ಬಿಜೆಪಿ ಸರಕಾರ ಗೋವಾ ಮತ್ತು ಗೋವಾ ಜನರ ವಿರುದ್ಧ ಕೆಲಸ ಮಾಡುತ್ತಿದೆ: ವಿಜಯ್ ಸರ್ದೇಸಾಯಿ

Team Udayavani, Feb 14, 2023, 5:08 PM IST

ಪಣಜಿ: ಪ್ರಸ್ತುತ ಬಿಜೆಪಿ ಸರಕಾರ ಗೋವಾ ಮತ್ತು ಗೋವಾ ಜನರ ವಿರುದ್ಧ ಕೆಲಸ ಮಾಡುತ್ತಿದೆ. ಮಾಜಿ ಮುಖ್ಯಮಂತ್ರಿ ಮನೋಹರ್ ಪರಿಕ್ಕರ್ ಅವರ ಪರಂಪರೆಯಿಂದ ಸರ್ಕಾರ ನಡೆಯುತ್ತಿದೆಯೇ? ಈ ಸರ್ಕಾರ ಪರಿಕ್ಕರ್ ಅವರನ್ನು ಹೆಸರಿಗೆ ಮಾತ್ರ ಬಳಸಿಕೊಳ್ಳುತ್ತಿದೆಯೇ? ಈ ಬಗ್ಗೆ ಗೋವಾದ ಜನತೆ  ಚಿಂತನೆ ನಡೆಸಬೇಕು. ಮಹದಾಯಿ ವಿಚಾರದಲ್ಲಿ ಸರ್ಕಾರ ನಡೆದುಕೊಳ್ಳುತ್ತಿರುವ ರೀತಿ ಬಗ್ಗೆಯೂ ಜನತೆ ಚಿಂತಿಸಬೇಕು. ಈ ಸರ್ಕಾರ ಬದಲಾಗಬೇಕು ಎಂದು ರಾಜ್ಯದ ಜನತೆ ನೋಡುತ್ತಿದ್ದಾರೆ. ಇದಕ್ಕಾಗಿ ಕ್ರಾಂತಿಯ ಅಗತ್ಯವಿದೆ ಎಂದು  ಶಾಸಕ ಹಾಗೂ ಗೋವಾ ಫಾರ್ವರ್ಡ್ ಅಧ್ಯಕ್ಷ ವಿಜಯ್ ಸರ್ದೇಸಾಯಿ ಹೇಳಿದರು.

ಮಡಗಾಂವ್ ನಲ್ಲಿ ಸಾರಸ್ವತ ಸಮಾಜ ಆಯೋಜಿಸಿದ್ದ ಮೂರು ದಿನಗಳ ಅನ್ನಸಂತರ್ಪಣೆ ಮತ್ತು ಸಾಂಸ್ಕೃತಿಕ ಉತ್ಸವದ ಸಮಾರೋಪ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಮಾತನಾಡಿದರು.

ಈ ಕೂಟ ಸಾರಸ್ವತ ಸಮುದಾಯದ ಒಗ್ಗಟ್ಟಿನ ಪ್ರತೀಕವಾಗಿದೆ. ಸಾರಸ್ವತ ಸಮುದಾಯವು ಗೋವಾದಲ್ಲಿ ಕೇವಲ 3 ಪ್ರತಿಶತದಷ್ಟಿದೆ. ಇನ್ನೂ ಇತರ ಸಮಾಜಗಳು ಸಾರಸ್ವತರನ್ನು ನೋಡುತ್ತವೆ. ನಾನು ಅವರನ್ನು ಅನುಕರಿಸುತ್ತಿದ್ದೇನೆ. ಸಾರಸ್ವತ ಯುವಕರು ಸಮಾಜದ ಸಮಸ್ಯೆಗಳನ್ನು ನಿಭಾಯಿಸಬೇಕು. ಈ ಪ್ರಶ್ನೆಗಳಿಗೆ ಅವರು ಪರಿಹಾರ ಕಂಡುಕೊಳ್ಳಬೇಕು. ಅನ್ಯಾಯದ ವಿರುದ್ಧ ಧ್ವನಿ ಎತ್ತಬೇಕು ಎಂದು ಸರ್ದೇಸಾಯಿ ಹೇಳಿದರು.

ಮಹದಾಯಿ ಸಮಸ್ಯೆ ಒಂದು ಸಮುದಾಯಕ್ಕೆ ಸೀಮಿತವಲ್ಲ. ಇದು ನೀರಿನ ಪ್ರಶ್ನೆ ಎಂದು ಶಾಸಕ ವಿಜಯ್ ಸರ್ದೇಸಾಯಿ ನುಡಿದರು. ಮಹದಾಯಿ ನೀರು ತಿರುಗಿಸಿದರೆ ಗೋವಾದಲ್ಲಿ ನೀರಿನ ಕೊರತೆ ಎದುರಾದರೆ ದೊಡ್ಡ ಸಮಸ್ಯೆ ಉಂಟಾಗುವ ಸಾಧ್ಯತೆ ಇದೆ ಎಂದು ಶಾಸಕ ಸರ್ದೇಸಾಯಿ ಎಚ್ಚರಿಕೆ ನೀಡಿದರು.

ಗೋವಾ ಸಾರಸ್ವತ ಸಮಾಜದ ಅಧ್ಯಕ್ಷ ಡಾ.ಜಗನ್ನಾಥ್ ಪ್ರಭುದೇಸಾಯಿ ಉತ್ಸವದ ಉದ್ದೇಶವನ್ನು ವಿವರಿಸಿದರು. ಸಂಘಟನಾ ಸಮಿತಿಯ ಕಾರ್ಯಾಧ್ಯಕ್ಷ ರಾಜೇಶ್ ಪ್ರಭು ಅತಿಥಿಗಳನ್ನು ಸ್ವಾಗತಿಸಿ, ನವನಾಥ ಖಂಡೇಪಾರ್ಕರ್ ಕಾರ್ಯಕ್ರಮ ನಿರ್ವಹಿಸಿ, ಕಾರ್ಯದರ್ಶಿ ಶಿರೀಷ್ ಪೈ ಕೃತಜ್ಞತೆ ಸಲ್ಲಿಸಿದರು.

ಇದನ್ನೂ ಓದಿ: ಸ್ಕೂಟಿಯಲ್ಲಿ ಮಗುವನ್ನು ಶಾಲೆಗೆ ಬಿಟ್ಟು ಹಿಂತಿರುಗುವಾಗ ತಾಯಿ ದುರ್ಮರಣ