9000 ಕರೆ ಕದ್ದಾಲಿಕೆ ಮಾಡಿದ್ದ ಯುಪಿಎ

Team Udayavani, Dec 23, 2018, 6:00 AM IST

ಹೊಸದಿಲ್ಲಿ: ನರೇಂದ್ರ ಮೋದಿ ಸರಕಾರವು ಜನರ ಮೇಲೆ ಹದ್ದಿನ ಕಣ್ಣಿಟ್ಟಿದೆ ಎಂದು ಕಾಂಗ್ರೆಸ್‌ ಆರೋಪಿಸುತ್ತಿರುವ ಮಧ್ಯೆಯೇ ಯುಪಿಎ ಅಧಿಕಾರದಲ್ಲಿದ್ದಾಗ ಪ್ರತಿ ತಿಂಗಳು 7500ರಿಂದ 9000 ಫೋನ್‌ಗಳನ್ನು ಕದ್ದಾಲಿಕೆ ಮಾಡಲಾಗುತ್ತಿತ್ತು ಎಂಬುದು ಬಹಿರಂವಾಗಿದೆ. 

2013ರಲ್ಲಿ ಆರ್‌ಟಿಐ ಅಡಿಯಲ್ಲಿ ನೀಡಿದ ಪ್ರತಿಕ್ರಿಯೆಯಲ್ಲಿ ಈ ಮಾಹಿತಿ ತಿಳಿದು ಬಂದಿತ್ತು. ಅಷ್ಟೇ ಅಲ್ಲ, ಪ್ರತಿ ತಿಂಗಳೂ 300 -500 ಇಮೇಲ್‌ಗ‌ಳನ್ನೂ ಸರಕಾರ ತೆರೆದು ಓದುತ್ತಿತ್ತು. ಪ್ರಸನ್‌ಜಿತ್‌ ಮೊಂಡಲ್‌ ಎಂಬುವವರು ಸಲ್ಲಿಸಿದ್ದ ಅರ್ಜಿಗೆ  ಗೃಹ ಇಲಾಖೆ ಈ ಮಾಹಿತಿ ನೀಡಿತ್ತು.

ಜೊತೆಗೆ ಆಗಲೂ ಸರಕಾರ 10 ತನಿಖಾ ಏಜೆನ್ಸಿ ಗಳಿಗೆ ಕಣ್ಗಾವಲಿಡಲು ಅನುಮತಿ ನೀಡಿತ್ತು. ಡಿ. 20 ರಂದು ಕಣ್ಗಾವಲು ಆದೇಶವನ್ನು ಮರುಜಾರಿ ಮಾಡುತ್ತಿದ್ದಂತೆಯೇ, ಕೇಂದ್ರ ಸರಕಾರದ ವಿರುದ್ಧ ಕಾಂಗ್ರೆಸ್‌ ತೀವ್ರ ವಾಗ್ಧಾಳಿ ನಡೆಸಿತ್ತು.