ನಟ ಒಬೆರಾಯ್ ಸಂಸ್ಥೆಯಿಂದ ಹುತಾತ್ಮ ಯೋಧರ 25 ಕುಟುಂಬಕ್ಕೆ ಪ್ಲ್ಯಾಟ್ 

Team Udayavani, May 13, 2017, 3:08 PM IST

ಥಾಣೆ:ದೇಶಕ್ಕಾಗಿ ತಮ್ಮ ಪ್ರಾಣವನ್ನೇ ಮುಡಿಪಾಗಿಟ್ಟ ಯೋಧರ ಕುಟುಂಬಗಳಿಗೆ ಬಾಲಿವುಡ್ ಖ್ಯಾತ ನಟರಾದ ಅಕ್ಷಯ್ ಕುಮಾರ್, ನಾನಾ ಪಾಟೇಕರ್ ನೆರವು ನೀಡಿದ್ದನ್ನು ಓದಿದ್ದೀರಿ ಈಗ ಅವರ ಸಾಲಿಗೆ ಮತ್ತೊಬ್ಬ ನಟನ ಸೇರ್ಪಡೆ ಹುತಾತ್ಮ ಯೋಧರ 25 ಕುಟುಂಬಗಳಿಗೆ ಬಾಲಿವುಡ್ ನಟ ವಿವೇಕ್ ಒಬೆರಾಯ್ ಅವರ ಕಂಪನಿ ಕರ್ಮ್ ಇನ್ಪ್ರಾಸ್ಟ್ರಕ್ಚರ್ ಪ್ರೈ ಲಿಮಿಟೆಡ್ ಫ್ಲ್ಯಾಟ್ ಅನ್ನು ದಾನವಾಗಿ ನೀಡಿದೆ ಎಂದು ಮಾಧ್ಯಮದ ವರದಿ ತಿಳಿಸಿದೆ.

ವರದಿ ಪ್ರಕಾರ, ವಿವೇಕ್ ಒಬೆರಾಯ್ ಅವರ ಸಂಸ್ಥೆ ಸಿಆರ್ ಪಿಎಫ್ ಗೆ ಬರೆದಿರುವ ಪತ್ರದಲ್ಲಿ, ವಿವಿಧ ಕಾರ್ಯಾಚರಣೆಗಳಲ್ಲಿ ದೇಶದ ರಕ್ಷಣೆಗಾಗಿ ತಮ್ಮ ಪ್ರಾಣವನ್ನೇ ಮುಡಿಪಾಗಿಟ್ಟ ಹುತಾತ್ಮ ಯೋಧರ ಕುಟುಂಬಗಳಿಗೆ ಪ್ಲ್ಯಾಟ್ ಅನ್ನು ನೀಡುವುದಾಗಿ ಘೋಷಿಸಿದೆ. ಈಗಾಗಲೇ ಮಹಾರಾಷ್ಟ್ರದ ಥಾಣೆಯಲ್ಲಿ 4 ಪ್ಲ್ಯಾಟ್ ಅನ್ನು ಯೋಧರ ಕುಟುಂಬಗಳಿಗೆ ಹಸ್ತಾಂತರಿಸಿರುವುದಾಗಿ ಹೇಳಿದೆ.

ಪ್ಲ್ಯಾಟ್ ಅನ್ನು ನೀಡುವ ಹುತಾತ್ಮ ಯೋಧರ ಕುಟುಂಬದ ಹೆಸರನ್ನು ಈಗಾಗಲೇ ಒಬೆರಾಯ್ ಸಂಸ್ಥೆ ಬಿಡುಗಡೆ ಮಾಡಿದೆ. ಉಳಿದ ಕುಟುಂಬಗಳ ಹೆಸರನ್ನು ಕೂಡಲೇ ತಿಳಿಸುವುದಾಗಿ ಹೇಳಿದೆ. ಈಗಾಗಲೇ ಬಾಲಿವುಡ್ ನ ಖ್ಯಾತ ನಟ ಅಕ್ಷಯ್ ಕುಮಾರ್ ಅವರು ಸಿಆರ್ ಪಿಎಫ್ ನ 12 ಕುಟುಂಬಗಳಿಗೆ 1.08 ಕೋಟಿ ರೂಪಾಯಿ  ನೆರವು ನೀಡಿದ್ದರು.