ಉತ್ತರಪ್ರದೇಶ: ಮಹಾಮೈತ್ರಿ ರಚನೆ ಇಲ್ಲ

Team Udayavani, Jan 20, 2017, 3:45 AM IST

ಲಕ್ನೋ: ಬಿಹಾರ ಮಾದರಿಯಲ್ಲೇ ಉತ್ತರ ಪ್ರದೇಶದಲ್ಲೂ ಜಾತ್ಯತೀತ ಪಕ್ಷಗಳ ಒಗ್ಗಟ್ಟಿನಿಂದ ಚುನಾವಣೆ ಎದುರಿಸಬೇಕು ಎಂಬ ಸಮಾಜವಾದಿ ಪಕ್ಷ ಮತ್ತು ಕಾಂಗ್ರೆಸ್‌ಗೆ ಆರಂಭದಲ್ಲೇ ಹಿನ್ನಡೆಯಾಗಿದೆ.

ಅಜಿತ್‌ ಸಿಂಗ್‌ ಅವರ ರಾಷ್ಟ್ರೀಯ ಲೋಕದಳ ಪಕ್ಷದ ಜತೆಗೆ ಮೈತ್ರಿ ಇಲ್ಲ ಎಂದು ಘೋಷಿಸಿರುವ ಸಮಾಜವಾದಿ ಪಕ್ಷ, ಹೊಂದಾಣಿಕೆ ಏನಿದ್ದರೂ ಕಾಂಗ್ರೆಸ್‌ ಜತೆಗಷ್ಟೇ ಎಂದು ಹೇಳಿದೆ. ಈ ಪ್ರಕಾರ ಕಾಂಗ್ರೆಸ್‌ 103 ಹಾಗೂ ಎಸ್‌ಪಿ 300 ಸ್ಥಾನಗಳಲ್ಲಿ ಸ್ಪರ್ಧಿಸಲಿವೆ.  ಸೀಟು ಹಂಚಿಕೆ ವಿಚಾರದಲಿ ಸಮನ್ವಯವಾಗದ ಹಿನ್ನೆಲೆಯಲ್ಲಿ ಈ ನಿರ್ಧಾರಕ್ಕೆ ಬರಲಾಗಿದೆ ಎಂದು ಎಸ್ಪಿ ರಾಷ್ಟ್ರೀಯ ಉಪಾಧ್ಯಕ್ಷ ಕಿರಣ್ಮಯಿ ನಂದಾ ಹೇಳಿದ್ದಾರೆ. ಗುರುವಾರ ಬೆಳಗ್ಗೆಯಿಂದಲೂ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಅಖೀಲೇಶ್‌ ಯಾದವ್‌ ಅವರು ಹಿರಿಯ ನಾಯಕರೊಂದಿಗೆ ಚರ್ಚೆ ನಡೆಸಿ ಈ ನಿರ್ಧಾರಕ್ಕೆ ಬಂದಿದ್ದಾರೆ. ಮುಂಬರುವ ವಿಧಾನಸಭೆ ಚುನಾವಣೆಯನ್ನು ಕಾಂಗ್ರೆಸ್‌ ಜತೆಗಷ್ಟೇ ಎದುರಿಸಲಾಗುವುದು ಎಂಬ ತೀರ್ಮಾನಕ್ಕೆ ಬರಲಾಗಿದೆ‌ ಎಂದು ಅವರು ತಿಳಿಸಿದ್ದಾರೆ. 

ಆರ್‌ಎಲ್‌ಡಿಗಿಲ್ಲ ಮಣೆ: ಕಳೆದ  ವಿಧಾನಸಭೆ ಚುನಾವಣೆಯಲ್ಲಿ ಕೇವಲ 9 ಸ್ಥಾನ ಗಳಿಸಿದ್ದ ಆರ್‌ಎಲ್‌ಡಿ ಅಷ್ಟೇನೂ ಪ್ರಾಮುಖ್ಯತೆ ಪಡೆದಿರಲಿಲ್ಲ. ಆದರೆ 2014ರ ಲೋಕಸಭೆ ಚುನಾವಣೆಯಲ್ಲಿ ಶೇ.17 ಮತ  ಗಳಿಸಿ  ತನ್ನ ಪ್ರಾಬಲ್ಯ ಸಾಬೀತು ಮಾಡಿತ್ತು.  ಜಾಟ್‌ ಸಮುದಾಯದಲ್ಲಿ ತನ್ನದೇ ಛಾಪು ಹೊತ್ತಿರುವ ಅಜಿತ್‌ ಸಿಂಗ್‌, ಮಹಾಮೈತ್ರಿಕೂಟದಲ್ಲಿದ್ದರೆ  ಅನುಕೂಲ ಗಳಾಗುತ್ತಿದ್ದವು ಎಂಬ ಕಾರಣದಿಂದಾಗಿ ಮಾತುಕತೆ ನಡೆದಿತ್ತು. 

ಆದರೆ 30 ಸ್ಥಾನಗಳಿಗಿಂತ ಒಂದೇ ಒಂದು ಕಡಿಮೆಯಾದರೂ ಒಪ್ಪಿಕೊಳ್ಳಲು ತಯಾರಿಲ್ಲ ಎಂದು ಅಜಿತ್‌ ಸಿಂಗ್‌ ಅವರು ಪಟ್ಟು ಹಿಡಿದಿದ್ದರಿಂದ ಮೈತ್ರಿ ಮುರಿದುಬಿದ್ದಿದೆ. ಅಲ್ಲದೆ ಈ ಬಗ್ಗೆ ಮಾತನಾಡಿರುವ ಎಸ್ಪಿ, ನಾವಂತೂ ಆರ್‌ಎಲ್‌ಡಿ ಜತೆ  ಮೈತ್ರಿ ಮಾಡಿಕೊಳ್ಳುವುದಿಲ್ಲ. ಕಾಂಗ್ರೆಸ್‌ 103 ಸ್ಥಾನ ನೀಡಲಿದ್ದೇವೆ. ನಾವು 300ರಲ್ಲಿ ಸ್ಪರ್ಧಿಸಲಿದ್ದೇವೆ. ಒಂದು ವೇಳೆ ಕಾಂಗ್ರೆಸ್‌ಗೆ ಆರ್‌ಎಲ್‌ಡಿ ಜತೆ ಮೈತ್ರಿ ಬೇಕಾದಲ್ಲಿ ಅವರಿಗೆ ನೀಡಲಾಗಿರುವ ಸ್ಥಾನಗಳಲ್ಲೇ ಒಂದಷ್ಟನ್ನು ಬಿಟ್ಟುಕೊಡಬಹುದು ಎಂದು ಹೇಳಿದೆ.