ವಿದ್ಯಾರ್ಥಿಗಳನ್ನು ಕರೆತರಲು ರಾಜಸ್ಥಾನಕ್ಕೆ 300 ಬಸ್ ಕಳುಹಿಸಿದ ಉತ್ತರಪ್ರದೇಶ ಸರ್ಕಾರ

Team Udayavani, Apr 17, 2020, 8:37 PM IST

ಲಕ್ನೋ:ಕೋವಿಡ್ 19 ತಡೆಗಟ್ಟುವ ನಿಟ್ಟಿನಲ್ಲಿ ದೇಶಾದ್ಯಂತ ಲಾಕ್ ಡೌನ್ ಮುಂದುವರಿದಿದ್ದು, ಏತನ್ಮಧ್ಯೆ ವಿದ್ಯಾರ್ಥಿಗಳನ್ನು ವಾಪಸ್ ಕರೆಯಿಸಿಕೊಳ್ಳಲು ಉತ್ತರಪ್ರದೇಶ ಸರ್ಕಾರ ಆಗ್ರಾದಿಂದ 200 ಬಸ್ ಹಾಗೂ ಜಾನ್ಸಿಯಿಂದ 100 ಬಸ್ ಗಳನ್ನು ರಾಜಸ್ಥಾನದ ಕೋಟಾಕ್ಕೆ ಕಳುಹಿಸಿರುವುದಾಗಿ ವರದಿ ತಿಳಿಸಿದೆ.

ರಾಜಸ್ಥಾನದ ಕೋಟಾದಲ್ಲಿ ಸಿಕ್ಕಿಹಾಕಿಕೊಂಡಿರುವ ಮಕ್ಕಳಳನ್ನು ವಾಪಸ್ ಕರೆತರಲು ಬಸ್ ಗಳನ್ನು ಕಳುಹಿಸಲಾಗಿದೆ. ನಾವು ಆಹಾರ, ನೀರಿನ ಬಾಟಲು, ಮಾಸ್ಕ್ ಹಾಗೂ ಸ್ಯಾನಿಟೈಸರ್ಸ್ ಅನ್ನು ಕಳುಹಿಸಿದ್ದೇವೆ. ಪ್ರತಿಯೊಂದು ಬಸ್ 25 ಮಕ್ಕಳನ್ನು ಕರೆತರಬಹುದಾಗಿದೆ. ಕೆಲವು ಬಸ್ ಗಳನ್ನು ಜಾನ್ಸಿಯಿಂದ ಕೂಡಾ ಕಳುಹಿಸಲಾಗಿದೆ ಎಂದು ಆಗ್ರಾದ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ರಾಜಸ್ಥಾನದ ಕೋಟಾ ಕೋಚಿಂಗ್ ಸೆಂಟರ್ ಗಳ ಹಬ್ ಆಗಿದೆ. ವಿದ್ಯಾಭ್ಯಾಸ ಪೂರ್ಣಗೊಂಡ ನಂತರ ಎಂಜಿನಿಯರಿಂಗ್ ಹಾಗೂ ಮೆಡಿಕಲ್ ಕಾಲೇಜುಗಳಂತಹ ಕಠಿಣ ಪರೀಕ್ಷೆಗಳಿಗೆ ತಯಾರಿ ನಡೆಸಲು ವಿದ್ಯಾರ್ಥಿಗಳಿಗೆ ಕೋಚಿಂಗ್ ನೀಡಲು ಕೋಟಾ ಪ್ರದೇಶ ಹೆಸರುವಾಸಿಯಾಗಿದೆ.

ಇತರ ರಾಜ್ಯಗಳು ಕೂಡಾ ತಮ್ಮ ವಿದ್ಯಾರ್ಥಿಗಳನ್ನು ವಾಪಸ್ ಕರೆದೊಯ್ಯಲು ಬೇಕಾದ ವ್ಯವಸ್ಥೆ ಮಾಡಿಕೊಳ್ಳಬೇಕಾಗುತ್ತದೆ ಎಂದು ರಾಜಸ್ಥಾನ್ ಮುಖ್ಯಮಂತ್ರಿ ಅಶೋಕ್ ಗೆಹ್ಲೋಟ್ ತಿಳಿಸಿದ್ದಾರೆ.

ಉತ್ತರಪ್ರದೇಶ ಸರ್ಕಾರದ ನಿಲುವನ್ನು ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಕಟುವಾಗಿ ಟೀಕಿಸಿದ್ದಾರೆ. ಲಾಕ್ ಡೌನ್ ಸಂದರ್ಭದಲ್ಲಿ ವಿದ್ಯಾರ್ಥಿಗಳನ್ನು ಕೋಟಾದಿಂದ ಕರೆತರಲು ವಿಶೇಷ ಬಸ್ ಗಳನ್ನು ಕಳುಹಿಸುವುದು ನ್ಯಾಯಸಮ್ಮತವಾದುದಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.