ಸೆಕ್ಸ್ ಗೆ ನಕಾರ, ಪತ್ನಿಯನ್ನ ಹತ್ಯೆಗೈದು ಶಿಶ್ನವನ್ನೇ ಕತ್ತರಿಸಿಕೊಂಡ ಪತಿ!

Team Udayavani, Jul 9, 2019, 1:40 PM IST

ಗೋರಖ್ ಪುರ್:ಸೆಕ್ಸ್ ಗೆ ನಿರಾಕರಿಸಿದ್ದರಿಂದ ಆಕ್ರೋಶಗೊಂಡ ಪತಿ ಹೆಂಡತಿಯ ಕತ್ತು ಹಿಸುಕಿ ಹತ್ಯೆಗೈದ ಬಳಿಕ ತನ್ನ ಶಿಶ್ನವನ್ನು ಕತ್ತರಿಸಿಕೊಂಡ ಘಟನೆ ಗೋರಖ್ ಪುರದ ಸಿದ್ದಾರ್ಥನಗರ್ ಜಿಲ್ಲೆಯಲ್ಲಿ ನಡೆದಿದೆ.

ಪತ್ನಿಯ ತಂದೆ ನೀಡಿದ್ದ ದೂರಿನ ಮೇಲೆ ಸಿದ್ದಾರ್ಥನಗರ್ ಜಿಲ್ಲೆಯ ಕಾಕ್ರಾ ಪೋಖ್ರಾ ಗ್ರಾಮದ ನಿವಾಸಿ 24 ವರ್ಷದ ಅನ್ವರುಲ್ ಹಸನ್ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಸದ್ಯ ಹಸನ್ ಗೋರಖ್ ಪುರದ ಬಾಬಾ ರಾಘವದಾಸ್ ಮೆಡಿಕಲ್ ಕಾಲೇಜಿನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ.

ಹಸನ್ ಸೂರತ್ ನಲ್ಲಿ ಕೆಲಸ ಮಾಡುತ್ತಿದ್ದು, ಒಂದು ವರ್ಷದ ಹಿಂದೆ ಮೆಹನಾಝ್ (21ವರ್ಷ) ಜೊತೆ ವಿವಾಹವಾಗಿತ್ತು. ಎರಡು ದಿನಗಳ ಹಿಂದೆ ಮೆಹನಾಝ್ ಗಂಡನ ಮನೆಗೆ ಬಂದಿದ್ದಳು. ವರದಿಯ ಪ್ರಕಾರ, ಮೆಹನಾಜ್ ಸೆಕ್ಸ್ ಗೆ ಒಪ್ಪದಿದ್ದಾಗ ಆಕ್ರೋಶಗೊಂಡ ಹಸನ್ ಪತ್ನಿಯ ಕತ್ತು ಹಿಸುಕಿ ಕೊಂದು ಹಾಕಿದ್ದ. ಬಳಿಕ ತನ್ನ ಶಿಶ್ನವನ್ನು ಕತ್ತರಿಸಿಕೊಂಡಿದ್ದ. ಮನೆಯಲ್ಲಿನ ಕೂಗಾಟದ ಶಬ್ದ ಕೇಳಿ ನೆರೆಮನೆಯವರು ಪೊಲೀಸರಿಗೆ ಮಾಹಿತಿ ನೀಡಿದ್ದರು.

ಪೊಲೀಸರು, ಸ್ಥಳೀಯರು ಬಂದು ಪರಿಶೀಲನೆ ನಡೆಸಿದಾಗ ಮೆಹನಾಝ್ ದೇಹ ನೆಲದ ಮೇಲೆ ಬಿದ್ದಿದ್ದು, ಹಸನ್ ರಕ್ತದ ಮಡುವಿನಲ್ಲಿ ಬಿದ್ದಿದ್ದ. ಪೊಲೀಸರು ಕೂಡಲೇ ಹಸನ್ ನನ್ನು ಆಸ್ಪತ್ರೆಗೆ ದಾಖಲಿಸಿದ್ದರು. ಮೆಹನಾಝ್ ಶವವನ್ನು ಮರಣೋತ್ತರ ಪರೀಕ್ಷೆ ಕಳುಹಿಸಿದ್ದರು.

ಮೆಹನಾಝ್ ತಂದೆ ನೀಡಿರುವ ದೂರಿನ ಪ್ರಕಾರ ಹಸನ್  ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.