ಸಂಗೀತಗಾರ್ತಿ ಜಯಲಕ್ಷ್ಮೀ ಸಂತಾನಂ ನಿಧನ

Team Udayavani, Jul 16, 2018, 8:20 AM IST

ಚೆನ್ನೈ: ಕರ್ನಾಟಕ ಶಾಸ್ತ್ರೀಯ ಸಂಗೀತಗಾರ್ತಿ ಜಯಲಕ್ಷ್ಮೀ ಸಂತಾನಂ (86) ಚೆನ್ನೈನಲ್ಲಿ ಶನಿವಾರ ನಿಧನರಾಗಿದ್ದಾರೆ. ತಮಿಳುನಾಡು ಹಾಗೂ ಆಂಧ್ರಪ್ರದೇಶದಲ್ಲಿ ಜನಪ್ರಿಯವಾಗಿರುವ ಜಯಲಕ್ಷ್ಮೀ ಇಬ್ಬರು ಪುತ್ರರು ಹಾಗೂ ಓರ್ವ ಪುತ್ರಿಯನ್ನು ಅಗಲಿದ್ದಾರೆ. ತಾಯಿ ಮುತ್ತುಲಕ್ಷ್ಮಿಯಿಂದ ಬಾಲ್ಯದಲ್ಲೇ ಸಂಗೀತ ಕಲಿಕೆ ಆರಂಭಿಸಿದ್ದ ಜಯಲಕ್ಷ್ಮೀ, ನಾದಿನಿ ರುಕ್ಮಿಣಿ ಸುಂದರ ರಾಜನ್‌ ರ ಬಳಿ ಸಂಗೀತಾಭ್ಯಾಸ ಮಾಡಿದರು. 7 ವರ್ಷದವರಿದ್ದಾಗಲೇ ಸಂಗೀತ ಸಾಧನೆಗೆ ಚಿನ್ನದ ಪದಕ ಪಡೆದಿದ್ದರು. ಸೋದರ ವಿ.ವಿ. ಸದಗೋಪನ್‌ ದಿಲ್ಲಿ ವಿವಿ ಯಲ್ಲಿ ಸಂಗೀತ ಪ್ರಾಧ್ಯಾಪಕ, ಹಾಗೂ ನಟರೂ ಆಗಿದ್ದಾರೆ. ರುಕ್ಮಿಣಿ ಯವರ ಜೊತೆಗೇ ಸಂಗೀತ ಕಾರ್ಯಕ್ರಮಗಳಲ್ಲಿ ಕಾಣಿಸಿ ಕೊಳ್ಳುತ್ತಿದ್ದರು. ಪತಿ ಸಂತಾನಂ ಉದ್ಯೋಗ ನಿಮಿತ್ತ ಹೈದರಾಬಾದ್‌ ನಲ್ಲಿ ನೆಲೆಸಬೇಕಾದ್ದರಿಂದ, ಆಂಧ್ರದಲ್ಲೂ ಸಂಗೀತಪ್ರಿಯರಿದ್ದಾರೆ. ಎಂ.ಎಸ್‌.ಸುಬ್ಬುಲಕ್ಷ್ಮೀ, ಎಂ.ಎಲ್‌. ವಸಂತ ಕುಮಾರಿ ಮೆಚ್ಚಿನ ಸಂಗೀತಗಾರರಾಗಿದ್ದರು.