ ರಾಜಕಾರಣ ವನ್ನು ಅನುಸರಿಸಿಕೊಂಡು ಬಂದ ಕಾರಣ ದೇಶದಲ್ಲಿ ಭಯೋತ್ಪಾದನೆ ಬೆಳೆದು ಬಂದಿದೆ ಎಂದು ಆದಿತ್ಯನಾಥ್‌ ಆರೋಪಿಸಿದರು. 

ಮುಂಬರುವ ಡಿ.7ರಂದು ರಾಜ್ಯ ವಿಧಾನಸಭಾ ಚುನಾವಣೆಯನ್ನು ಕಾಣಲಿರುವ ರಾಜಸ್ಥಾನದಲ್ಲಿ ಬಿಜೆಪಿ ಪ್ರಚಾರ ಕಾರ್ಯದಲ್ಲಿ ನಿರತರಾಗಿರುವ ಯೋಗಿ ಆದಿತ್ಯನಾಥ್‌ ಅವರು, “ನೀವಿಂದು ದೇಶದಲ್ಲಿ ಕಾಂಗ್ರೆಸ್‌ ಬಿರಿಯಾನಿ ತಿಂದು ಸೊಕ್ಕಿರುವ ಉಗ್ರರನ್ನು ಕಾಣುತ್ತಿದ್ದೀರಿ; ಈಗ ನಾವು ಆ ಉಗ್ರರಿಗೆ ಗುಂಡಿನ ರುಚಿಯನ್ನು ತೋರಿಸುತ್ತಿದ್ದೇವೆ’ ಎಂದು ಹೇಳಿದರು. 

ದೇಶದಲ್ಲಿ  ಭಯೋತ್ಪಾದನೆಯ ಹುಟ್ಟು, ಬೆಳವಣಿಗೆಗೆ ಕಾಂಗ್ರೆಸ್‌ ಪಕ್ಷವೇ ಕಾರಣ; ಇದಕ್ಕೆ ಮುಖ್ಯವಾಗಿ ಕಾಂಗ್ರೆಸ್‌ ಅನುಸರಿಸಿಕೊಂಡು ಬಂದಿರುವ ವಿಭಜನ ರಾಜಕಾರಣವೇ ಕಾರಣ; ದೇಶದಲ್ಲಿನ ಭಯೋತ್ಪಾದನೆ, ಪ್ರತ್ಯೇಕತೆ, ನಕ್ಸಲ್‌ವಾದ ಮತ್ತು ಭ್ರಷ್ಟಾಚಾರ ಮುಂತಾಗಿ ಸರ್ವ ಬಗೆಯ ಪಿಡುಗಿಗೆ ಜನ್ಮ ನೀಡಿದ್ದೇ ಕಾಂಗ್ರೆಸ್‌ ಪಕ್ಷ’ ಎಂದು ಯೋಗಿ ಆದಿತ್ಯನಾಥ್‌ ಆರೋಪಿಸಿದರು.