ಕೊರಿಯಾ ದ್ವೀಪದ ಬಾನಲ್ಲಿ ಅಮೆರಿಕ ಬಾಂಬರ್‌ಗಳು

Team Udayavani, Sep 19, 2017, 7:45 AM IST

ಸಿಯೋಲ್‌: ನಿರಂತರ ಅಣ್ವಸ್ತ್ರ, ಕ್ಷಿಪಣಿ ಪರೀಕ್ಷೆ ನಡೆಸುತ್ತಿರುವ ಉತ್ತರ ಕೊರಿಯಾ ಮೇಲೆ ನಿಯಂತ್ರಣ ಹೇರುವಂತೆ ವಿಶ್ವಸಂಸ್ಥೆ ಭದ್ರತಾ ಮಂಡಳಿ ಮೇಲೆ ಒತ್ತಡ ತಂದು, ನಿರ್ಬಂಧ ವಿಧಿಸುವಲ್ಲಿ ಯಶಸ್ವಿಯಾಗಿದ್ದ ಅಮೆರಿಕ, ಇದೀಗ ತಾನೇ ಬಲ ಪ್ರದರ್ಶನಕ್ಕೆ ಮುಂದಾಗಿದೆ. ದಕ್ಷಿಣ ಕೊರಿಯಾದ ದ್ವೀಪ ಸಮೂಹದ ಮೇಲೆ ಬಾಂಬರ್‌ ಹಾಗೂ ಸ್ಟೆಲ್ತ್‌ ಫೈಟರ್‌ಗಳ ಹಾರಾಟ ನಡೆಸುವ ಮೂಲಕ ಅಮೆರಿಕ ತನ್ನ ಶಕ್ತಿ ಪ್ರದರ್ಶಿಸಿದೆ ಎಂದು ದಕ್ಷಿಣ ಕೊರಿಯಾದ ರಕ್ಷಣಾ ಸಚಿವಾಲಯ ಹೇಳಿದೆ.

ಸೆ.3ರಂದು ಉತ್ತರ ಕೊರಿಯಾ ತನ್ನ ಆರನೇ ಹಾಗೂ ಅತ್ಯಂತ ಪ್ರಬಲ ಕ್ಷಿಪಣಿ ಪರೀಕ್ಷೆ ನಡೆಸಿದ ನಂತರ ಇದೇ ಮೊದಲ ಬಾರಿ ಅಮೆರಿಕ ತನ್ನ ಶಕ್ತಿ ಪ್ರದರ್ಶನ ನಡೆಸಿದೆ. “ಉತ್ತರ ಕೊರಿಯಾದ ಕ್ಷಿಪಣಿ ಮತ್ತು ಅಣ್ವಸ್ತ್ರ ಪರೀಕ್ಷೆಗೆ ಪ್ರತಿಯಾಗಿ ಅಮೆರಿಕ-ದಕ್ಷಿಣ ಕೊರಿಯಾ ಮೈತ್ರಿಯ ಸಾಮರ್ಥ್ಯ ತೋರ್ಪಡಿಸುವ ಉದ್ದೇಶದಿಂದ 4 ಎಫ್-35ಬಿ ಸ್ಟೆಲ್ತ್‌ ಫೈಟರ್‌ಗಳು ಹಾಗೂ ಎರಡು ಬಿ-1ಬಿ ಬಾಂಬರ್‌ಗಳು ಕೊರಿಯಾ ದ್ವೀಪ ಸಮೂಹದ ಬಾನಿನಲ್ಲಿ ಹಾರಾಟ ನಡೆಸಿವೆ. ಅಮೆರಿಕದ ಫೈಟರ್‌ಗಳಿಗೆ ದ.ಕೊರಿಯಾದ ಎಫ್-15ಕೆಜೆಟ್‌ ಫೈಟರ್‌ಗಳು ಕೂಡ ಸಾಥ್‌ ನೀಡಿವೆ. ಇದೊಂದು ಸಹಜ ತರಬೇತಿ ಹಾರಾಟವಾಗಿದೆ,’ ಎಂದು ಸಚಿವಾಲಯ ಹೇಳಿದೆ.